ខេត្តបាត់ដំបង ៖ ក្នុងរយៈពេល០៤ថ្ងៃនៃពិធីបុណ្យចូលឆ្នាំថ្មីប្រពៃណីខ្មែរក្នុងឆ្នាំ២០២៤នេះ មានភ្ញៀវជាតិ និងអន្តរជាតិ់យ៉ាងតិចជាង១,៧៣លាននាក់ បានធ្វើដំណើរកម្សាន្តតាមរមណីយដ្ឋាននានា នៅក្នុងទឹកដីខេត្តបាត់ដំបង។ នេះបើតាមរបាយការណ៏របស់មន្ទីរទេសចរណ៍ខេត្ត ដែលបានរាយការណ៏ជូនថ្នាក់ដឹកនាំ។ តាមរយៈរបាយការណ៍…
ខេត្តបាត់ដំបង ៖ ក្នុងរយៈពេល០៤ថ្ងៃនៃពិធីបុណ្យចូលឆ្នាំថ្មីប្រពៃណីខ្មែរក្នុងឆ្នាំ២០២៤នេះ មានភ្ញៀវជាតិ និងអន្តរជាតិ់យ៉ាងតិចជាង១,៧៣លាននាក់ បានធ្វើដំណើរកម្សាន្តតាមរមណីយដ្ឋាននានា នៅក្នុងទឹកដីខេត្តបាត់ដំបង។ នេះបើតាមរបាយការណ៏របស់មន្ទីរទេសចរណ៍ខេត្ត ដែលបានរាយការណ៏ជូនថ្នាក់ដឹកនាំ។
តាមរយៈរបាយការណ៍ លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបានឲ្យដឹងថា ពិតមែនតែអាកាសធាតុក្ដៅហួតហែងបន្តិច តែក្នុងពិធីបុណ្យចូលឆ្នាំថ្មីប្រពៃណីខ្មែរនាឆ្នាំនេះ សម្រាប់ខេត្តបាត់ដំបង មានភ្ញៀវជាតិ និង អន្តរជាតិ ធ្វើដំណើរកម្សាន្តតាមរមណីយដ្ឋាននានា ច្រើនកកកុញគួរឲ្យកត់សម្គាល់។
លោកថា ក្រៅពីការរៀបចំតាមរមណីយដ្ឋាននានាបានល្អស្អាត ដើម្បីទាក់ទាញភ្ញៀវទេសចរនៅ
ចំកណ្ដាលបេះដូង នៃក្រុងបាត់ដំបង ក៏យើងបានរៀបចំទិតាំងកម្សាន្ត មានល្បែងប្រជាប្រិយ
ផ្សេងៗ ការប្រគុំតន្ត្រីខ្នាតយក្ស ការសម្ដែងសិល្បៈ ជាពិសេសការរៀបចំ«តំបន់ត្រជាក់» ដែលជាកន្លែងជួបជុំដ៏ធំបំផុតសម្រាប់ភ្ញៀវជាតិ និង ភ្ញៀវអន្តរជាតិ ចូលរួមលេងកម្សាន្ត។
យោងតាមរបាយការណ៍មន្ទីរទេសចរណ៍បានឲ្យដឹងថា សម្រាប់ពិធីបុណ្យឆ្នាំថ្មីប្រពៃណីខ្មែរ០៤ថ្ងៃ ចាប់ពីថ្ងៃទី ១៣ ដល់ ១៦ មេសា ក្នុងឆ្នាំ២០២៤នេះ ភ្ញៀវជាតិ និងភ្ញៀវអន្តរជាតិបានធ្វើដំណើរកម្សាន្ត តាមរមណីយដ្ឋាននានា ក្នុងទឹកដីខេត្តបាត់ដំបង ចំនួនសរុប ១,៧៣៤,៦២៩នាក់ ក្នុងនោះភ្ញៀវអន្តរជាតិមានចំនួន ៣,១៩៧នាក់។ របាយការណ៍ដដែលបានឲ្យដឹងទៀតថា ក្នុងចំនួនភ្ញៀវសរុបខាងលើនេះ បានកើនឡើង ១៥,៦៣% បើប្រៀបធៀនទៅនឹងឆ្នាំទៅមិញ (២០២៣) ដែលមានភ្ញៀវសរុបចំនួន ១,៥០០,១៦៨នាក់។
