រាជធានីភ្នំពេញ ៖ តំណាងអយ្យការសាលាដំបូងរាជធានីភ្នំពេញនាព្រឹកថ្ងៃទី១៥ សីហា នេះ បានធ្វើការចោទប្រកាន់បុរសម្នាក់ ដែលគេស្គាល់ថា ជាមន្ត្រីនគរបាលជាតិ ដែលបង្កហេតុគ្រោះថ្នាក់ចរាចរណ៍បុកនិស្សិតម្នាក់ស្លាប់ ពីបទ បើកបរបណ្តាលឲ្យស្លាប់អ្នកដ៏ទៃដោយអចេតនា តាមមាត្រា៨៥ ស្តីពីច្បាប់ចរាចរណ៍ផ្លូវគោក ។ បន្ទាប់ពីតំណាងអយ្យការចោទប្រកាន់ជាផ្លូវការហើយ សំណុំរឿងនេះត្រូវបានចាត់បញ្ជូនទៅចៅក្រមស៊ើបសួរ ដើម្បីសម្រេចតាមនីតិវិធី ។
ជនត្រូវចោទឈ្មោះ អ៊ុច ឆាយ ភេទប្រុស អាយុ៣៩ឆ្នាំ បើករថយន្តម៉ាកម៉ែសឺដេស ពណ៌ស្ករ ពាក់ស្លាកនគរបាល ២.៧៧៣០ ។
បញ្ជាក់ កាលពីវេលាម៉ោង១០ និង៤៥នាទីថ្ងៃទី១១ សីហា ជនសង្ស័យបានបើករថយន្តបុកជាមួយម៉ូតូ១គ្រឿង នៅផ្លូវបំបែកជា៤ បណ្ដាលឲ្យអ្នកជិះម៉ូតូស្លាប់ភ្លាមៗនៅកន្លែងកើតហេតុ ផ្លូវលេខ២៥៥ កែងនឹងផ្លូវ៣៣៦ សង្កាត់បឹងសាឡាង ខណ្ឌទួលគោក រាជធានីភ្នំពេញ ។ ចំណែកជនរងគ្រោះមានឈ្មោះ គួច សុផានិត ភេទប្រុស អាយុ២៦ឆ្នាំ មុខរបរជានិស្សិត ស្នាក់នៅផ្ទះលេខ២៤B ភូមិត្រពាំងឈូក សង្កាត់ទឹកថ្លា ខណ្ឌសែនសុខ ។
សាក្សីនៅកន្លែងកើតហេតុបានរៀបរាប់ប្រាប់សមត្ថកិច្ចថា ដំបូងគេឃើញម៉ូតូមួយគ្រឿងម៉ាកZoommer – X ពណ៌ខ្មៅ ពាក់ស្លាក់លេខភ្នំពេញ 1DF-2984 ជិះតាមបណ្ដាយផ្លូវ៣៣៦ ពីទិសខាងកើតលិច ។ លុះដល់ចំណុចខាងលើក៏ត្រូវរថយន្តម៉ាកម៉ែសឺដេស ពណ៌ស្ករ ពាក់ស្លាកនគរបាល ២.៧៧៣០ ធ្វើដំណើរតាមផ្លូវលេខ៣៦៦ ពីលិចទៅកើត ហើយរថយន្តបានបុកគ្នាជាមួយម៉ូតូ នៅផ្លូវបំបែកជា៤នោះ បណ្ដាលឲ្យអ្នកបើកម៉ូតូដួលស្លាប់ភ្លាមតែម្ដង ។
ក្រោយពេលកើតហេតុក៏គេបានឃើញភាគីប្អូនជនរងគ្រោះមកដល់កន្លែងនោះដែរ និងបានឃើញរថយន្តបុកម៉ូតូ បណ្តាលឲ្យសាច់ញាតិរបស់គាត់ស្លាប់បែបនេះ ។ ពេលនោះក្រុមគ្រួសារជនរងគ្រោះទប់កំហឹងមិនបានក៏កើតមានអំពើហិង្សាស្ទុះទៅវាយបំបែកកញ្ចក់រថយន្តនគរបាលនោះ តែវាយមិនបែកទេ ក៏បានដើរចេញទៅរករថយន្តសង្គ្រោះដែលមកបម្រុងដឹកជនរងគ្រោះវិញ ហើយបានលើកជនរងគ្រោះបំណងទៅសង្គ្រោះ តែហួសពេលហើយ ។
ភ្លាមនោះក្រុមគ្រួសារជនរងគ្រោះបានស្ទុះទៅវាយបំបែកកញ្ចក់រថយន្តនគរបាលខាងស្ដាំបែកខ្ទេច ។
ជនសង្ស័យបានឆ្លើយបដិសេធនៅសមត្ថកិច្ចក៏ដូចនៅដំណាក់កាលតំណាងអយ្យការសាលាដំបូងថា ខ្លួនមិនបានបើករថយន្តបុកអ្នកជិះម៉ូតូនោះទេ គឺអ្នកជិះម៉ូតូទេបានជិះចូលរថយន្តខ្លួន បណ្តាលឲ្យកិនស្លាប់ ។ ទោះជាយ៉ាងណាក្តីភ្លាមនោះសមត្ថកិច្ចនគរបាលការិយាល័យចរាចរណ៍ផ្លូវគោក រាជធានីភ្នំពេញក៏បានធ្វើការវាស់វែង និងបានឃាត់ខ្លួនជនសង្ស័យ រួមទាំងរថយន្ត និងម៉ូតូ ដើម្បីយកទៅធ្វើការសាកសួរ ។ បន្ទាប់មកសំណុំរឿងនេះត្រូវបានបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ។ ចំណែកសពជនរងគ្រោះសមត្ថកិច្ចប្រគល់ឲ្យក្រុមគ្រួសារទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