ខេត្តកំពត ៖ ប្រធានសាលាដំបូងខេត្តកំពត លោក ឡុង កេសភិរម្យ បានថ្លែងប្រាប់បណ្ដាញព័ត៌មានឲ្យដឹងនៅព្រឹកថ្ងៃទី៧ មករាថា ម្ចាស់អគារកម្ពស់៧ជាន់ (គិតទាំងជាន់ផ្ទាល់ដី) ដែលបាក់រលំនៅខេត្តកែប ២នាក់ប្ដីប្រពន្ធត្រូវបានអនុញ្ញាតឲ្យត្រឡប់ទៅផ្ទះវិញ ប៉ុន្ដែបានដាក់ឱ្យស្ថិតក្រោមការត្រួតពិនិត្យរបស់តុលាការ ពោល គឺមិនអនុញ្ញាតឲ្យធ្វើដំណើរទៅក្រៅប្រទេសឡើយ ។
ប្រធានសាលាដំបូងខេត្តកំពត បានបញ្ជាក់ទៀតថា ម្ចាស់អគារ២នាក់ប្ដីប្រពន្ធនេះ ត្រូវបានអនុញ្ញាតឲ្យត្រឡប់ទៅផ្ទះកាលពីល្ងាចថ្ងៃទី៦ មករា ហើយការដែលអនុញ្ញាតឲ្យត្រឡប់ទៅផ្ទះនេះ គឺដើម្បីទៅរកប្រាក់ដើម្បីសងជាសំណងរដ្ឋប្បវេណីដល់ជនរងគ្រោះ ដែលបានស្លាប់ និងរបួសក្នុងហេតុការណ៍បាក់រលំអគារ ។
សូមជម្រាបថា តុល្យការជនរងគ្រោះ ដែលក្រុមការងារបានជួយសង្គ្រោះយកចេញពីគំនរបាក់បែកនៃអគាររលំ មានចំនួនសរុប៥៩នាក់ (ស្រី្ត២២នាក់) ក្នុងនោះបាត់បង់ជីវិតចំនួន៣៦នាក់ (ស្រី្ត១៤នាក់) ក្នុងចំណោមជនរងគ្រោះទាំងនេះ មានក្មេងចំនួន៦នាក់ (ក្មេងស្រី២នាក់) និងរងរបួសចំនួន២៣នាក់ (ស្រី្ត៨នាក់) ។
ប្រតិបត្តិការនៃការរុករកជនរងគ្រោះ ប្រើរយៈពេលជិត២ថ្ងៃ គឺអស់រយៈពេលជាង៤៣ម៉ោង ចាប់ពីល្ងាចថ្ងៃទី៣ ដល់ព្រឹកថ្ងៃទី៥ មករា ត្រូវបានបិទបញ្ចប់ជាស្ថាពរ ត្រឹមវេលាម៉ោង១១និង៣៥នាទីថ្ងៃត្រង់ ។
ស្ថានទូតបរទេសធំៗនៅកម្ពុជា ផ្ញើសាររំលែកទុក្ខជនរងគ្រោះ និងសន្យាជួយពង្រឹងសុវត្ថិភាពសំណង់នៅកម្ពុជាយោងតាមវិទ្យុបារាំងអន្តរជាតិបានផ្សាយមុននេះថា ស្ថានទូតអាមេរិក ចិន អូស្ត្រាលី និងអង្គការសហប្រជាជាតិផង បានផ្ញើសារជាបន្តបន្ទាប់ ដើម្បីចូលរួមរំលែកទុក្ខជូនចំពោះជនរងគ្រោះដែលស្លាប់និងរងរបួស នៅក្នុងឧបទ្ទវហេតុនៃការរលំបាក់អគារនៅខេត្តកែប កាលពីរសៀលថ្ងៃទី៣ មករា ឆ្នាំ២០២០ ។ ក្រៅពីផ្ញើសាររំលែកទុក្ខ ស្ថានទូតខ្លះបានប្រកាសផ្តល់ជំនួយ និងខ្លះបានសន្យាថា នឹងសហការចាប់ដៃគូជាមួយរដ្ឋាភិបាលកម្ពុជា ដើម្បីកែលម្អស្តង់ដាសុវត្ថិភាពសំណង់នៅកម្ពុជា ។
សម្រាប់ស្ថានទូតអាមេរិកប្រចាំនៅកម្ពុជា ឧបទ្ទវហេតុនៃការដួលរលំបាក់អគារនៅខេត្តកែបនេះ គឺជាសេចក្តីទុក្ខក្រៀមក្រំបំផុត ។ តាមរយៈគណនីយហ្វេសបុកផ្លូវការរបស់ខ្លួន កាលពីថ្ងៃទី៤ មករា ស្ថានទូតសហរដ្ឋអាមេរិកប្រចាំនៅកម្ពុជា ក្រៅពីផ្ញើសាររំលែកទុក្ខ ក៏បានបួងសួងដល់គ្រួសារជនរងគ្រោះ និងអ្នកដទៃទៀត ដែលទទួលរងគ្រោះនៅក្នុងឧបទ្ទវហេតុនេះ ។
