ខេត្តកំពង់ស្ពឺ ៖ បុរសមានរោគប្រចាំកាយម្នាក់ តែងព្យាយាមធ្វើអត្តឃាតសម្លាប់ខ្លួនជាច្រើនលើកតែមិនបានសម្រេច ដោយសារប្រពន្ធជួយទាន់ ។ លុះដល់ប្រពន្ឋមិននៅផ្ទះ បានយកក្រមាចងកលើមែកស្វាយស្លាប់តែម្តង។ ហេតុការណ៍នេះបង្កការភ្ញាក់ផ្អើលបានកើតឡើងកាលពីម៉ោង២រសៀលថ្ងៃទី៦ ខែកញ្ញា ឆ្នាំ២០១៨ ស្ថិតក្នុងភូមិវាលធំ ឃុំត្រែងត្រយឹង ស្រុកភ្នំស្រួច។
ជនរងគ្រោះដែលស្លាប់ឈ្មោះស៊ី ចិន ភេទប្រុស អាយុ៥៧ឆ្នាំ រស់នៅភូមិកើតហេតុខាងលើ ។
ប្រភពព័ត៌មានពីសមត្ថកិច្ចស្រុកភ្នំស្រួចបានឲ្យដឹងថា ជនរងគ្រោះបានយកក្រមាចងកនឹងមែកស្វាយ១ដើមកម្ពស់២,៥០ម៉ែត្រ ស្ថិតនៅខាងក្រោយផ្ទះចម្ងាយប្រហែល២០ម៉ែត្រ ខណៈប្រព័ន្ឋកូនមិននៅផ្ទះ។
ប្រភពព័ត៌មានពីស្ត្រីឈ្មោះសឿន សូល អាយុ៤៨ឆ្នាំ ត្រូវជាប្រពន្ធជនរងគ្រោះបានបំភ្លឺឱ្យសមត្ថកិច្ចដឹងថាថា ប្តីរបស់គាត់បានព្យាយាមធ្វើអត្តឃាតច្រើនលើកមកហើយ តែត្រូវគាត់ជួយទាន់ ហើយកាលពីម៉ោង៧ព្រឹកថ្ងៃកើតហេតុនេះ ប្តីគាត់បានប៉ុនប៉ងចងកសម្លាប់ខ្លួនដែរ។
ប្រភពដដែលបានបន្តថា គាត់អត់ដឹងប្តីរបស់គាត់ចងកតាំងពីម៉ោងប៉ុន្មាននោះទេ ព្រោះគាត់អត់នៅផ្ទះ។ លុះពេលគាត់ចូលដល់ក្នុងផ្ទះ មិនឃើញប្តីក៏ដើររកស្រាប់តែបានប្រទះឃើញប្តីគាត់ចងកស្លាប់លើមែកស្វាយខាងក្រោយផ្ទះស្លាប់បាត់ទៅហើយ រួចក៏រាយការណ៍ប្រាប់ប៉ូលិសមូលដ្ឋាន ។
សមត្ថកិច្ចបានធ្វើកោសល្យវិច័យបញ្ជាក់ថា ជនរងគ្រោះពិតជាបានធ្វើអត្តឃាតដោយចងសម្លាប់ខ្លួនប្រាកដ។ សពត្រូវបានសមត្ថកិច្ចប្រគល់ឲ្យក្រុមគ្រួសារដើម្បីចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