សិង្ហបុរីបន្ធូរបន្ថយការរឹតបន្តឹង ដោយអនុញ្ញាតឱ្យមានការប្រមូលផ្តុំដល់២៥០នាក់
សិង្ហបុរី ៖ តាមប្រភពព័ត៌មាន South China Morning Post បានឱ្យដឹងថា ប្រទេសសិង្ហបុរីនឹងអនុញ្ញាតឱ្យមានការតាំងពិព័រណ៍ និងសន្និសីទធំៗ…
សិង្ហបុរី ៖ តាមប្រភពព័ត៌មាន South China Morning Post បានឱ្យដឹងថា ប្រទេសសិង្ហបុរីនឹងអនុញ្ញាតឱ្យមានការតាំងពិព័រណ៍ និងសន្និសីទធំៗ ដែលមានអ្នកចូលរួមរហូតដល់ទៅ ២៥០នាក់ ដែលជាការកើនឡើងពីចំនួនអតិបរមានាពេលបច្ចុប្បន្ននេះ ខណៈប្រទេសនេះនៅតែបន្តបន្ធូរការរឹតបន្តឹងជាបណ្តើរៗ។
រដ្ឋមន្ត្រីក្រសួងពាណិជ្ជកម្មនិងឧស្សាហកម្ម លោក Chan Chun Sing បានថ្លែងនៅក្នុងសន្និសីទសារព័ត៌មានបែបជាក់ស្តែងថា វិធានការនេះមានគោលបំណងដើម្បីជួយត្រួសត្រាយផ្លូវសម្រាប់ការធ្វើជាម្ចាស់ផ្ទះនៃព្រឹត្តិការណ៍ធំៗ នាពេលអនាគត។
ឧស្សាហកម្មទេសចរណ៍ និងសន្និសីទនៅសិង្ហបុរីមានចំនួនជិត ១% នៃ GDP របស់សិង្ហបុរីក្នុងការបន្ថែមតម្លៃសេដ្ឋកិច្ច។ ឧស្សាហកម្មនេះស្ទើរតែទាំងអស់នៅក្នុងវិស័យទេសចរណ៍ទូលំទូលាយបានដួលរលំនៅឆ្នាំនេះ ចំពេលមានការរីករាលដាលនៃជំងឺកូវីដទូទាំងពិភពលោក។
អ្នករៀបចំព្រឹត្តិការណ៍នឹងត្រូវបានអនុញ្ញាតឱ្យដាក់ពាក្យសុំការយល់ព្រម ដើម្បីធ្វើជាម្ចាស់ផ្ទះព្រឹត្តិការណ៍ចាប់ពីថ្ងៃទី១ ខែតុលា។ សំណើរនានានឹងត្រូវពិនិត្យឡើងវិញដោយក្រុមប្រឹក្សាទេសចរណ៍សិង្ហបុរី និងក្រសួងពាណិជ្ជកម្ម និងឧស្សាហកម្ម។ អ្នករៀបចំត្រូវតែបង្ហាញសមត្ថភាពក្នុងការអនុវត្តវិធានការណ៍រក្សាគម្លាត ប្រកបដោយសុវត្ថិភាព ដែលរួមមានការកំណត់ដង់ស៊ីតេរបស់អ្នកចូលរួម និងអនុវត្តវិធានការត្រួតពិនិត្យរាល់អ្នកចូលរួម មុននិងក្រោយព្រឹត្តិការណ៍៕
ចែករំលែកព័តមាននេះ