ឥណ្ឌា៖ ទីភ្នាក់ងារជម្ងឺរាតត្បាតឈានមុខគេរបស់ប្រទេសបាននិយាយកាលពីថ្ងៃអង្គារថាប្រជាជនជាង ៦០លាននាក់នៅក្នុងប្រទេសឥណ្ឌា ដែលស្មើនឹង១០ដងនៃចំនួនរាយការណ៍លើក្រដាស អាចឆ្លងវីរុសនេះ។ នេះបើយោងតាមការចុះផ្សាយរបស់ Bangkok Post ។

យោងតាមទិន្នន័យផ្លូវការរបស់ប្រទេសឥណ្ឌា ដែលមានប្រជាជនចំនួន ១.៣ពាន់លាននាក់ គឺជាប្រទេសដែលមានការឆ្លងមេរោគច្រើនជាងគេទី២ លើពិភពលោក និង មានចំនួនជាង ៦.១លានករណី ដែលនៅពីក្រោយសហរដ្ឋអាមេរិក។

ប៉ុន្តែតួលេខពិតប្រាកដអាចខ្ពស់ជាងនេះ បើយោងតាមការស្ទង់មតិចុងក្រោយបំផុត ដែលជាការធ្វើតេស្តឈាមរកអង្គបដិប្រាណមួយចំនួន ដើម្បីប៉ាន់ស្មានសមាមាត្រនៃចំនួនប្រជាជនដែលបានឆ្លងជម្ងឹនេះ។

អគ្គនាយកក្រុមប្រឹក្សាស្រាវជ្រាវវេជ្ជសាស្ត្រ (ICMR) លោក Balram Bhargava បាននិយាយថា «ការសន្និដ្ឋានសំខាន់ពីការស្ទង់មតិនេះ គឺថាមនុស្សម្នាក់ក្នុងចំណោម ១៥នាក់ ដែលមានអាយុលើសពី ១០ឆ្នាំ បានប្រឈមនឹងជម្ងឺកូវីដនៅខែសីហា» ។

លោក Bhargava បាននិយាយថា ភស្ដុតាងនៃការប៉ះពាល់វីរុសគឺមានជាទូទៅក្នុងចំណោមមនុស្ស ដែលត្រូវបានគេធ្វើតេស្តនៅតំបន់អនាធិបតេយ្យក្នុងទីក្រុង (១៥.៦%) និងតំបន់ទីក្រុងដែលមិនមានតំបន់អនាធិបតេយ្យ (៨.២%) ជាងនៅតំបន់ជនបទដែល ៤.៤% នៃអ្នកដែលបានស្ទង់មតិមានអង្គបដិប្រាណ។

ការធ្វើតេស្តឈាមត្រូវបានប្រមូលពីមនុស្សជាង ២៩,០០០នាក់នៅក្នុងរដ្ឋចំនួន ២១ នៅចន្លោះពាក់កណ្តាលខែសីហានិងពាក់កណ្តាលខែកញ្ញា។ តួលេខថ្មីគឺជាការលោតយ៉ាងខ្លាំង ពីលទ្ធផលនៃការស្ទង់មតិដំបូងដែល ICMR បានបង្ហាញថាប្រហែល ០.៧៣% នៃមនុស្សពេញវ័យនៅក្នុងប្រទេសឥណ្ឌា ដែលប្រហែលស្មើនឹង ៦លាននាក់បានឆ្លងមេ រោគនេះនៅខែឧសភា។ ការសិក្សាអំពីអង្គបដិប្រាណផ្សេងទៀត ដែលធ្វើឡើងនៅរដ្ឋធានីញូវដែលីនិងមជ្ឈមណ្ឌលហិរញ្ញវត្ថុក្រុងបុមបៃ ក៏បានលើកឡើងផងដែរថាមានការឆ្លងច្រើនជាងចំនួនផ្លូវការ៕