ខេត្តព្រះវិហារ ៖ តាមការសង្កេតនិងការបញ្ជាក់ពីអាជ្ញាធរខេត្ដព្រះវិហារ បានឱ្យដឹងថា ក្នុងឱកាសបុណ្យចូលឆ្នាំថ្មីប្រពៃណីជាតិឆ្នាំ២០១២នេះភ្ញៀវទេសចរជាតិ និងអន្ដរជាតិជាច្រើនបានចូលមកទស្សនាកម្សាន្តតាមតំបន់រមណីយដ្ឋានទេសចរណ៍វប្បធម៌ និងធម្មជាតិនៅក្នុងខេត្ដព្រះវិហារមានការកើនឡើងខុសប្លែកពីបណ្ដាឆ្នាំកន្លង
ខេត្តព្រះវិហារ ៖ តាមការសង្កេតនិងការបញ្ជាក់ពីអាជ្ញាធរខេត្ដព្រះវិហារ បានឱ្យដឹងថា ក្នុងឱកាសបុណ្យចូលឆ្នាំថ្មីប្រពៃណីជាតិឆ្នាំ២០១២នេះភ្ញៀវទេសចរជាតិ និងអន្ដរជាតិជាច្រើនបានចូលមកទស្សនាកម្សាន្តតាមតំបន់រមណីយដ្ឋានទេសចរណ៍វប្បធម៌ និងធម្មជាតិនៅក្នុងខេត្ដព្រះវិហារមានការកើនឡើងខុសប្លែកពីបណ្ដាឆ្នាំកន្លងទៅ ។
លោកអ៊ុំ ម៉ារ៉ា អភិបាលខេត្ដព្រះវិហារ បានមានប្រសាសន៍ឱ្យដឹងដែរថា ក្នុងឱកាសបុណ្យចូលឆ្នាំថ្មីប្រពៃណីជាតិឆ្នាំ២០១២នេះ មានភ្ញៀវទេសចរជាតិ និងអន្ដរជាតិយ៉ាងច្រើនសន្ធឹកសន្ធាប់បានចូលមកទស្សនាកម្សាន្តតាមរមណីយដ្ឋានទេសចរណ៍វប្បធម៌ និងធម្មជាតិនៅក្នុងខេត្ដខុសប្លែកពីបណ្ដាឆ្នាំកន្លងទៅ ។ កំណើនភ្ញៀវទេសចរនេះក៏អាស្រ័យដោយនយោបាយឈ្នះ=ឈ្នះរបស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ដែលបានធ្វើឱ្យស្ថានការណ៍ព្រំដែនវិលមករកសភាពស្ងប់ស្ងាត់ឡើងវិញ ។ លោកអភិបាលខេត្ដក៏បានបញ្ជាក់ឱ្យដឹងដែរថា ភ្ញៀវទេសចរបានចូលមកកម្សាន្តក្នុងរមណីយដ្ឋានធំៗចំនួន៤ក្នុងខេត្ដ ក្នុងនោះមានរមណីយដ្ឋានទេសចរណ៍វប្បធម៌ប្រាសាទព្រះវិហារចំនួន១១.៥៤៩នាក់ ភ្ញៀវអន្ដរជាតិចំនួន៨១នាក់ ប្រាសាទកោះកេរ្តិ៍៣៥៤០នាក់ ភ្ញៀវអន្ដរជាតិ៨៦នាក់ ប្រាសាទព្រះខ័ន ២.២៥០នាក់ ភ្ញៀវអន្ដរជាតិ៤នាក់ និងរមណីយដ្ឋានទេសចរណ៍ទឹកធ្លាក់ធម្មជាតិព្រះ និមិ្មត ក្នុងទន្លេមេគង្គលើជាប់ព្រំប្រទល់ប្រទេសឡាវ ១០.៩៦៧នាក់ ភ្ញៀវអន្ដរជាតិម្នាក់ ។
រមណីយដ្ឋានទាំង៤ខាងលើនេះមានភ្ញៀវទេសចរទៅកម្សាន្តក្នុងរយៈពេលបីថ្ងៃក្នុង ឱកាសបុណ្យចូលឆ្នាំថ្មីកន្លងទៅនេះសរុបចំនួន២៨.៣០៦នាក់ ក្នុងនោះភ្ញៀវអន្ដរជាតិចំនួន១៧២នាក់ ។ យោងតាមតួលេខខាងលើនេះ លោក អភិបាលខេត្ដបានបញ្ជាក់ឱ្យដឹងទៀតថា ភ្ញៀវទេសចរដែលបានចូលមកកម្សាន្តក្នុងខេត្ដព្រះវិហារឆ្នាំនេះមានការកើនឡើងគួរឱ្យកត់សម្គាល់ ។
