នៅក្នុងព្រហ្មចរិយធម៌ ព្រះបរមសាស្តាបានត្រាស់សម្តែងថា ជនណាប្រព្រឹត្តខុសក្នុងមាតា ខុសក្នុងបិតា ប្រព្រឹត្តខុសក្នុងព្រះសម្ពុទ្ធ និងខុសក្នុងសាវ័ករបស់តថាគត ជននោះរមែងមានបាបច្រើន ហើយពៀរក៏នឹងមានដល់បុគ្គលនោះ ។
អ្នកប្រាជ្ញទាំងឡាយក៏តិះដៀលបុគ្គលនោះ លុះទម្លាយខន្ធទៅកាន់លោកខាងមុខ រមែងទៅកាន់អបាយភូមិ(នរក) ព្រោះតែការប្រព្រឹត្តទុច្ចរិតបំពានលើលោកអ្នកដ៏មានគុណទាំងឡាយ ។
ចំណែកបុគ្គលណាប្រតិបត្តិល្អក្នុងមាតាបិតា ក្នុងព្រះពុទ្ធ ក្នុងសាវ័កទាំងឡាយ បុគ្គលនោះ រមែងបាននូវបុណ្យកុសលដ៏ច្រើន ហើយបណ្ឌិតទាំងឡាយ រមែងសរសើរជននោះ ។
លុះអស់អាយុជីវិតទៅរមែងទៅកាន់សុគតិភព ហើយរីករាយក្នុងស្ថាននោះអស់កាលដ៏យូរអង្វែង ព្រោះអានិសង្សនៃការប្រព្រឹត្តត្រូវតាមធម៌នោះចំពោះមាតា និងបិតាទាំងឡាយ ។
ចែករំលែកព័តមាននេះ