រាជធានីភ្នំពេញ ៖ ជាឱកាសមួយទៀតសម្រាប់អ្នកស្វែងរកការងារ គឺមានកន្លែងការងាររហូតដល់ជាង២ម៉ឺនកន្លែងកំពុងរងចាំ តាមរយៈពិព័រណ៍ការងារ និងផលិតភាពជាតិឆ្នាំ២០១៩។ តាមសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈចេញផ្សាយ កាលពីពេលថ្មីៗនេះបានឲ្យដឹងថា នៅមិនដល់មួយខែទៀតទេមហាព្រឹត្តិការណ៍ការងារដ៏ធំប្រចាំឆ្នាំ…
រាជធានីភ្នំពេញ ៖ ជាឱកាសមួយទៀតសម្រាប់អ្នកស្វែងរកការងារ គឺមានកន្លែងការងាររហូតដល់ជាង២ម៉ឺនកន្លែងកំពុងរងចាំ តាមរយៈពិព័រណ៍ការងារ និងផលិតភាពជាតិឆ្នាំ២០១៩។ តាមសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈចេញផ្សាយ កាលពីពេលថ្មីៗនេះបានឲ្យដឹងថា នៅមិនដល់មួយខែទៀតទេមហាព្រឹត្តិការណ៍ការងារដ៏ធំប្រចាំឆ្នាំ គឺ៖ «ពិព័រណ៍ការងារ និងផលិតភាពជាតិឆ្នាំ២០១៩» នឹងត្រូវបានរៀបចំឡើងជាទីកន្លែងជួបជុំគ្នាដោយងាយស្រួលសម្រាប់និយោជក អ្នកផ្តល់ការអប់រំបណ្តុះបណ្តាលអ្នកស្វែងរកការងារធ្វើ និងកម្មករនិយោជិតក្នុងការទទួលបានឱកាសការងារ ជ្រើសរើសបុគ្គលិក និងចែករំលែកព័ត៌មានទីផ្សារការងារ ។
បន្ថែមលើនេះព្រឹត្តិការណ៍ពិព័រណ៍នឹងនាំមកនូវសិក្ខាសាលាផលិតភាពជាតិក្រោមប្រធានបទ ៖«យុទ្ធសាស្ត្រផលិតភាពសម្រាប់កម្ពុជា-ការត្រួសត្រាយផ្លូវសម្រាប់ការប្រកួតប្រជែងជាសកល» ដែលនឹងចែករំលែកបទពិសោធន៍ដោយវាគ្មិនជាតិ និងអន្តរជាតិល្បីៗស្របពេលនឹងព្រឹត្តិការណ៍ពិព័រណ៍នេះផងដែរ។
ពិព័រណ៍នេះត្រូវបានរៀបចំដោយក្រសួងការងារ និងបណ្តុះបណ្តាលវិជ្ជាជីវៈក្រោមកិច្ចសហការជាមួយសហភាពសហព័ន្ធយុវជនកម្ពុជារាជធានីភ្នំពេញ និងសមាគមរោងចក្រកាត់ដេរនៅកម្ពុជាមានរយៈពេលពីរថ្ងៃ គឺថ្ងៃសៅរ៍-អាទិត្យទី០២-០៣ ខែវិច្ឆិកា ឆ្នាំ២០១៩ ចាប់ពីម៉ោង៨ ព្រឹកដល់៨យប់នៅអគារពាណិជ្ជកម្ម និងពិព័រណ៍កោះពេជ្រ ។
ចំពោះអ្នកដែលចូលរួមក្នុងពិព័រណ៍នេះទទួលបាននូវអត្ថប្រយោជន៍រួមមានជួបស្ថាប័ន ក្រុមហ៊ុន សហគ្រាសធំៗ150 ។ ដាក់ពាក្យសម្ភាសផ្ទាល់រកការងារគ្រប់ប្រភេទជាង20,000កន្លែង ។ ជ្រើសរើសបុគ្គលិកផ្ទាល់ពីចំណោមអ្នកស្វែងរកការងារជាង30,000 នាក់ ។ ទទួលការណែនាំអាជីពបទពិសោធន៍ និងជំនាញទីផ្សារការងារកំពុងត្រូវការ ។ ទទួលបានគំនិតជំនាញចំណេះដឹង និងបទពិសោធន៍សម្រាប់លើកកម្ពស់ផលិតភាពពីវាគ្មិនជាតិ និងអន្តរជាតិល្បីៗក្នុងសិក្ខាសាលារយៈពេលពីរថ្ងៃនេះ ។
ក្រសួងបានឲ្យដឹងថា ដើម្បីទទួលបានឱកាសការងារ និងការយល់ដឹងអំពីការបង្កើនផលិត ភាពសូមយុវជន សិស្ស-និស្សិត អ្នកស្វែងរកការងារធ្វើ និងកម្មករនិយោជិតទាំងអស់ចូលរួមទស្សនាឲ្យបានច្រើនកុះករ និងកុំភ្លេចយកប្រវត្តិរូបសង្ខេប (CV) មកជាមួយ ដើម្បីដាក់ពាក្យស្នើសុំការងារដោយផ្ទាល់ជាមួយនិយោជក ដែលកំពុងត្រូវការជ្រើសរើសកម្លាំងពលកម្ម ៕ កែសម្រួលដោយ ៖ សុឃាក់
ចែករំលែកព័តមាននេះ