ខេត្ដព្រះវិហារ ៖ នៅព្រឹកថ្ងៃទី១៩ សីហា លោកនាយឧត្ដមសេនីយ៍ផ្កាយមាស៤ ជា តារា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការឯកភាពសមរភូមិជួរមុខទិសយោធភូមិភាគទី៤ បានដឹកនាំឧត្ដម សេនីយ៍ជាច្រើនរូបជាមេបញ្ជាការកងឯកភាព ប្រចាំការសមរភូមិជួរមុខទិសទី១ ប្រាសាទព្រះវិហារចូលទៅកាន់ខ្សែត្រៀមជួរមុខចំណុចវាលឥន្ទ្រី សំបុកឃ្មុំ ភ្នំទ្រព្យ ដើម្បីត្រួតពិនិត្យលេណដ្ឋាន សព្វាវុធ និងពង្រឹងស្មារតីដល់កងកម្លាំងកម្ពុជា ដែលកំពុងឈរជើងការពារបូរណភាពទឹកដី ក្នុងតំបន់ប្រាសាទព្រះវិហាររបស់ខ្មែរ ដោយសារកាលពីប៉ុន្មានសបា្ដហ៍កន្លងទៅ ខណៈពេលដែលមានការហូបបាយជុំគ្នានៅសំបុកឃ្មុំ រវាងមេទ័ពភាគីទាំង២នោះ មេទ័ពសៀម បានបង្ខំឱ្យទ័ពកម្ពុជារុះរើជំរំជំរកនៅតាមបណ្ដោយ ខ្សែត្រៀមជួរមុខ ចំណុចវាលឥន្ទ្រី ចេញឱ្យអស់ ដោយពួកគេនិយាយថា ជាទឹកដី៤,៦គីឡូម៉ែត្រការ៉េ ដែលកម្ពុជាមិនធ្លាប់មាន ។
លោកនាយឧត្ដមសេនីយ៍ ជា តារា បន្ទាប់ពីអញ្ជើញត្រួតពិនិត្យ នៅតាមបណ្ដាខ្សែត្រៀមរួចមក នៅព្រឹកថ្ងៃដដែលបានមានប្រសាសន៍ នៅលើខ្សែត្រៀមជួរមុខវាលឥន្ទ្រីពីមហិច្ឆតាដ៏អាក្រក់របស់សៀមប្រាប់អ្នកយកព័ត៌មានកោះសន្ដិភាពថា សៀមតែងតែលើកឡើងពីតំបន់៤,៦គីឡូម៉ែត្រការ៉េ ដែលជាសំដីដ៏ខ្មៅងងឹត និងប្រកបដោយគ្រោះថ្នាក់ លោភលន់ឥតអៀនខ្មាស ហើយថែមទាំងមានគំរោងប្រើប្រាស់យោធា មកលើទឹកដី៤,៦គីឡូម៉ែត្រការ៉េ ដែល ជាទឹកដីដ៏ពិសិដ្ឋរបស់ខ្មែរទៀតផង គឺមិនខុសអ្វី ពីបទពិសោធន៍របស់សៀមឈ្លានពានទឹកដីភូមា៤,៩១គីឡូម៉ែត្រការ៉េនោះទេ ។
លោកនាយឧត្ដមសេនីយ៍ ជា តារា បញ្ជាក់ថា ទោះបីជាបែបណាក្ដីចំពោះខ្មែរ គឺខុសពីភូមា ខ្មែរមានសម្ដេចតេជោ ជាអគ្គមគ្គុទ្ទេសក៍ដ៏ឆ្នើម ដូច្នេះកងទ័ពកម្ពុជា មានឆន្ទៈប្រយុទ្ធដ៏អង់អាច ក្លាហាន គោរព និងស្មោះត្រង់ ជាមួយសម្ដេច តេជោ និងមានបទពិសោធន៍ក្នុងការប្រយុទ្ធ ការពារទឹកដីក្នុងសិទ្ធិស្វ័យការពារ ។ លោកនាយឧត្ដមសេនីយ៍បានថ្កោលទោស និងផ្ដាំថា <<បើមានមហិច្ឆតាដ៏អាក្រក់ថោកទាប បែបនេះ សុំផ្ដាំលាប្រពន្ធទី១ ទី២កូនរបស់ខ្លួន ជាមុនសិន ហើយស្ពាយក្ដារមឈូសមកជាមួយផង មុនពេលមកឈ្លានពានទឹកដីកម្ពុជា>> ។
លោកនាយឧត្ដមសេនីយ៍ បញ្ជាក់ឱ្យដឹងផងដែរថា ពេលនេះសភាពការណ៍នៅតំបន់ប្រាសាទព្រះវិហាររបស់ខ្មែរ គឺមិនមានអ្វីដែលជាការប្រឈមមុខដាក់គ្នាខាងអាវុធទេ គឺស្ងាត់ស្ងៀម តែចំពោះកងកម្លាំង គឺចាំបាច់ត្រូវតែប្រុង ជើងការគ្រប់វិនាទី ។ ដោយឡែកជំរំកងទ័ពកម្ពុជា ដែលបានសង់ឡើងនៅតាមខ្សែត្រៀមជួរមុខក្នុងទឹកដីកម្ពុជា មិនមានការរុះរើតាមការ បញ្ជារបស់មេទ័ពសៀមឡើយ គឺមានតែពង្រឹងបន្ថែមទៀត គ្រប់ចំណុច នៅវាលឥន្ទ្រី សម្រាប់កងទ័ពកម្ពុជា រស់នៅមានភាពគត់មត់ល្អ ដើម្បីត្រៀមតតាំងជាមួយបច្ចាមិត្ដ បើមានការឈ្លានពានជាយថាហេតុ ៕
ចែករំលែកព័តមាននេះ