រាជធានីភ្នំពេញ ៖ លោក W. Patrick Murphy ឯកអគ្គរដ្ឋទូតសហអាមេរិកប្រចាំកម្ពុជាបានលើកឡើងថា បរិយាកាសវិនិយោគនៅក្នុងប្រទេសកម្ពុជា នាពេលបច្ចុប្បន្ននេះនឹងអាចទាក់ទាញវិនិយោគិនអាមេរិកចូលមកបណ្ដាក់ទុនវិនិយោគបន្ថែមទៀត ជាពិសេសកិច្ចសហការរវាងវិនិយោគិនអាមេរិក…
រាជធានីភ្នំពេញ ៖ លោក W. Patrick Murphy ឯកអគ្គរដ្ឋទូតសហអាមេរិកប្រចាំកម្ពុជាបានលើកឡើងថា បរិយាកាសវិនិយោគនៅក្នុងប្រទេសកម្ពុជា នាពេលបច្ចុប្បន្ននេះនឹងអាចទាក់ទាញវិនិយោគិនអាមេរិកចូលមកបណ្ដាក់ទុនវិនិយោគបន្ថែមទៀត ជាពិសេសកិច្ចសហការរវាងវិនិយោគិនអាមេរិក និងវិនិយោគិនកម្ពុជា ដែលអាចបង្កើតជាក្រុមហ៊ុនវិនិយោគធំៗនៅក្នុងប្រទេសកម្ពុជា ។
លោក Murphy បានមានប្រសាសន៍បន្តថា តាមរយៈបទពិសោធន៍របស់លោកនៅក្នុងប្រទេសកម្ពុជាប៉ុន្មានឆ្នាំនេះលោកថា បរិយាកាសនៅក្នុងប្រទេសកម្ពុជា គឺមានភាពងាយស្រួលសម្រាប់វិនិយោគិនអាមេរិកចូលមកបណ្ដាក់ទុនវិនិយោគ ។ លោកថា ៖ «ផ្នែកមួយនៃការងាររបស់ខ្ញុំ គឺជួយកែលម្អបរិយាកាសវិនិយោគ ដើម្បីធ្វើយ៉ាងណាឲ្យក្រុមហ៊ុនច្រើនថែមទៀតចូលមកបណ្តាក់ទុននៅទីនេះ ហើយនេះជាអ្វីដែលក្រុមហ៊ុនទាំងនោះចង់ឃើញ ។ គេចង់ឃើញបរិយាកាសមួយដែលគោរពតាមនីតិរដ្ឋ គ្មានអំពើពុករលួយ មានភាពស្មើគ្នា និងមានតម្លាភាព សម្រាប់ក្រុមហ៊ុនអាមេរិក ។ វាកំពុងធ្វើដំណើរក្នុងទិសដៅល្អមួយ តែក៏នៅមានចំណុចដែលត្រូវការកែលម្អផងដែរ» ។
លោកបន្តទៀតថា វិនិយោគិនអាមេរិកដែលចូលមកកម្ពុជាស្វែងរកការវិនិយោគនានា គឺមិនមានការលំបាកពីបញ្ហាភាសានោះទេ ។ បុគ្គលិកកម្មករនៅក្នុងប្រទេសកម្ពុជាមួយចំនួនធំក៏អាចនិយាយភាសាអង់គ្លេសបាន ជាមួយនឹងជំនាញច្បាស់លាស់ ដែលជាកត្តាសម្រួលដល់វិនិយោគិនរបស់យើងក្នុងការចូលមកស្វែងរកការវិនិយោគនិងបណ្ដាក់ទុនវិនិយោគ ។
