ខេត្តមណ្ឌលគិរី ៖ បុរសម្នាក់បានរងរបួសធ្ងន់ ត្រូវបានគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកស្រុកស្នូលខេត្តក្រចេះ ក្រោយជួបហេតុការណ៍នឹកស្មានមិនដល់ ខណៈកំពុងសប់កង់គោយន្តកន្ត្រៃផ្ទុះកក្រើកពេញភូមិ កាលពីវេលាម៉ោង៦និង៤៥នាទីព្រឹកថ្ងៃទី១២ ខែ មិថុនា ឆ្នាំ ២០១៨ ។
លោក ស៊ុន ប៊ុនធឿន អធិការនគរបាលស្រុកកែវសីមា បានឲ្យដឹងថា ហេតុការណ៍ខាងលើបានកើតឡើងនៅចំណុចផ្ទះឈ្មោះ ធាង វុទ្ធី ភេទ ប្រុស អាយុ៤១ឆ្នាំ មុខរបរជាងម៉ូតូ មានទីលំនៅបច្ចុប្បន្នភូមិចក់ចារ ឃុំ ស្រែឈូក ស្រុកកែវសីមា ខេត្តមណ្ឌលគិរី ។ លោកអធិការបន្តថា ករណីនេះបណ្តាលមកពីគ្រោះថ្នាក់ដោយសប់កង់គោយន្តកន្ត្រៃផ្ទុះកង់ បណ្ដាលឲ្យបុរសម្នាក់រងរបួសធ្ងន់ បាក់ដៃឆ្វេង។
ជនរងគ្រោះឈ្មោះ ពៅ ចោង ភេទប្រុស អាយុ២៨ឆ្នាំ មុខរបរកសិករ មានស្រុកកំណើតភូមិផ្អាក ឃុំស្នួល ស្រុកស្នូល ខេត្ត ក្រចេះ មានប្រពន្ធឈ្មោះ ស្រី ងិត មានកូន២នាក់ (ស្រីម្នាក់ និងប្រុសម្នាក់) ។ បច្ចុប្បន្នស្នាក់នៅបណ្តោះអាសន្នជាមួយម្ចាស់ផ្ទះខាងលើ ៕
ចែករំលែកព័តមាននេះ