រាជធានីភ្នំពេញ៖ សម្តេចក្រឡាហោម ស ខេង រដ្ឋមន្រ្តីក្រសួងមហាផ្ទៃបានជំរុញអាជ្ញាធរត្រូវយកចិត្តទុកដាក់ក្នុងការទទួលបណ្តឹង ការត្អូញត្អែរ របស់ប្រជាពលរដ្ឋ ដោយប្រើប្រាស់ប្រព័ន្ធសង្គមហ្វេសប៊ុក និងត្រូវតាមដានការចុះផ្សាយអត្ថបទរបស់សារព័ត៌មាននានាផងដែរ ហើយនាំគ្នាដោះស្រាយឲ្យមានប្រសិទ្ធភាព ។
ជាមួយគ្នានេះ សម្តេចក្រឡាហោម បានណែនាំឲ្យអង្គភាពចំណុះឲ្យក្រសួងមហាផ្ទៃ ដូចជាអគ្គនាយកអភិបាលខេត្តជាដើម បង្កើតគណនីហ្វេសប៊ុក ប្រចំាអង្គភាពខ្លួន ដើម្បីទទួលយកមតិយោបល់ និងបណ្តឹងពលរដ្ឋ ដែលបានស្នើឡើងតាមបណ្តាញសង្គមនោះ ។
រដ្ឋមន្រ្តីក្រសួងមហាផ្ទៃបានលើកឡើងបែបនេះ នៅក្នុងឱកាសអញ្ជើញជាអធិបតីក្នុងសិក្ខាសាលាជាតិ ស្ដីពីការពិគ្រោយោបល់លើសេចក្ដីព្រាងឯកសារទស្សនទានសម្រាប់ការរៀបចំកម្មវិធីជាតិសម្រាប់ការអភិវឌ្ឍតាមបែបប្រជាធិបេត្យនៅថ្នាក់ក្រោមជាតិដំណាក់កាលទី២ ឆ្នាំ២០២១ ២០៣០ នាថ្ងៃទី៦ ខែវិច្ឆិកា ឆ្នាំ២០២០ ។
ការលើកឡើង និងជំរុញបែបនេះ របស់ថ្នាក់ដឹកនាំជាន់ខ្ពស់រដ្ឋាភិបាលនៅស្របពេលដែលប្រជាពលរដ្ឋកម្ពុជាមានការនិយមប្រើប្រាស់បណ្តាញសង្គមច្រើន ។ បណ្តាញសង្គមដែលអ្នកនាំមើលសង្គមក៍ទទួលស្គាល់ថា ងាយស្រួលដល់ពលរដ្ឋលើកឡើងពីបញ្ហារបស់ខ្លួនប្រាប់អ្នកដឹកនាំ ជាងការដែលនាំគ្នាយកញ្ញត្តិដាក់ជូនថ្នាក់ដឹកនាំដោយផ្ទាល់ ។ ការជួបថ្នាក់ដឹកនាំ ដើម្បីដាក់ញត្តិ ឬបង្ហាញពីទុក្ខលំបាកបញ្ហារបស់ពលរដ្ឋ ត្រូវបានសង្គមស៊ីវិលបញ្ជាក់ថា មិនមែនជាការងាយស្រួលនោះទេ។
សម្តេចក្រឡាហោម ស ខេង បានបង្កើតក្រុមការងារចំាទទួលបណ្តឹងនិងដោះស្រាយបញ្ហាពលរដ្ឋតាមបណ្តាញ Facebook សម្តេចផ្ទាល់ កាលពីថ្ងៃទី១៥ មិថុនា ឆ្នាំ២០២០ ។ នៅក្នុងឱកាសជំរុញមន្រ្តីក្រោមឱវាទពង្រឹងការដោះស្រាយបញ្ហាពលរដ្ឋ ដោយបង្កើត និងតាមដានបណ្តាញសង្គម និងសារព័ត៌មាននេះ សម្តេចរដ្ឋមន្រ្តីក្រសួងមហាផ្ទៃ បានលើកឡើងថា ប្រជាពលរដ្ឋដែលផ្ញើចូលហ្វេសប៊ុករបស់សម្តេចផ្ទាល់មាន ៩០ % ជាព័ត៌មានពិត៕
ចែករំលែកព័តមាននេះ