តាមការពិសោធន៍កន្លងមក យុវនារីខ្លះមានការលំបាកខ្លាំងណាស់ក្នុងការចាប់រៀនវិជ្ជាជីវ:ណាមួយសម្រាប់ធ្វើជាមុខរបរប្រចាំជីវិត។ ខ្ញុំធ្លាប់បានឃើញកូនស្រីនៅតាមមណ្ឌលស្តារសម្បទាមួយចំនួន បែកញើសជោកខ្លួននៅក្នុងពេលរៀនកាត់ដេរ ព្រោះមិនចេះធ្វើលេខបូក លេខសងគូសព្រាងរាងសំពត់អាវលើក្រដាសមិនចេញនឹងគេ ។
កូនស្រីខ្លះទៀតរៀនជំនាញកែសម្ផស្ស ដូចជាអ៊ុតសក់និងផាត់មុខជាដើម ក៏ប៉ុន្តែមិនចេះច្នៃប្រឌិត មិនដឹងថាត្រូវធ្វើម៉ូដសក់របៀបណាចំពោះទម្រង់មុខណាទេ។ ម៉្លោះហើយអ្នកខ្លះរៀនយូរៗណាស់ទម្រាំតែបានចេះ ។ ប៉ុន្តែមានជំនាញមួយដែលសាមញ្ញ ដែលយុវនារីទាំងឡាយអាចរៀនសូត្របានយ៉ាងស្រួល គឺមុខជំនាញកាត់និងផាត់ក្រចក ដែលគេអាចរៀនចេះបានយ៉ាងឆាប់រហ័ស ។ កម្មវិធីបណ្តុះបណ្តាលវិជ្ជាជីវ:តាមមណ្ឌលស្តារសម្បទាជាច្រើន ទទួលបានជោគជ័យលើមុខវិជ្ជានេះ ។ ម្យ៉ាងទៀត គេក៏មិនត្រូវការឧបករណ៍ឬសម្ភារអ្វីធំដុំដែរ ដើម្បីប្រកបមុខរបរនេះ គឺគ្រាន់តែមានកន្ត្រៃកាត់ក្រចកមួយចំនួន និងថ្នាំលាបក្រចកប៉ុន្មានដបតែប៉ុណ្ណោះគ្រប់គ្រាន់ហើយ ។ ក្នុងការប្រកបមុខរបរនេះទៀតសោត ក៏គេមិនត្រូវការទីកន្លែងអ្វីធំទេ ។
បើធ្វើនៅនឹងកន្លែង គ្រាន់តែមានកូនទូតូចមួយសម្រាប់ដាក់ថ្នាំក្រចកគឺបានហើយ ។ បើពុំនោះទេគេអាចដើរធ្វើក្រចកចល័តក៏បានដោយដាក់ប្រដាប់ប្រដានៅក្នុងកូនកន្ត្រកតូចមួយតែប៉ុណ្ណោះ ៕
ចែករំលែកព័តមាននេះ