លោក Gary Freedman វិនិយោគិនអាមេរិកមួយរូបដែលចូលបណ្ដាក់ទុនវិនិយោគនៅក្នុងប្រទេសកម្ពុជា និងបានសហការជាមួយក្រុមហ៊ុនដឹកជញ្ជូនក្នុងស្រុកមួយបានឱ្យដឹងថា ក្រុមហ៊ុនដឹកជញ្ជូនរបស់ខ្លួនដែលមានបទពិសោធន៍ជាង ១០០ ឆ្នាំនៅសហរដ្ឋអាមេរិកបានសំឡឹងមើលឃើញថា វិស័យដឹកជញ្ជូនសាច់ប្រាក់នៅកម្ពុជា គឺមានសក្ដានុពលក្នុងការធ្វើប្រតិបត្តិ ដូច្នេះហើយទើបក្រុមហ៊ុនរបស់លោកបានចូលកម្ពុជា និងបានសហការជាមួយក្រុមហ៊ុនដឹកជញ្ជូនក្នុងស្រុករបស់កម្ពុជា WorldBride Secure Logistics ដើម្បីបង្កើតប្រតិបត្តិការដឹកជញ្ជូនក្រោមស្លាក Brink’s ហើយនឹងផ្ដល់នូវប្រតិបត្តិការដ៏ល្អជូនអតិថិជននៅក្នុងប្រទេសកម្ពុជា ។
លោកឧកញ៉ា សៀ ឬទ្ធី ប្រធានក្រុមប្រឹក្សាភិបាលនៃក្រុមហ៊ុន Worldbridge Group ក៏បានឱ្យដឹងផងដែរថា ក្នុងនាមជាអ្នកវិនិយោគនៅក្នុងប្រទេស លោកពិតជារីករាយនៅពេលមានក្រុមហ៊ុនលំដាប់អន្តរជាតិកាន់តែច្រើនចូលមកក្នុងប្រទេសដើម្បីស្វែងរកឱកាសវិនិយោគ ។ តាមរយៈក្រុមហ៊ុនដែលមានបទពិសោធន៍ធ្វើអាជីវកម្មនិងប្រតិបត្តិការជាង ១០០ ឆ្នាំ វានឹងផ្ដល់ប្រយោជន៍ដល់កម្ពុជានូវបទពិសោធន៍ និងមេរៀនជាច្រើនដល់កម្ពុជា ជាពិសេសជំនាញសម្រាប់ធនធានមនុស្សកម្ពុជា ។ តាមរយៈក្រុមហ៊ុនដែលមានអាយុកាលជាង ១០០ ឆ្នាំ នេះដែរនឹងស្រូបទាញវិនិយោគិនអាមេរិក និងក្រុមហ៊ុនធំៗលំដាប់អន្តរជាតិជាច្រើនទៀតចូលមកក្នុងប្រទេសកម្ពុជាដើម្បីស្វែងរកការវិនិយោគទៅតាមជំនាញរបស់ពួកគេ ។
អ្នកឧកញ៉ាបន្តថា អ្វីដែលកម្ពុជាត្រូវធ្វើនិងត្រៀមលក្ខណៈសម្រាប់ស្វាគមន៍វិនិយោគិនបរទេសដែលនឹងចូលកម្ពុជានៅពេលឆាប់ៗនេះ គឺភាពស្របច្បាប់នៃក្រុមហ៊ុនក្នុងស្រុក ត្រូវជាក្រុមហ៊ុនដែលមានការបញ្ជីបង់ពន្ធជូនរដ្ឋត្រឹមត្រូវ មានបញ្ជីស្នាមក្នុងការធ្វើប្រតិបត្តិការនិងអាជីវកម្មនិងធនធានមនុស្សទៅតាមវិស័យនីមួយៗ ។
បើតាមលោក វង្សី វិស្សុត រដ្ឋមន្ត្រីអមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានឱ្យដឹងផងដែរថា ទោះស្ថិតនៅក្នុងដំណាក់កាលនៃការរីករាលដាលនៃកូវីដ១ ៩ កម្ពុជានៅតែទទួលបានលំហូរវិនិយោគពីប្រទេសជាបន្តបន្ទាប់ ដែលអាចជួយសេដ្ឋកិច្ចកម្ពុជាមិនឱ្យធ្លាក់ក្នុងវិបត្តិធ្ងន់ធ្ងរ ៕
ចែករំលែកព័តមាននេះ