ស្លូវ៉ាគី ៖ តាមប្រភពព័ត៌មាន CNN បានឱ្យដឹងថា ទីភ្នាក់ងារព័ត៌មានស្លូវ៉ាគី TASR បានរាយការណ៍ថា មនុស្សប្រហែល២.៥៨លាននាក់នៅស្លូវ៉ាគី ត្រូវបានធ្វើតេស្តរកកូវីដនៅថ្ងៃដំបូងនៃការធ្វើតេស្តរកមេរោគឆ្លងទូទាំងប្រទេសនៅថ្ងៃសៅរ៍។
ក្នុងចំណោមអ្នកដែលត្រូវបានធ្វើតេស្តនោះមាន ២៥,៨៥០នាក់ ឬ ប្រមាណ ១% ធ្វើតេស្តវិជ្ជមានសម្រាប់កូវីដ នេះបើយោងតាម TASR។
បន្ទាប់ពីបានឃើញការរីករាលដាលនៃការឆ្លងថ្មីៗនៅទូទាំងស្លូវ៉ាគី នាយករដ្ឋមន្ត្រីលោក Igor Matovic បានប្រកាសកាលពីខែមុន នូវផែនការដើម្បីធ្វើតេស្តមនុស្សគ្រប់រូបដែលមានអាយុចាប់ពី ១០ឆ្នាំឡើងទៅ នៅក្នុងប្រទេសសម្រាប់កូវីដ។
លោកនាយករដ្ឋមន្ត្រី លោក Matovic បាននិយាយថា៖ “ការធ្វើតេស្តរកមេរោគកូវីដ នឹងមិនគិតថ្លៃសម្រាប់ប្រជាជនចំនួន ៥.៤លាននាក់។”
ស្ថានីយ៍ធ្វើតេស្តចំនួន ៥,០០០ ត្រូវបានបង្កើតឡើងសម្រាប់ប្រតិបត្តិការ ហើយបុគ្គលិកសុខាភិបាលរហូតដល់ ២០,០០០នាក់ បានចូលរួមក្នុងការធ្វើតេស្តនេះ។
ប្រទេសស្លូវ៉ាគីបានធ្លាក់ចូលក្នុងភាពអាសន្នជាផ្លូវការនៅថ្ងៃទី១ ខែតុលា នៅពេលអត្រាឆ្លងរបស់វាចាប់ផ្តើមកើនឡើង។ យោងតាម TASR នាយករដ្ឋមន្ត្រីកាលពីថ្ងៃអាទិត្យ បាននិយាយថា ការចាំបាច់ក្នុងការពាក់ម៉ាស់នៅតំបន់សាធារណៈ និងវិធានការផ្សេងទៀតរួមទាំងការហាមឃាត់មិនឱ្យមានការប្រមូលផ្តុំគ្នា នឹងនៅតែមានដដែល ទោះបីជាការធ្វើតេស្តរកកូវីដទូទាំងប្រទេសចប់ក៏ដោយ៕
ចែករំលែកព័តមាននេះ