ដោយឡែកចំពោះអាជ្ញាធរខេត្ដព្រះវិហារក្នុងឱកាសបុណ្យចូលឆ្នាំត្រូវនឹងថ្ងៃទី១៣ មេសា ឆ្នាំ២០១២កន្លងទៅ បាននាំយកអំណោយជាសាច់គោចំនួន២៣ក្បាលទៅចែកជូនកងទ័ពដែលកំពុងប្រចាំការនៅជួរមុខទិសទី១ប្រាសាទព្រះវិហារចំនួន២៣អង្គភាព និងប្រគល់ថវិកាជូនដល់អង្គភាពទាំង២៣ ក្នុង១អង្គភាព៥០ម៉ឺនរៀល ។ ក្រៅពីនេះក្នុងរយៈពេលបីថ្ងៃក្នុងឱកាសបុណ្យចូលឆ្នាំថ្មីនេះដែរក៏មានរៀបចំធ្វើពិធីរាំកម្សាន្ត និងលេងល្បែងប្រជាប្រិយនៅគ្រប់បណ្តាមូលដ្ឋានក្នុងខេត្តផងដែរ ។ ចំពោះបញ្ហាសន្ដិសុខនិងសណ្ដាប់ធ្នាប់គ្រោះថ្នាក់ចរាចរណ៍កើតមានចំនួន៩ករណី បណ្ដាលឱ្យស្លាប់ម្នាក់ របួសធ្ងន់១០នាក់ ស្រាល១៧នាក់ និងបទល្មើសផ្សេងៗកើតមាន៦ករណី ក្នុងនោះអំពើហិង្សា៥ ករណីរងគ្រោះធ្លាក់ពីលើផ្ទះម្នាក់ ។
ចំពោះភ្ញៀវទេសចរបានបញ្ជាក់ឱ្យដឹងដែរថា ពួកគាត់មានចិត្តរីករាយខ្លាំងណាស់ដែលបានមកដល់រមណីយដ្ឋានទាំងនេះដោយសារតែរាជរដ្ឋាភិបាលកម្ពុជាបានស្ថាបនាផ្លូវក្រាលកៅស៊ូយ៉ាងល្អតភ្ជាប់ពីខេត្ដកំពង់ធំនិងបណ្ដាខេត្ដដែលមានព្រំប្រទល់ជាប់ជាមួយខេត្ដព្រះវិហារ ក្នុងនោះមានដូចជាខេត្ដសៀមរាបបានស្ថាបនាផ្លូវគមនាគមន៍ភ្ជាប់មកកាន់ខេត្ដព្រះវិហារបានរួចរាល់ជាស្ថាពរ និងពេលនេះកំពុងដំណើរការស្ថាបនាផ្លូវពីខេត្ដស្ទឹងត្រែងទៅកាន់ខេត្ដព្រះវិហារទៀតផងដែរ ។ ដ្បិតតែពេលនេះមិនទាន់បានរួចរាល់ជាស្ថាពរក៏ពិតមែន តែអាចធ្វើដំណើរចេញចូលពីខេត្ដព្រះវិហារ និងខេត្ដស្ទឹងត្រែង បានដោយសុវត្ថិភាព ទើបពេលនេះពួកគាត់អាចធ្វើដំណើរទៅកម្សាន្តក្នុងខេត្ដព្រះវិហារបានយ៉ាងស្រួល ។
តាមការបញ្ជាក់ឱ្យដឹងពីអាជ្ញាធរប្រាសាទព្រះវិហារថា ភ្ញៀវទេសចរដែលបានចូលមកកម្សាន្តនៅរមណីយដ្ឋានទេសចរណ៍វប្បធម៌ប្រាសាទព្រះវិហារឆ្នាំនេះមានការកើនឡើងជាងបណ្តាឆ្នាំមុនៗ ហើយអាជ្ញាធរព្រះវិហារបានរំពឹងទុកថា នៅឆ្នាំខាងមុខភ្ញៀវទេសចរនឹងមានកំណើនច្រើនជាងនេះទៀតមិនខាន ៕
ចែករំលែកព័តមាននេះ