ខេត្តក្រចេះ ៖ សេចក្តីរាយការណ៍បឋមឱ្យដឹងថា មានអ្នកភូមិស្រែនន ឃុំកន្ទួត ស្រុកចិត្របុរីយ៉ាងតិច៥នាក់ (ស្រី៣នាក់) បានពុលរហូតស្លាប់ជាបន្តបន្ទាប់ ខណៈជាង២០នាក់ទៀតកំពុងបញ្ជូនទៅសង្គ្រោះបន្ទាន់នៅឯមន្ទីរពេទ្យនៅព្រឹកថ្ងៃទី០៥ ឧសភា នេះ ។ នេះបើយោងតាមការបញ្ជាក់ពីលោកឧត្តមសេនីយ៍ត្រី ស៊ុម សុឃីម ស្នងការរងទទួលបន្ទុកសេនាធិការ ។ លោកស្នងការរងបានបញ្ជាក់ទៀតថា ការពុលស្លាប់នេះ គឺនៅមិនទាន់ដឹងពីមូលហេតុនោះទេ បានកើតមានឡើងតាំងពីថ្ងៃទី៣ ឧសភា មកម្លេ៉ះ ។
ជុំវិញការផ្ទុះបាតុភាពពុល គឺបានកើតទៅលើអ្នកភូមិប្រុស-ស្រីសុទ្ធសឹងជាជនជាតិព្នងបានស្លាប់បន្តបន្ទាប់ គួរឱ្យភ្ញាក់ផ្អើល។ អាជ្ញាធរខេត្តក្រចេះនៅមិនទាន់បានធ្វើការកំណត់ឱ្យជាក់លាក់ថា ការពុលនេះផ្តើមចេញពីមូលហេតុអ្វីឱ្យប្រាកដនៅឡើយទេ ។ មានការសន្និដ្ឋានបឋមថា ការពុលនេះ អាចបណ្តាលមកពីចំណីអាហារ ពិសេសបណ្តាលមកពីទឹកអូរ ដែលអ្នកភូមិបានដងពីអូរមកទទួលទាន ហើយទឹកទាំងនោះទៀតសោធ គឺត្រូវបានហូរច្រោះពីដីរបស់ក្រុមហ៊ុននៅប៉ែកខាងលើ ដែលមានប្រើប្រាស់ថ្នាំគីមីសម្រាប់បាញ់សម្លាប់ស្មៅ ។
អភិបាលខេត្តក្រចេះ លោក វ៉ា ថន ក៏បានដឹកនាំមន្ត្រីមន្ទីរជំនាញពាក់ព័ន្ធចុះទៅពិនិត្យ និងជួយសង្គ្រោះដល់អ្នកនៅក្នុងភូមិ ។ ក្នុងនោះ លោកបានបញ្ជាឱ្យមន្ត្រីជំនាញសុខាភិបាលត្រូវប្រមូលសំណាកដែលសង្ស័យថា ពុលយកទៅធ្វើកោសល្យវិច័យ ដើម្បីបន្តស្វែងរកមូលហេតុឱ្យបានច្បាស់ ។
ព័ត៌មានលម្អឹតនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