ប្រជាពលរដ្ឋ១៨៩គ្រួសារ អបអរសាទរចំពោះចំណាត់របស់អាជ្ញាធរខេត្ត
- កំពត
ខេត្តកំពត ៖ ប្រជាពលរដ្ឋដែលរស់នៅក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្ពកំពត មានក្តីរីករាយ ខណៈអាជ្ញាធរខេត្តកំពត បញ្ជូនក្រុមការងារទៅពិនិត្យ ដោះស្រាយ…
ខេត្តកំពត ៖ ប្រជាពលរដ្ឋដែលរស់នៅក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្ពកំពត មានក្តីរីករាយ ខណៈអាជ្ញាធរខេត្តកំពត បញ្ជូនក្រុមការងារទៅពិនិត្យ ដោះស្រាយ និងវាស់វែងផ្តល់ប័ណ្ណកម្មសិទ្ធិដីធ្លីដល់ពួកគាត់។ ជាមួយនឹងបេសកកម្មចុះពិនិត្យ ដោះស្រាយដីខាងលើនេះ លោក ង៉ែត សាវឿន ជំនួសឱ្យក្រុមការងារវាស់វែងដីធ្លី បានប្រាប់អ្នកយកព័ត៌មាន នៅព្រឹកថ្ងៃទី២២ ខែឧសភា ឆ្នាំ២០១៨នេះថា ការចុះអនុវត្តនេះ ក្រុមការងារក៏ដូចជាមន្ត្រីជំនាញបានចុះបេសកកម្មតាមគោលការណ៍របស់អាជ្ញាធរខេត្ត តាមរយៈ ការស្នើសុំរបស់ប្រជាពលរដ្ឋចំនួន១៨៩គ្រួសារ មករដ្ឋបាលខេត្តកំពតឱ្យជួយអន្តរាគមន៍ ដោះស្រាយសម្របសម្រួល និងវាស់វែងដីធ្លីជូនពួកគាត់នាពេលកន្លងមក។ លោក ង៉ែត សាវឿន បានឲ្យដឹងទៀតថា សកម្មភាពនេះក្រុមការងារបានសហការជាមួយសមត្ថកិច្ចជំនាញគ្រប់ស្រទាប់ និងអាជ្ញាធរមូលដ្ឋាន ដើម្បីចុះមកពិនិត្យជាក់ស្តែងនៅទីតាំងខាងលើ ដើម្បីអនុវត្តតាមការស្នើសុំ របស់បងប្អូនប្រជាពលរដ្ឋនៅតំបន់នេះ។
លោកបានបញ្ជាក់ផងដែរថា កន្លងមកមានសារព័ត៌មាន ក្នុងស្រុកមួយផ្នែកតូចបានចុះផ្សាយពីករណីទំនាស់ដីធ្លីរ៉ាំរ៉ៃនៅចំណុចភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ដោយការចុះផ្សាយ ខាងលើគឺបំផ្លើសពីការពិតទាំងស្រុង។ ផ្ទុយទៅវិញ អាជ្ញាធរខេត្ត និងក្រុមការងារបានដុតដៃដុតជើងខិតខំអនុវត្តគោលការណ៍របស់រាជរដ្ឋាភិបាលដោយ គ្មានពេលទំនេរឡើយ។ ហើយអំឡុងពេលនេះ ក្នុងចំណោមប្រជាពលរដ្ឋ១៧៩ គ្រួសារ ក្រុមការងារបានចុះវាស់វែងជូនប្រជាពលរដ្ឋចំនួន៨៣គ្រួសាររួចហើយ។ ចំណែកនៅសេសសល់ ក្រុមការងារនឹងបន្តនីតិវិធីដើម្បី ពិនិត្យ ដោះស្រាយជូនពួកគាត់ជាបន្តបន្ទាប់ទៀត។ ជាមួយនេះដែរ លោកក៏បានលើកឡើងពីករណីប្រឈមមួយចំនួន ដូចជាក្នុងចំណោមប្រជាពលរដ្ឋ ចំនួន១៨៩គ្រួសារ ខាងលើមានឈ្មោះស្ទួនរហូតដល់៤១គ្រួសារ ទើបក្រុមការងារពិបាករកដំណោះស្រាយជូន។ បានន័យថា ឧបសគ្គកើតឡើងគឺផ្តើមឡើងដោយសារភាគីប្រជាពលរដ្ឋ និងប្រជាពលរដ្ឋ មិនមែនពាក់ព័ន្ធជាមួយ អាជ្ញាធរ និងក្រុមការងារដែលកំពុងតែ ចុះទៅអនុវត្តការវាស់វែងដីធ្លីជូនពួកគាត់ នោះឡើយ។
