រាជធានីភ្នំពេញ ៖ គណៈបញ្ជាការឯកភាពរាជធានីភ្នំពេញបានបើកកិច្ចប្រជុំនាព្រឹកថ្ងៃទី៤ មេសា នេះដើម្បីដាក់ចេញវិធានការជាក់ស្ដែងក្នុងការរក្សាសន្តិសុខសណ្តាប់ធ្នាប់ របៀបរៀបរយសាធារណៈ ការលើកកំពស់សោភ័ណ្ឌភាព និងបរិស្ថាន ក៏ដូចជាការបង្កលក្ខណៈសប្បាយរីករាយជូនប្រជាពលរដ្ឋក្នុងរាជធានីភ្នំពេញក្នុងឱកាសបុណ្យចូលឆ្នាំថ្មីប្រពៃណីជាតិនាពេលខាងមុខនេះ។ លោក…
រាជធានីភ្នំពេញ ៖ គណៈបញ្ជាការឯកភាពរាជធានីភ្នំពេញបានបើកកិច្ចប្រជុំនាព្រឹកថ្ងៃទី៤ មេសា នេះដើម្បីដាក់ចេញវិធានការជាក់ស្ដែងក្នុងការរក្សាសន្តិសុខសណ្តាប់ធ្នាប់ របៀបរៀបរយសាធារណៈ ការលើកកំពស់សោភ័ណ្ឌភាព និងបរិស្ថាន ក៏ដូចជាការបង្កលក្ខណៈសប្បាយរីករាយជូនប្រជាពលរដ្ឋក្នុងរាជធានីភ្នំពេញក្នុងឱកាសបុណ្យចូលឆ្នាំថ្មីប្រពៃណីជាតិនាពេលខាងមុខនេះ។
លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញបានក្រើនរំលឹកដល់អាជ្ញាធរខណ្ឌ-សង្កាត់ទាំងអស់ក្នុងរាជធានីភ្នំពេញ ក៏ដូចអង្គភាពស្ថាប័ននានាត្រូវត្រៀមលក្ខណៈឲ្យបានល្អប្រសើរទាំងការរក្សាសន្តិសុខ សណ្តាប់ធ្នាប់ អនាម័យបរិស្ថាន ការបំផុសឲ្យប្រជាពលរដ្ឋសំអាតផ្ទះសំបែង ការតុបតែងលំអរភ្លើងចំរុះពណ៌ ការដោតទង់ជាតិតាមស្ថាប័ន ឬតាមផ្ទះ ការដាក់តាំងព្រះឆាយាលក្ខ័ណ៍ព្រះករុណា ព្រះមហាក្សត្រ និងត្រូវបង្កលក្ខណៈងាយស្រួលជូនប្រជាពលរដ្ឋបានរីករាយកំសាន្តតាមទីសាធារណៈ វត្តអារាម និងរមណីដ្ឋាននានាឲ្យមានលក្ខណៈអធិកអធមក្នុងរាជធានីភ្នំពេញ។
លោកអភិបាលរាជធានីក៏បានណែនាំឲ្យមានការយកចិត្តទុកដាក់ពីគ្រោះអគ្គីភ័យដែលអាចកើតមានឡើងជាយថាហេតុ ហើយមន្ត្រីខណ្ឌ អង្គភាព ទាំងអស់ត្រូវដាក់វេនប្រចាំការ២៤ម៉ោងលើ២៤ម៉ោងក្នុងឧិកាសបុណ្យចូលឆ្នាំថ្មី៣ថ្ងៃខាងមុខនេះ។
ជាមួយគ្នានេះបញ្ហាសំរាមក៏ជាការកង្វល់មួយសំរាប់អាជ្ញាធរក្រុងភ្នំពេញដែលត្រូវបានយកចិត្តទុកដាក់រៀបចំយន្តការឲ្យបានច្បាស់លាស់ថែមទៀតដើម្បីប្រមូល និងដឹកសំរាមចេញក្រៅក្រុងឲ្យបានទាន់ពេលវេលា ពិសេសក្នុងឱកាសបុណ្យចូលឆ្នាំថ្មីរយៈពេល៣ថ្ងៃនេះ។
រដ្ឋបាលរាជធានីភ្នំពេញ ក៏បានជូនដំណឹងពីការរៀបចំឲ្យមានវត្តភ្នំសង្ក្រាន្តនៅរមណីដ្ឋានប្រវត្តិសាស្ត្រវត្តភ្នំក្នុងអំឡុងពេលពិធីបុណ្យចូលឆ្នាំថ្មីប្រពៃណីជាតិនេះដែរដើម្បីផ្តល់ឧិកាសសប្បាយរីករាយដល់ប្រជាពលរដ្ឋមកលេងកំសាន្តសប្បាយផងដែរ៕
ចែករំលែកព័តមាននេះ