ខេត្តស្ទឹងត្រែង ៖ កាលពីពេលថ្មីៗកន្លងមក អភិបាលស្រុកសៀមបូក បានដឹកនាំមន្ត្រីក្រោមឱវាទ រួមជាមួយដៃគូអភិវឌ្ឍទៅពិនិត្យទីតាំងមួយដែលអាចបង្កើតជារមណីយដ្ឋានអេកូទេសចរណ៍យ៉ាងប្រណីត សម្រាប់់ទាក់ទាញភ្ញៀវជាតិ និងអន្តរជាតិ នៅថ្ងៃចូលឆ្នាំចិន និងថ្ងៃចូលឆ្នាំប្រពៃណីជាតិខ្មែរនាប៉ុន្មានខែទៀតខាងមុខ…
ខេត្តស្ទឹងត្រែង ៖ កាលពីពេលថ្មីៗកន្លងមក អភិបាលស្រុកសៀមបូក បានដឹកនាំមន្ត្រីក្រោមឱវាទ រួមជាមួយដៃគូអភិវឌ្ឍទៅពិនិត្យទីតាំងមួយដែលអាចបង្កើតជារមណីយដ្ឋានអេកូទេសចរណ៍យ៉ាងប្រណីត សម្រាប់់ទាក់ទាញភ្ញៀវជាតិ និងអន្តរជាតិ នៅថ្ងៃចូលឆ្នាំចិន និងថ្ងៃចូលឆ្នាំប្រពៃណីជាតិខ្មែរនាប៉ុន្មានខែទៀតខាងមុខ ។
ទីតាំងនោះឈ្មោះ «ជួរវែង» ឬហៅថា «ច្រឡង់ទឹក» ស្ថិតនៅក្នុងភូមិអូរម្រះ ឃុំអូរម្រះ ស្រុកសៀមបូក ខេត្តស្ទឹងត្រែង មានចម្ងាយពីទីរួមខេត្ត ប្រមាណជា៤០គីឡូម៉ែត្រ ។ ទៅទីនោះត្រូវធ្វើដំណើរចេញពីក្រុងស្ទឹងត្រែង លើកំណាត់ផ្លូវជាតិលេខ៧ ដល់ចំណុច ភ្នំក្រហមជិតស្នាក់សន្តិសុខ៧២២ បត់ស្តាំចូលទៅកាន់ភូមិស្រែក្រសាំង បន្តដំណើររហូត ដល់មាត់ទន្លេ រួចបត់ឆ្វេង ហើយបន្តដំណើរលើដងផ្លូវក្រាលក្រួសក្រហម១ខ្សែឆ្ពោះទៅភូមិត្បូងខ្លា បង្ហួសរហូតទៅដល់ឃុំអូរម្រះ រួចបត់ឆ្វេងបន្តដំណើរឆ្ពោះទៅមុខប្រមាណជា៦គីឡូម៉ែត្រទៀតនឹងទៅដល់តំបន់អេកូទេសចរណ៍ថ្មីនោះហើយ ។
អភិបាលស្រុកសៀមបូក លោកថោង ស្រាន់ ឲ្យដឹងថា ដើម្បីរៀបចំទីនោះឲ្យក្លាយទៅជារមណីយដ្ឋានអេកូទេសចរណ៍ថ្មីមួយ សម្រាប់ទាក់ទាញភ្ញៀវជាតិ និងអន្តរជាតិ គ្រប់ជាតិសាសន៍ដែលមានបំណងចូលទៅទស្សនានៅថ្ងៃចូលឆ្នាំចិន ជាពិសេសគឺនៅថ្ងៃចូលឆ្នាំថ្មីប្រពៃណីជាតិខ្មែរខាងមុខ ខណៈលោកបាន និងកំពុងខិតខំកៀរគររកដៃគូវិនិយោគនានា ទាំងនៅក្នុងស្រុក និងនៅក្រៅស្រុក ដើម្បីអភិវឌ្ឍន៍ទីនោះឲ្យក្លាយទៅជាទីកម្សាន្តមួយ ប្រកបដោយភាពទាក់ទាញ និងមានផាសុកភាពដែលភ្ញៀវអាចចុះងូតទឹកលេងលើខ្សែទឹកហូរចាំងឆ្លុះផ្ទាំងថ្ម គយគន់ព្រឹក្សព្រៃ ដែលមានសំឡេងសត្វយំយ៉ាងខ្ញៀវខ្ញារ ប្រៀបបានទៅនឹងតន្ត្រីធម្មជាតិ ភ្ញៀវអាចក្រាលតង់ ឬកន្ទេល និងចងអង្រឹង សម្រាកក្រោមម្លប់ដើមឈើដ៏ត្រឈឹងត្រឈៃ និងស្រស់ស្រូបអាហារនៅប្របនឹងជាប់មាត់ ទឹកអូរធម្មជាតិ នោះបានយ៉ាងគាប់ប្រសើរ ដោយគ្មានការភ័យខ្លាច ។
