ប្រទេសមីយ៉ាន់ម៉ា ៖ ជាទិវាខ្មៅមួយសម្រាប់ប្រទេសមីយ៉ាន់ម៉ា ចាប់តាំងពីរដ្ឋប្រហារយោធាពីថ្ងៃទី១កុម្ភៈមក។ អ.ស.ប អះអាងនាថ្ងៃទី២៨ ខែកុម្ភៈ ឆ្នាំ២០២១នេះថា បានទទួលព័ត៌មានគួរឲ្យជឿជាក់ដែលថា មនុស្សយ៉ាងតិច១៨នាក់បានត្រូវបាត់បង់ជីវិតនាថ្ងៃទី២៨ ខែកុម្ភៈនោះ ក្នុងការបង្ក្រាបយ៉ាងសាហាវលើបាតុកម្ម។ ហើយមនុស្សច្រើននាក់ទៀតរងរបួស និងច្រើនរយនាក់ទៀតត្រូវចាប់ខ្លួន ដោយកងកម្លាំងសន្តិសុខ។
អាជ្ញាធរមីយ៉ាន់ម៉ាបានបង្កើនការប្រើកម្លាំង ដើម្បីបំបែកបាតុកម្ម ជាមួយការប្រើឧស្ម័នបង្ហូរទឹកភ្នែក កាណុងបាញ់ទឹក គ្រាប់កៅស៊ូ និងជួនកាលប្រើគ្រាប់ពិត។ សម្រាប់ពេលនេះទីភ្នាក់ងារព័ត៌មានបារាំង AFP រៀបរាប់ពីអ្នកបាត់បង់ជីវិតថាមាន៨នាក់។
លោកស្រី RAVINA SHAMDASANI អ្នកនាំពាក្យរបស់ស្នងការជាន់ខ្ពស់ អ.ស.ប ខាងសិទ្ធិមនុស្សថ្លែងថា យើងថ្កោលទោសម៉ឺងម៉ាត់ ការបង្ក្រាបបាតុកម្មដោយហិង្សា នៅមីយ៉ាន់ម៉ាហើយយើងអំពាវនាវដល់កងយោធា ឲ្យបញ្ឈប់ជាបន្ទាន់ការប្រើកម្លាំង ប្រឆាំងបាតុកម្មដោយសន្តិវិធី។
យោងតាមលោក NYI NYI អតីតសមាជិកសភា នៃគណបក្សរបស់លោកស្រីអ៊ួងសាន់ស៊ូជីថា នាថ្ងៃទី២៨ កុម្ភៈ បាតុករអាយុ២៣ឆ្នាំម្នាក់បានត្រូវបាត់បង់ជីវិតនៅក្រុងរ៉ង់ហ្គូន។ នៅក្រុងដាវៃភាគខាងត្បូងប្រទេស មនុស្ស៣នាក់បានត្រូវបាត់បង់ជីវិត និង២០នាក់ទៀតរងរបួស។ ជនរងគ្រោះទាំង៣នាក់ត្រូវគ្រាប់កាំភ្លើងពិត ខណៈបណ្ដាអ្នករបួសត្រូវគ្រាប់កៅស៊ូ។ ក្មេងប្រុស២នាក់មានអាយុត្រឹម១៨ឆ្នាំ ក៏បានត្រូវបាត់បង់ជីវិតនៅក្រុងបាហ្គោជិតក្រុងរ៉ង់ហ្គូន។ ចំណែកនៅក្រុងម៉ាន់ដាឡៃ បុរស២នាក់ក៏បានបាត់បង់ជីវិតផងដែរ ដោយតេគ្រាប់កាំភ្លើង។ នេះបើតាមវេជ្ជបណ្ឌិតម្នាក់។
ប្រមុខយោធាឧត្ដមសេនីយ៍ MIN AUNG HLAING បានអះអាងថា អាជ្ញាធរបានប្រើកម្លាំងតិចតួចនៅឡើយប្រឆាំងបាតុកម្ម។ តែពេលនេះគេរាប់ឃើញចំនួនអ្នកបាត់បង់ជីវិត ឡើងដល់១៨នាក់។ មនុស្សច្រើនរយនាក់បានត្រូវចាប់ខ្លួន ក្នុងក្រុងរ៉ង់ហ្គូន ហើយបញ្ជូនទៅកាន់ពន្ធនាគារINSEIN ដែលជាកន្លែងធ្លាប់ឃុំឃាំងសកម្មជនស្និទ្ធប្រជាធិបតេយ្យជាច្រើននាក់ ដែលជាប់ទោសយ៉ាងយូរក្រោមរបបផ្ដាត់ការមុនៗ។
បណ្ដាអ្នកកាសែតក៏ជាគោលដៅនៃការបង្ក្រាប ដោយអ្នកកាសែតម្នាក់ត្រូវវាយធ្វើបាបដោយកងកម្លាំងប៉ូលិស ហើយចាប់ខ្លួននៅក្រុង MYITKYINA ភាគខាងជើងប្រទេស។ អ្នកកាសែតម្នាក់ទៀត រងការបាញ់ដោយគ្រាប់កៅស៊ូនៅភាគកណ្ដាលប្រទេស។ រួចកាលពីថៃ្ងទី២៧កុម្ភៈ អ្នកកាសែតយ៉ាងតិច៣នាក់បានត្រូវចាប់ខ្លួន។
យោងតាមអង្គការសិទ្ធិមនុស្ស HRW ថា មនុស្សជាង៨៥០នាក់បានត្រូវចាប់ខ្លួនចាប់តាំងពីរដ្ឋប្រហារមក។ ការចាប់ខ្លួនមនុស្សត្រូវបានបង្កើន២ថ្ងៃចុងក្រោយនេះ ជាមួយការចាប់ខ្លួនមនុស្សដល់៤៧៩នាក់ នាថ្ងៃទី២៧កុម្ភៈ តែមួយគត់។
ការបង្ក្រាបត្រូវបានថ្កោលទោសយ៉ាងខ្លាំងក្លា ពិសេសពីសំណាក់សហរដ្ឋអាមេរិក និងសហភាពអឹរ៉ុប ដោយទាមទារឲ្យដោះលែងលោកស្រីស៊ូជីជាបន្ទាន់៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