បើនិយាយពីភ្ញៀវអន្តរជាតិវិញ សម្រាប់ក្នុងឆ្នាំ២០២៤ នេះ បានកើនឡើងចំនួន ១៦,៣៨% បើធៀបទៅនឹងឆ្នាំ២០២៣។ មានការកត់សម្គាល់ ក្នុងព្រឹត្តិការសង្ក្រាន្ត បាត់ដំបងក្នុងឆ្នាំនេះ សម្រាប់នៅក្នុងក្រុងបាត់ដំបង រដ្ឋបាលខេត្ត បានរៀបចំតំបន់កម្សាន្តជាច្រើនកន្លែង។ ក្នុងនោះមានតំបន់ត្រជាក់ (បាញ់ទឹក) តំបន់ពាងទឹក កន្លែងប្រគុំតន្ត្រី កន្លែងសម្ដែងសិល្បៈ កន្លែងលេងល្បែងប្រជាប្រិយ កន្លែងតាំងពិព័រណ៏ មានម្ហូបអាហារ ផលិតផលក្នុងស្រុក និង កន្លែងកម្សាន្តជាច្រើនទៀត។
ដោយឡែក បើនិយាយពីតាមតំបន់រមនីយដ្ឋាននានាវិញ ស្ទើរគ្រប់ទីកន្លែងទាំងអស់សុទ្ធមានការរៀបចំកន្លែងកម្សាន្តសម្រាប់ភ្ញៀវទេសចរណ៏ធ្វើដំណើរទៅកម្សាន្តយ៉ាងកកកុញដែរ។ ប៉ុន្តែយ៉ាងណា បើតាមការកត់សម្គាល់ សម្រាប់រយៈពេល០៤ថ្ងៃ នៃពិធីបុណ្យចូលឆ្នាំថ្មីប្រនៃខ្មែរក្នុងឆ្នាំនេះ គេសង្កេតឃើញភ្ញៀវទេសចរណ៏ភាគច្រើនបានធ្វើដំណើរកម្សាន្តនៅតាមរមណីយដ្ឋាន ដែលមានទឹកហែលលេងកម្សាន្ត។ ដូចជាតាមតំបន់ដែលមានទឹកធ្លាក់នៅតាមដងស្ទឹងសង្កែ ក្នុងស្រុករតនមណ្ឌល ស្រុកបាណន់ ឬ ទឹកស្ទឹងគ្រញូង ក្នុងស្រុកសំឡូត ជាដើម។ល។និង។ល។
លោក អ៊ុច អ៊ុំភីស្សារ៉ា ប្រធានមន្ទីរទេសចរណ៍បានលើកឡើងថា បច្ចុប្បន្ន នៅក្នុងទឹកដីខេត្តបាត់ដំបង មានរមណីយដ្ឋានកាន់តែច្រើន ទាំងរមណីយដ្ឋានបែបវប្បធម៌ ទាំងរមណីយដ្ឋានធម្មជាតិ និង រមណីយដ្ឋានកែច្នៃ ដែលទើបបង្កើតថ្មី។ នេះជាដើមចម ដែលធ្វើឲ្យភ្ញៀវទេសជាតិ និង ភ្ញៀវអន្តរជាតិ មានការចាប់អារម្មណ៍ខ្លាំងចង់ធ្វើដំណើរកម្សាន្តក្នុងទឹកដី ខេត្តបាត់ដំបង នាំឲ្យមានការកើនឡើងនូវភ្ញៀវទេសចរស្ទើររាល់ឆ្នាំ៕
ចែករំលែកព័តមាននេះ