លក្ខណសម្បត្តិជាព្រះគ្រូចៅអធិការមិនមែនចេះតែស្រោចទឹកដំឡើងតួនាទីទៅតាមការស្រឡាញ់បានទេ។ ព្រះសង្ឃដែលគួរនឹងធ្វើជាអ្នកគ្រប់គ្រងវត្តត្រូវប្រកបដោយចំណេះវិជ្ជាទាំងផ្លូវលោក និងផ្លូវធម៌គ្រប់គ្រាន់ ហើយបួសយ៉ាងតិចចាប់ពី៥ឆ្នាំឡើងទៅទើបសមគួរនឹងទទួលតួនាទីជាអ្នកដឹកនាំវត្តអារាម ។
តទៅនេះលក្ខណសម្បត្តិទាំង១០យ៉ាងរបស់ព្រះគ្រូចៅអធិការវត្តគឺ
១-ត្រូវមានកិរិយាមារយាទគួរឱ្យជ្រះថ្លា ដឹងពិធីការ ដឹងសុជីវធម៌ក្នុសង្គម មិនឆ្គង មិនច្រឡើសបើស
២-ចំពោះភិក្ខុសង្ឃ បានដល់ភិក្ខុដែលមានវស្សាចាស់ គឺបួសយ៉ាងតិច៥វស្សាឡើងទៅ
៣-ទ្រទ្រង់បាដិមោក្ខ ដឹងគោលព្រះវិន័យជ្រៅជ្រះ
៤-ជាអ្នកវៃឆ្លាត ពូកែក្នុងការរម្ងាប់អធិការណ៍
៥-ជាអ្នកស្រឡាញ់ធម៌ គោរពធម៌ យកធម៌ជាធំ លើកតម្កើងធម៌ ស្រឡាញ់ការចេះដឹង ស្រឡាញ់ការពិត ស្រឡាញ់ការសិក្សា ចេះស្តាប់ ចេះនិយាយ ចេះពិភាក្សា ធ្វើខ្លួនឱ្យគេសរសើរ ចង់ចូលជិតដើម្បីប្រឹក្សា សន្ទនានិងចូលចិត្តសិក្សារៀនសូត្រនូវគោលការណ៍ច្បាប់ទម្លាប់ដែលជ្រៅៗថែមទៀត
៦-ជាអ្នកសន្តោសដោយបច្ច័យ៤ តាមមាន តាមបានមិនលោភលន់ មិនខ្ជះខ្ជាយ មិនចង់បានឱ្យហួសឋានៈខ្លួន រស់នៅតាមបែបធម្មតាៗ មិនហ៊ឺហា ស៊ីវីល័យខុសទៅនឹងធម៌វិន័យ
៧-ជាសង្ឃបួសបានយូរ ដឹងកិច្ចការរាក់ជ្រៅ ចាំរឿងរ៉ាវបានច្រើន មានការពិសោធក្នុងកិច្ចការយូរ ចេះចាំរឿងរ៉ាវផ្សេងៗច្រើន ធ្លាប់ឆ្លងកាត់បញ្ហាជីវិត និងការងារយូរមកហើយ ចេះអត់ធ្មត់មិនឈាមរាវដូចកូនក្មេង
៨-មានសីលប្រព្រឹត្តត្រឹមត្រូវតាមសិក្ខបទទាំឡាយ
៩-ជាអ្នកចេះច្រើន មានចំណេះវិជ្ជាខ្ពស់ និងទូលំទូលាយ ស្គាល់បញ្ហា ស្គាល់សេចក្តីត្រូវការរបស់សង្គមដែលខ្លួនគ្រប់គ្រង និងឆ្លៀវឆ្លាតក្នុងការដោះបញ្ហាទាំងនោះ។ បើជាភិក្ខុសង្ឃ គឺអង្គដែលទ្រទ្រង់នូវព្រះត្រៃបិដក
១០-ស្ទាត់ជំនាញក្នុងឈានទាំង៤ ដែលជាវិហារធម៌សម្រាប់បព្វជិតរស់នៅដោយសុខសប្បាយនាបច្ចុប្បន្ន ។
ទាំង១០ចំណុចនេះជាលក្ខណៈរបស់ព្រះចៅអធិការវត្ត ដែលយើងជាពុទ្ធបរិស័ទអាចធ្វើតាមដើម្បីជាប្រយោជន៍ ព្រោះមិនមែនជារបស់ដែលត្រឹមតែជាទ្រឹស្តី ឥតមាននរណាអនុវត្តនោះទេ ព្រះសង្ឃទាំងឡាយ លោកបានធ្វើជាមេដឹកនាំខាងផ្នែកចិត្តវិញ្ញាណជាង២ពាន់ឆ្នាំប្រកបដោយជោគជ័យរួចមកហើយ ។
ចែករំលែកព័តមាននេះ