ខេត្តស្វាយរៀង ៖ លោកតូច ប៉ូលីវ៉ា អភិបាលរងខេត្ត និងជាប្រធានគណៈកម្មាធិការប្រយុទ្ធប្រឆាំងឱសថក្លែងក្លាយ និងសេវាសុខាភិបាលខុសច្បាប់ខេត្ត តំណាងលោកម៉ែន វិបុល អភិបាលខេត្ត…
ខេត្តស្វាយរៀង ៖ លោកតូច ប៉ូលីវ៉ា អភិបាលរងខេត្ត និងជាប្រធានគណៈកម្មាធិការប្រយុទ្ធប្រឆាំងឱសថក្លែងក្លាយ និងសេវាសុខាភិបាលខុសច្បាប់ខេត្ត តំណាងលោកម៉ែន វិបុល អភិបាលខេត្ត បានមានប្រសាសន៍ថា ដើម្បីលុបបំបាត់ឱសថក្លែងក្លាយ និងផ្តល់សេវាសុខាភិបាលខុសច្បាប់ត្រូវមានវិធានការចុះបង្ក្រាបអ្នកលក់ឱសថក្លែងក្លាយ និងអ្នកប្រកបមុខរបរដើរចាក់ថ្នាំតាមផ្ទះឲ្យមានប្រសិទ្ធិភាព ជាពិសេសត្រូវពង្រឹងដល់មន្ត្រីបម្រើការងារសុខាភិបាលរបស់រដ្ឋផ្តល់សេវាជូនប្រជាពលរដ្ឋឲ្យបានល្អប្រសើរប្រកបដោយវិជ្ជាជីវៈ និងមានក្រមសីលធម៌ជាទំនុកចិត្តដល់ប្រជាពលរដ្ឋមិនមានការរើសអើង។
លោកតូច ប៉ូលីវ៉ា មានប្រសាសន៍បែបនេះក្នុងពេលលោកអញ្ជើញចូលរួមជាអធិបតីក្នុងកិច្ចប្រជុំត្រួតពិនិត្យការងារប្រចាំឆមាសទី១ និងដាក់ទិសដៅបន្តលើការងារលុបបំបាត់ឱសថក្លែងក្លាយនិងសេវាសុខាភិបាលខុសច្បាប់ដើម្បីកាត់បន្ថយភាពក្រីក្រ និងមានការចូលរួមពីលោកស្រីព្រះរាជអាជ្ញារងអមសាលាដំបូងខេត្ត លោកប្រធានមន្ទីរសុខាភិបាលខេត្ត លោកអនុប្រធានមន្ទីរសុខាភិបាលតំណាងស្នងការដ្ឋាននគរបាលខេត្ត លោកប្រធានអនុ គណៈកម្មការទាំង៨ស្រុក-ក្រុង តំណាងទីចាត់ការអន្តរវិស័យ លោកប្រធានលេខាធិការដ្ឋានប្រយុទ្ធប្រឆាំងឱសថក្លែងក្លាយ លោក លោកស្រីប្រធានមន្ទីរនានា លោក លោកស្រី ប្រធាន អនុប្រធានការិយាល័យនៃមន្ទីរសុខាភិបាលខេត្ត។
កិច្ចប្រជុំខាងលើនេះបានធ្វើឡើងកាលពីព្រឹកថ្ងៃទី៣ មិថុនា ២០១៩ នៅសាលប្រជុំមន្ទីរសុខាភិបាលខេត្តស្វាយរៀង ហើយក្នុងកិច្ចប្រជុំក៏ផ្តោតទៅលើករណីអ្នកដើរចាក់ថ្នាំឈ្មោះ ព្រាប សេ រស់នៅឃុំសំឡី ស្រុកកំពង់រោទិ៍ដែលបានចាក់ថ្នាំបណ្តាលអោយប្រជាពលរដ្ឋម្នាក់ស្លាប់នាពេលកន្លងមកផងដែរ។
នៅក្នុងកិច្ចប្រជុំបានដាក់វិធានការច្បាប់ និងនីតិវិធីច្បាប់ដើម្បីទប់ស្កាត់ចំពោះអ្នកបន្តប្រកបរបរដើរចាក់ថ្នាំខុសច្បាប់ នឹងបញ្ជូនទៅស្ថាប័នតុលាការ, បិទបង្ហាញឈ្មោះអ្នកដើរប្រកបរបរចាក់ថ្នាំខុសច្បាប់នៅមុខសាលាឃុំ សង្កាត់ ដើម្បីអោយប្រជាពលរដ្ឋបានដឹង និងស្គាល់ កុំអោយប្រជាពលរដ្ឋទៅរកសេវាខុសច្បាប់បន្តទៀត។
ស្រាវជ្រាវប្រភពថ្នាំពេទ្យដែលក្រុមអ្នកប្រកបរបរដើរចាក់ថ្នាំខុសច្បាប់យកមកប្រើដើម្បីមានវិធានការទប់ស្កាត់កន្លែងលក់ឱសថទាំងនោះ ពង្រឹងសមត្ថភាពនិងការផ្ដល់សេវានៅតាមមណ្ឌលសុខភាពនិងមន្ទីរពេទ្យបង្អែកបែងចែកកាលវិភាគវេនយាមរបស់បុគ្គលិកអោយបានច្បាស់លាស់ដើម្បីផ្តល់សេវាប្រកបដោយគុណភាពក្រមសីលធម៌វិជ្ជាជីវៈជូនដល់ប្រជាពលរដ្ឋ។
ធ្វើផែនការផ្សព្វផ្សាយអប់រំអំពីការលុបបំបាត់ឱសថក្លែងក្លាយនិងសេវាសុខាភិបាលខុសច្បាប់ ដល់អនុគណៈកម្មការ ក្រុង-ស្រុកទាំង៨ និងរៀបចំកិច្ចប្រជុំត្រួតពិនិត្យការងាររបស់គណៈកម្មការក្នុង១ឆ្នាំយ៉ាងតិច៤ដង ដើម្បីដោះស្រាយបញ្ហាប្រឈមនិងដាក់ទិសដៅអនុវត្តបន្ត។
ជំរុញអោយបុគ្គលិកសុខាភិបាលរបស់រដ្ឋនិងអ្នកប្រកបរបរវីជ្ជាជីវៈសុខាភិបាលត្រូវចុះបញ្ជីគណៈវិជ្ជាជីវៈសុខាភិបាលអោយបានគ្រប់ៗគ្នា។
សូមអោយអ្នកពាក់ព័ន្ធទាំងអស់ចូលរួមសហការក្នុងការលុបបំបាត់ឱសថក្លែងក្លាយនិងសេវាសុខាភិបាលខុសច្បាប់ ជាពិសេសស្ថាប័នតុលាការ សាលាដំបូងខេត្តស្វាយរៀងនិងអយ្យការអមសាលាដំបូងខេត្តស្វាយរៀង៕
ចែករំលែកព័តមាននេះ