តាមរបាយការណ៍ថ្មីមួយ ដែលចេញផ្សាយដោយកាសែតមួយរបស់អង់គ្លេសបានឱ្យដឹងថា ស្រាបៀរពិតជាមានគុណប្រយោជន៍ផ្នែកសុខភាពដែលគេពុំនឹកស្មានដល់។ របាយការណ៍នេះបានកើតចេញពីការ សិក្សាក្នុងពេលថ្មីៗដោយរកឃើញថា នៅពេលដែលគេទទួលទានស្រាបៀរក្នុងកំរិតមួយមធ្យម(មិនឱ្យស្រវឹង)នោះគេនឹងរកឃើញអត្ថប្រយោជន៍ផ្នែកសុខភាពរបស់វាជាមិនខាន។
អ្នកជំនាញបាននិយាយថា នៅក្នុងស្រាបៀរសំបូរទៅដោយប្រភពវីតាមីន សារធាតុសរសៃ សារធាតុរ៉ែ និងសមាសធាតុដែលប្រឆាំងនឹងអុកស៊ីដកម្ម ។ លើសពីនេះទៀត វាមានកាឡូរីទាបធៀបជាមួយភេសជ្ជៈស្រវឹងដទៃទៀត។ អ្នកជំនាញដដែលបានបន្ថែមថា ស្រាបៀរសំបូរដោយវីតាមីន ដែលអាចជួយរក្សារបបអាហារឱ្យមានតុល្យភាព ជាពិសេសសារធាតុរ៉ែ ដូចជា ស៊ីលីខូន អាចជួយទប់ស្កាត់ការកើតជំងឺពុកឆ្អឹង ។
សូមបញ្ជាក់ថា ការស្ទង់មតិរកឃើញថា៦៨ភាគរយនៃប្រជាជនអង់គ្លេសចាត់ទុកស្រាបៀរជាភេសជ្ជៈប្រចាំថ្ងៃ ហើយប្រជាជនប្រហែល១០ភាគរយយល់ខុសថា ស្រាបៀរមានសារធាតុខ្លាញ់ ។ ចំណែក១៣ ភាគរយទៀតយល់ថា ស្រាបៀរផលិតពីសារធាតុគីមី មិនមែនផលិតពីស្រូវសាឡី និងរុក្ខជាតិម្យ៉ាង ហៅថា ហប់(Hop) ទេ ៕
ចែករំលែកព័តមាននេះ