ខេត្តកំពង់ធំ ៖ ឪពុកឈាមខ្មៅខឹងប្រពន្ធមិនឲ្យយកកូនទៅលេងសាច់ញាតិកាប់កូនស្រី ទើបអាយុ២ឆ្នាំ ឲ្យរបួសធ្ងន់តែម្តង ។ ហេតុការណ៍ដ៏អណោចអធម៌ដែលឪពុកបង្កើតកាប់កូនខ្លួនឯងនេះបានកើតឡើងកាលពីវេលាម៉ោង៣និង១៧នាទីរសៀលថ្ងៃទី១០ ខែឧសភា ឆ្នាំ២០១៨ ស្ថិតនៅក្នុងភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ ។
លោកវរសេនីយ៍ឯក ញ៉ែម ឈុនលី អធិការនគរបាលក្រុងស្ទឹងសែនបានឲ្យដឹងថា ករណីខាងលើនេះបានបង្កឡើងដោយជនសង្ស័យឈ្មោះ តាន់ គឹមសាន ភេទប្រុស អាយុ៣៤ឆ្នាំ ជនជាតិខ្មែរ នៅភូមិត្បូងក្រពើ ឃុំត្បូងក្រពើ ស្រុកសន្ទុក ខេត្តកំពង់ធំ ។ បច្ចុប្បន្នមានមុខរបរធ្វើជាកម្មករនៅឯខេត្តសៀមរាប បើយោងតាមសម្តីរបស់សាច់ញាតិនិយាយថា ជនសង្ស័យមានប្រពន្ធឈ្មោះ ផុន វុទ្ធី អាយុ៣១ឆ្នាំ រស់នៅភូមិឃុំកើតហេតុខាងលើ មុខរបរលក់ដូរ ដោយសារតែការរស់នៅជាមួយគ្នាជាប្តីប្រពន្ធមិនសូវចុះសម្រុងនឹងគ្នា ចេះតែឈ្លោះប្រកែកគ្នានោះរហូតដល់ថ្ងៃទី២០ ខែធ្នូ ឆ្នាំ២០១៧ ពួកគេទាំងពីរនាក់ក៏បានព្រមព្រៀងផ្តិតមេដៃលែងលះគ្នានៅសង្កាត់ព្រៃតាហ៊ូ អស់រយៈពេលប្រហែលកន្លះឆ្នាំមកហើយ ។
កន្លងមកជនសង្ស័យធ្លាប់មកសុំប្រពន្ធយកកូនស្រីរងគ្រោះឈ្មោះ មុន្នី ភ័ក្រ អាយុ២ឆ្នាំ ដើម្បីទៅលេងជាមួយនឹងសាច់ញាតិរបស់ខ្លួនតែត្រូវបានប្រពន្ធដែលបានលែងលះគ្នានោះមិនព្រមឲ្យយកកូនទៅលេងនោះទេ ដែលជាហេតុធ្វើឲ្យជនសង្ស័យមានការខឹងសម្បារយ៉ាងខ្លាំង លុះដល់ថ្ងៃកើតហេតុជនសង្ស័យក៏បានមកផ្ទះប្រពន្ធម្តងទៀត តែប្រពន្ធទៅលក់ដូរបាត់ ឃើញកូននៅតែឯងក៏ចាប់កូនស្រីយកទៅខាងក្រោយផ្ទះ រួចហើយយកកាំបិតចិតត្នោតទៅកាប់កូនស្រីខ្លួនឯង បណ្តាលឱ្យរងរបួសយ៉ាងធ្ងន់ធ្ងរ ដែលត្រូវក្បាលប៉ែកខាងឆ្វេងមួយកាំបិត រយះដល់លលាក្បាល និងចំខាងក្រោម.កផ្នែកខាងក្រោយចំនួន២កាំបិត រយះធំៗ ត្រូវបានបញ្ជូនទៅសង្គ្រោះនៅមន្ទីរពេទ្យខេត្តសៀមរាប ដេរអស់ជាច្រើនថ្នេរ ។
លោកអធិការបន្តថា បន្ទាប់ពីកាប់កូនស្រីរួច ជនសង្ស័យបានរត់ទៅយកថ្នាំបាញ់សម្លាប់ស្មៅមកផឹកសម្លាប់ ខ្លួន តែត្រូវបានសមត្ថកិច្ចចាប់បញ្ជូនទៅសង្គ្រោះនៅមន្ទីរពេទ្យឯកជន នៅពេលដឹងខ្លួនវិញនឹងចាត់ការតាមផ្លូវច្បាប់ ៕
ចែករំលែកព័តមាននេះ