លោកថោង ស្រាន់ ថ្លែងថា៖ «ក្រោយពេលពិនិត្យទីតាំងនោះរួច ខ្ញុំយល់ឃើញថា អាចរៀបចំរមណីយដ្ឋានអេកូទេសចរណ៍យ៉ាងល្អឯក ក្រោមការចូលរួមពីសហគមន៍ ទេសចរណ៍ជួរវែង និងអ្នកចាប់ដៃគូវិនិយោគនៅក្នុង និងក្រៅស្រុក ហើយលោកនឹងពង្រឹងលើផ្នែកសន្តិសុខ សុវត្ថិភាព ជូនភ្ញៀវដែលចូលមកកម្សាន្តរមណីយដ្ឋានទេសចរណ៍ថ្មីនេះឲ្យបានល្អបំផុត ។ ប្រជាពលរដ្ឋនៅក្នុងស្រុកសៀមបូក ភាគច្រើនគឺជាអ្នកប្រកបរបរកសិកម្ម និងកសិឧស្សាហកម្ម ការបង្កបង្កើនផល និងចិញ្ចឹមសត្វ ។
ចំពោះសេដ្ឋកិច្ចសំខាន់នៅក្នុងដែនដីស្រុកនេះ គឺផ្តោតលើវិស័យកសិកម្ម និងទេសចរ ។ ស្រុកសៀមបូក មានតំបន់រមណីយដ្ឋានជាច្រើន ក្នុងនោះមានអន្លង់ផ្សោត និងទីតាំងដែល គ្រោងនឹងបង្កើតថ្មី គឺជួរវែង ឬច្រឡង់ទឹកសម្រាប់រៀបចំឲ្យដំណើរការ ដោយលោកចាត់ទុកថា វិស័យទេសចរណ៍ គឺបានរួមចំណែកមួយយ៉ាងធំ ដែលអាចកាត់បន្ថយភាពក្រីក្ររបស់ប្រជាពលរដ្ឋ ។
បើសិនជាមានភ្ញៀវជាតិ និងអន្តរជាតិ ចូលទស្សនាច្រើន នោះប្រជាពលរដ្ឋនៅក្នុងតំបន់នេះ ក៏លក់ដូរទៅទំនិញ ផលិតផល និងម្ហូបអាហារដាច់ ក្នុងតម្លៃសមរម្យ ឯជីវភាពរបស់ពួកគាត់ក៏មានផ្លាស់ប្តូរទៅតាមនោះ ស្របទៅតាមគោលនយោបាយរបស់ រាជរដ្ឋាភិបាល» ។
លោកថោង ស្រាន់ បានអំពាវនាវដល់ដៃគូអភិវឌ្ឍន៍នានាឲ្យចូលរួមអភិវឌ្ឍន៍តំបន់នោះឲ្យក្លាយទៅជាតំបន់រមណីយដ្ឋានអេកូទេសចរណ៍ធម្មជាតិមួយយ៉ាងប្រណីត ប្រកបដោយការទាក់ទាញ និងរកចំណូលចូលរដ្ឋបានខ្ពស់ពីវិស័យទេសចរណ៍ ។
តំណាងសហគមន៍ទេសចរជួរវែងអះអាងថា លោកនឹងបន្តរក្សាការពារធនធានធម្មជាតិ នៅជុំវិញតំបន់ជួរវែងឲ្យនៅតែមានសម្រស់ស្រស់បំព្រងជានិច្ច ហើយលោកនឹងពង្រឹងសន្តិសុខ និងសុវត្ថិភាពជូនអ្នកទេសចរឲ្យបានល្អប្រសើរបំផុត ៕
ចែករំលែកព័តមាននេះ