និយាយឲ្យចំទៅគឺវិវាទ រវាងប្រជាពលរដ្ឋក្នុងចំណោម១៨៩គ្រួសារ ជាមួយប្រជាពលរដ្ឋ១០៣គ្រួសារ ដែលបានប្រកាសទិន្នន័យក្បាលដីរួចហើយ។ លោក ង៉ែត សាវឿន បានបញ្ជាក់បន្ថែមថា ទោះជាមានករណីប្រឈមខ្លះៗដោយសារមនុស្សខិលខូចមួយក្តាប់តូចបង្កភាពញុះញង់យ៉ាងណាក៏ដោយ ក៏ក្រុមការងាររបស់លោកមិនរាថយ ឡើយគឺនៅតែបន្តនីតិវិធីដោះស្រាយដីធ្លីជូនប្រជាពលរដ្ឋ ក្នុងតំបន់ខាងលើឱ្យបានជោគជ័យនាពេលដ៏ខ្លីខាងមុខនេះ។ សូមបញ្ជាក់ផងដែរថា៖ ការចុះពិនិត្យ ដោះស្រាយ និងវាស់វែងដីធ្លីជូនប្រជាពលរដ្ឋស្ថិតក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ក្រុមការងារបានអនុវត្តទៅតាមការស្នើសុំរបស់ប្រជាពលរដ្ឋ១៨៩គ្រួសារ ចាប់ពីខែមីនា ដល់ថ្ងៃទី១៨ ខែឧសភា ឆ្នាំ២០១៨ បានសរុប៨៣គ្រួសារ ទំនាស់៥ គ្រួសារ។
ហើយក្នុងចំណោម១៨៩គ្រួសារ ក៏មានឈ្មោះស្ទួនរហូតដល់ទៅ៤១ គ្រួសារ និងមានប្រជាពលរដ្ឋចំនួន១៤គ្រួសារ ស្មើនឹង១៤ក្បាលដី កំពុងមានទំនាស់រវាងប្រជាពលរដ្ឋដូចគ្នាដែលមានចំនួន១០៣គ្រួសារ ដែលមានផ្ទៃដី៥២៣ហិកតា ក្នុងសេចក្តីជូនដំណឹងលេខ ១៤០២( សជណ) ចុះថ្ងៃទី៨ ខែធ្នូ ឆ្នាំ២០១៥ របស់ទីស្តីការគណៈរដ្ឋមន្ត្រី ដែលក្រុមការងារមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ធ្វើការបិទផ្សាយរួចហើយ ហើយក្រុមការងារបានវាស់វែងកាលពីឆ្នាំ២០១៦កន្លងមក។ ជាមួយគ្នានេះប្រជាពលរដ្ឋក្នុងចំណោម ១៨៩គ្រួសារដែលក្រុមការងារបាចុះវាស់វែងជូនបងប្អូនបាន រួចរាល់ដោយរលូន គឺមូលហេតុដោយសារតែ គ្មានទំនាស់នោះ បានអបអរសាទរ រីករាយចំពោះក្រុមការងារយ៉ាងខ្លាំង និងថ្លែងការដឹងគុណចំពោះ អាជ្ញាធរគ្រប់ថ្នាក់ ជាពិសេសសម្តេចតេជោ ហ៊ុន សែន ប្រមុខរាជរដ្ឋាភិបាលដែលជានិច្ចកាល សម្តេចតែងតែគិតគូរដឹងសុខដឹងទុក្ខរបស់ប្រជាពលរដ្ឋដោយមិនប្រកាន់និន្នាការនយោបាយ ជំនឿសាសនាអ្វីទាំងអស់គឺជាតិខ្មែរតែមួយ រស់នៅដោយសុខសន្តិភាព ស្ថិរភាពនយោបាយ ក្រោមបាវចនាជាតិ សាសនា ព្រះមហាក្សត្រ៕
ចែករំលែកព័តមាននេះ