ខេត្តប៉ៃលិន ៖ ប្តីប្រពន្ធមួយគូមានការឈ្លោះប្រកែកគ្នាព្រឹកល្ងាចៗឡើងស៊ាំក្លាយទៅជាតម្លាប់មិនអី ស្រាប់តែនៅយប់មុនថ្ងៃកើតហេតុប្រពន្ធទ្រាំមិនបាននាងនិយាយពាក្យថា «សុំលះលែងចែកផ្លូវគ្នាដើរ» ធ្វើឱ្យបុរសជាប្តីតូចចិត្តនឹងខ្លួនឯង ក៏រត់ទៅចងក.ធ្វើអត្តឃាតនៅលើដើមឈើ ក្នុងគុម្ពោតព្រៃក្បែរអូរខាងក្រោយផ្ទះបានសម្រេចតែម្តងបង្កការភ្ញាក់ផ្អើលកាលពីម៉ោង១១ និង១០នាទីព្រឹក ថ្ងៃទី១៥ ខែធ្នូ ឆ្នាំ២០១៨ ស្ថិតនៅភូមិតាង៉ែនក្រោម ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានពីលោក រី ដារ៉ា អធិការនគរបាលស្រុកសាលាក្រៅបានឱ្យដឹងថា ជនរងគ្រោះឈ្មោះ យូន ដារ៉ូ ភេទប្រុស អាយុ២៦ឆ្នាំ មានទីលំនៅក្នុងភូមិ-ឃុំកើតហេតុខាងលើ ។
លោកបន្តទៀតថា ពួកគេទាំងពីរនាក់ប្តីប្រពន្ធតែងតែរកាំរកុសឈ្លោះទាស់ទែងគ្នាគ្មានថ្ងៃស្រាកស្រាន្តនោះឡើយ ដោយសារតែប្តីចូលចិត្តផឹកស្រា លុះត្រឡប់មកវិញនិយាយច្រើន ប្រពន្ធមិនចូលចិត្តក៏ក្លាយទៅជាមានបញ្ហាក្នុងក្រុមគ្រួសារ ។ ម្យ៉ាងវិញទៀត នៅក្នុងក្រុមគ្រួសារមួយនេះ ទោះបីជាប្តីមិនបានផឹកស៊ីក៏ពួកគេមានរឿងមិនចុះសម្រុងនឹងគ្នាដែរ ដោយអ្នកជិតខាងឮសូរតែឈ្លោះប្រកែកគ្នាព្រឹកល្ងាចៗ ។ ជួនកាលក៏មានការវាយតប់គ្នាទៅវិញទៅមកដែរ មិនដឹងជាមានរឿងអ្វីឱ្យពិតប្រាកដ អាចមកពីប្តីប្រចណ្ឌប្រពន្ធ ឬប្រពន្ធមិនចូលចិត្តប្តីផឹកស្រាក៏ថាបានដែរ ។
លោកបញ្ជាក់ថា ប៉ុន្តែអ្វីដែលគេចាប់អារម្មណ៍នោះ គឺនៅយប់មុនថ្ងៃកើតហេតុ គេឃើញប្តីប្រពន្ធមួយគូនេះឈ្លោះគ្នាខ្លាំងជាងសព្វមួយដង ហើយប្រពន្ធជនរងគ្រោះបានស្រែកខ្លាំងៗសុំលែងលះជាមួយប្តី ដោយចែកផ្លូវគ្នាដើររៀងៗខ្លួន ។ ពេលនោះប្តីក៏ជេរបញ្ចោរប្រពន្ធវិញដែរ ហើយក៏ដើរចេញទៅក្រៅបាត់ស្រមោល ស្រាប់តែព្រឹកឡើងគេប្រទះឃើញជនរងគ្រោះចង.កធ្វើអត្តឃាតនៅលើដើមឈើស្លាប់តែម្តង ។ លើសពីនេះ បើតាមការធ្វើកោសល្យវិច្ច័យរបស់មន្ត្រីនគរបាលជំនាញ បានសន្និដ្ឋានថា សពជនរងគ្រោះពិតជាបានស្លាប់ដោយសារចង.កធ្វើអត្តឃាតពិតប្រាកដមែន ។ បន្ទាប់ពីកាត់ខ្សែស្រាយសពជនរងគ្រោះចុះក្រោម គេប្រគល់ជូនទៅសាច់ញាតិ ដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