រាជធានីភ្នំពេញ ៖ មន្ត្រីធនាគារជាតិនៃកម្ពុជាអះអាងថា កាលពីឆ្នាំ២០១៧ ពលរដ្ឋកម្ពុជាម្នាក់ៗបានរក្សាទុកប្រាក់រៀលជាប់ខ្លួន គិតជាមធ្យមចំនួន៥៧ម៉ឺនរៀល ។
លោក ឃូ វុឍ្ឍី អគ្គនាយករងបច្ចេកទេសធនាគារជាតិនៃកម្ពុជា មានប្រសាសន៍កាលពីថ្ងៃទី៣០ មេសា ក្នុងពិធីអបអរសាទរទិវាពលកម្មអន្តរជាតិ១ ឧសភា ថា ៖« ខ្មែរយើងស្ទើរតែបាត់បង់ជំនឿទុកចិត្តទាំងស្រុងទៅលើប្រាក់រៀលនាពេលកន្លងមក តែចាប់ពីឆ្នាំ១៩៩៨មក ពលរដ្ឋកម្ពុជាចាប់ផ្តើមមានជំនឿទុកចិត្ត ដោយទុកប្រាក់រៀលជាប់ខ្លួនបានកើនឡើងបន្តិចម្តងៗ» ។
លោកអគ្គនាយករងលើកឡើងថា ៖«មានសូចនាករមួយបង្ហាញអំពីជំនឿទុកចិត្តជាបន្តបន្ទាប់ យើងអាចមើលទៅលើចំនួនមនុស្សម្នាក់ៗគិតជាមធ្យម កាលក្នុងឆ្នាំ១៩៩៨ ការរក្សាលុយជាប់ខ្លួនមានត្រឹមតែ៤ម៉ឺនរៀល បានបន្តកើនឡើងដល់១៧ម៉ឺនរៀលក្នុងឆ្នាំ២០០៨ និង៥៧ម៉ឺនរៀលនៅឆ្នាំ២០១៧ ។ អីចឹង កំណើនកើនឡើងពី៤ម៉ឺនរៀលរហូតដល់៥៧ម៉ឺនរៀលក្នុងឆ្នាំ២០១៧កន្លងមកនេះ គឺស្ដារឡើងវិញដោយការលំបាក និងប្រើរយៈពេលយូរ ទម្រាំធ្វើឲ្យប្រជាពលរដ្ឋងាកមកប្រើ និងមានជំនឿទុកចិត្តទៅលើប្រាក់រៀល » ។
នាយកប្រតិបត្តិនៃសមាគមមីក្រូហិរញ្ញវត្ថុ យល់ឃើញថា ការលើកឡើងរបស់មន្ត្រីធនាគារជាតិនៃកម្ពុជាខាងលើនេះ គឺមានភាពប្រាកដប្រជាច្រើន ផ្អែកតាមនិន្នាការ និងការជំរុញការប្រើប្រាស់ប្រាក់រៀល ។
លោក យុន សុវណ្ណា នាយកប្រតិបត្តិនៃសមាគមមីក្រូហិរញ្ញវត្ថុកម្ពុជា មានប្រសាសន៍កាលពីថ្ងៃទី៣ ឧសភា ម្សិលមិញថា ៖« ខ្ញុំគិតថា ការវាយតម្លៃនេះមានភាពប្រាកដប្រជាច្រើន។ ឥឡូវនេះ យើងមើលឃើញថា មិនមែនមានតែនិន្នាការស្នេហាជាតិ ស្រឡាញ់ប្រាក់រៀល និងប្រើប្រាស់តែមួយមុខនោះទេ សូម្បីតែអាជីវករផ្សេងៗ ពួកគាត់ក៏ចូលរួមជំរុញការប្រើប្រាស់ប្រាក់រៀលដែរ ។ អីចឹង យើងឃើញថា និន្នាការ និងការប្រើប្រាស់ប្រាក់រៀលវាកើនឡើង បើប្រៀបធៀបនឹងប៉ុន្មានឆ្នាំមុន » ។
លោក គា បូរាណ ប្រធានក្រុមប្រឹក្សាភិបាលសមា គមមីក្រូហិរញ្ញវត្ថុ ធ្លាប់មានប្រសាសន៍ថា ៖« បន្ទាប់ពីធនាគារជាតិជំរុញឱ្យមានការប្រើប្រាស់ប្រាក់រៀលកន្លងមក យើងសង្កេតឃើញថា ប្រជាជនយើងប្រើប្រាស់ប្រាក់រៀលច្រើនជាងមុន សូម្បីតែប្រាក់សន្សំដែលខាងអេអឹមខេ ទទួលបាន ក៏កើនឡើងជាប្រាក់រៀលច្រើនដែរ ពិសេសប្រជាជនដែលគាត់មានចំណូលទាប គាត់ត្រូវការប្រាក់រៀលច្រើនជាងប្រាក់ដុល្លារ » ។
លោកលើកឡើងថា ដើម្បីជំរុញឱ្យមានការប្រើប្រាស់ប្រាក់រៀលកាន់តែច្រើន ស្ថាប័នពាក់ព័ន្ធត្រូវព្យាយាមពន្យល់ដល់ប្រជាពលរដ្ឋទូទៅ។ លើសពីនេះ ត្រូវចូលរួមបង្កើតផលិតផលឬសេវាកម្ម ដែលផ្តល់អត្រាការប្រាក់ខ្ពស់ នៅពេលមានការដាក់សន្សំជាលុយរៀល ធ្វើឱ្យប្រជាពលរដ្ឋមើលឃើញផលចំណេញច្រើនជាងការដាក់សន្សំលុយដុល្លារ ពី៣ទៅ៤% ក្នុងទំហំទឹកប្រាក់ដូចគ្នា ។
លោកជំទាវ ជា សិរី អគ្គនាយកបច្ចេកទេសនៃធនាគារជាតិនៃកម្ពុជា មានប្រសាសន៍ថា ៖«យើងសង្កេតឃើញថា ការប្រើប្រាស់ប្រាក់រៀលនៅក្នុងចរន្តសេដ្ឋកិច្ចមានការកើនឡើងជាលំដាប់ ។ កំណើននេះក៏ជាមោទនភាពមួយដែររបស់ធនាគារជាតិនៃកម្ពុជា ហើយយើងក៏កំពុងសហការជាមួយស្ថាប័នទាំងអស់ ពិសេសពីវិស័យឯកជន ឱ្យគាត់ចូលរួមប្រើប្រាស់ប្រាក់រៀល » ។
លោកជំទាវគូសបញ្ជាក់ថា ៖« តាមការអង្កេតរបស់យើង ការប្រើប្រាស់ប្រាក់រៀលច្រើនជាងគេ គឺនៅតាមជនបទ ដែលជាភូមិភាគកណ្តាល គឺខេត្តមិនជាប់ព្រំប្រទល់ជាមួយប្រទេសជិតខាង ដូចជា ខេត្តកំពង់ធំ, កំពង់ចាម, បាត់ដំបង និងខេត្តជាតំបន់ទេសចរណ៍ ជាទូទៅ ការប្រើប្រាស់ប្រាក់រៀលច្រើនជាងគេ » ៕
ចែករំលែកព័តមាននេះ