ក្រៅពីនេះ ស្ថានទូតប្រទេសមហាអំណាចមួយនេះ បានប្រកាសគាំទ្រទាំងស្រុង ចំពោះកិច្ចខិតខំប្រឹងប្រែង ក្នុងការជួយសង្គ្រោះដល់ជនរងគ្រោះក្នុងរយៈពេលប៉ុន្មានថ្ងៃមកនេះ ។ ក្រៅពីស្ថានទូតអាមេរិក ស្ថានទូតអូស្ត្រាលីប្រចាំកម្ពុជាឯណោះវិញ ក៏បានផ្ញើសារចូលរួមរំលែកទុក្ខដ៏ក្រៀមក្រំនេះដែរ ។ តាមរយៈសំណេរជាភាសាអង់គ្លេសនៅលើគណនីហ្វេសបុករបស់ខ្លួន ស្ថានទូតអូស្ត្រាលីប្រចាំនៅកម្ពុជា ក៏បានជួយអធិស្ឋានដល់ប្រតិបត្តិការជួយសង្គ្រោះដល់ជនរងគ្រោះ និងបានសន្យាថា នឹងធ្វើការជាមួយប្រទេសកម្ពុជា ដើម្បីកែលម្អស្តង់ដាសុវត្ថិភាពសំណង់នៅក្នុងប្រទេសកម្ពុជា ។
ក្រៅពីអាមេរិកនិងអូស្ត្រាលីនេះ ស្ថានទូតចិនប្រចាំកម្ពុជាឯណោះវិញ ក៏បានផ្ញើសាររំលែកទុក្ខជាបន្តបន្ទាប់គ្នានេះដែរ ។ សម្រាប់ស្ថានទូតចិនប្រចាំនៅកម្ពុជា ខ្លួនមានការភ្ញាក់ផ្អើលយ៉ាងខ្លាំងចំពោះហេតុការណ៍បាក់រលំអគារខាងលើ។ ស្ថានទូតចិនប្រចាំកម្ពុជា ក្រៅពីសម្ដែងទុក្ខព្រួយ និងចូលរួមរំលែកទុក្ខយ៉ាងក្រៀមក្រំ ជូនចំពោះជនរងគ្រោះក្នុងឧបទ្ទវហេតុនេះហើយ ក៏បានជូនពរឲ្យអ្នករងរបួសក្នុងឧបទ្ទវហេតុនេះឲ្យឆាប់ជាសះស្បើយផងដែរ ។
តាមរយៈគណនីយហ្វេសបុកផ្លូវការរបស់ខ្លួន កាលពីថ្ងៃទី៤ មករា ស្ថានទូតចិនបានឲ្យដឹងថា បន្ទាប់ពីហេតុការណ៍ភ្លាមៗ ខ្លួនបានបញ្ជូនមន្ត្រីរបស់ខ្លួនម្នាក់ទទួលបន្ទុកកិច្ចការសភាពាណិជ្ជកម្មចិននៅកម្ពុជាប្រចាំនៅខេត្តព្រះសីហនុទៅដល់កន្លែងកើតហេតុ និងបានរួមចំណែកឧបត្ថម្ភថវិកាសប្បុរសធម៌ដល់មន្ត្រីដែលតំណាងឲ្យរដ្ឋបាលខេត្តកែបនេះដែរ ដើម្បីបង្ហាញពីទឹកចិត្តក្នុងនាមជាមិត្តភាពដ៏ជ្រាលជ្រៅដែលប្រៀបដូចបងប្អូននឹងគ្នា។ នេះបើតាមគណនីយហ្វេសបុករបស់ស្ថានទូតចិនប្រចាំនៅកម្ពុជា ។
ក្រៅពីស្ថានទូតបរទេសធំៗខាងលើ ការិយាល័យអង្គការសហប្រជាជាតិប្រចាំនៅកម្ពុជា ក៏បានផ្ញើសាររំលែកទុក្ខ និងជូនពរដល់ជនរងគ្រោះកម្ពុជានេះផងដែរ ។ បន្ថែមលើសារចូលរួមរំលែកទុក្ខនិងការជូនពរនេះហើយ អង្គការសហប្រជាតិប្រចាំកម្ពុជា ក៏បានបង្ហាញឆន្ទៈ ក្នុងការជួយដល់រដ្ឋាភិបាលកម្ពុជា ក្នុងការពង្រឹងវិស័យសំណង់នៅកម្ពុជាផងដែរ។ តាមរយៈសារនៅលើទំព័រហ្វេសប៊ុក កាលពីល្ងាចថ្ងៃទី ៤ ខែមករា អង្គការសហប្រជាជាតិប្រចាំកម្ពុជាបានសរសេរថា ប្រព័ន្ធឬស្ថាប័នពាក់ព័ន្ធនានារបស់អង្គការសហប្រជាជាតិប្រចាំនៅកម្ពុជា នឹងត្រៀមខ្លួនធ្វើការជាមួយរដ្ឋាភិបាលកម្ពុជា និងដៃគូទាំងអស់ ដើម្បីកែលម្អស្តង់ដារសំណង់ ដែលប្រកបដោយសុវត្ថិភាព ។
គួរជំរាបជូនថា អគារកម្ពស់០៧ជាន់ ស្ថិតនៅក្នុងខេត្តកែប ដែលកំពុងស្ថិតនៅក្នុងការសាងសង់បាន៩០ភាគរយនេះ បានដួលរលំ កាលពីរសៀលថ្ងៃទី៣ មករា ឆ្នាំ២០២០ ដោយសង្កត់កម្មករឲ្យស្លាប់និងរងរបួស ប្រមាណជាជិត៦០នាក់ ។ សូមបញ្ជាក់ដែរថា នេះមិនមែនជាលើកទី១ទេ នៃការដួលរលំបាក់អគារនៅក្នុងប្រទេសកម្ពុជានេះ ៕
ចែករំលែកព័តមាននេះ