រាជធានីភ្នំពេញ ៖ សមត្ថកិច្ចចម្រុះ ខណ្ឌឫស្សីកែវដឹកនាំដោយព្រះរាជអាជ្ញារងមាស ច័ន្ទពិសិដ្ឋ អមសាលាដំបូងរាជធានីភ្នំពេញ កាលពីព្រឹកថ្ងៃទី១៦ កញ្ញា បានចុះទៅអនុវត្តសាលក្រមរដ្ឋប្បវេណីលេខ២៨«គ» ចុះថ្ងៃទី១១ កក្កដា ឆ្នាំ២០១១ របស់សាលាដំបូងរាជធានីភ្នំពេញ ដើម្បីរឹបអូសផ្ទះសិប្បកម្មផលិតទឹកត្រីមួយកន្លែងលេខ២៥៧ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ ប្រគល់ទៅឱ្យម្ចាស់បំណុល។ទោះបីជាយ៉ាងណាការអនុវត្តសាលក្រមនេះពុំមានការប៉ះទង្គិចគ្នាឡើយ ដោយកូនបំណុលឈ្មោះឃ្លឹក ធូ និងប្រពន្ធឈ្មោះអ៊ុច សាម៉ន ដែលមានមេធាវីលោកអ៊ុក ភូរិ ជាតំណាងបានព្រមព្រៀងចុះចេញពីលំនៅឋានទៅស្នាក់នៅផ្ទះជួលរង់ចាំការដោះស្រាយសម្របសម្រួលគ្នា។
តាមព័ត៌មានឱ្យដឹងថា សមត្ថកិច្ចបានប្រើកម្លាំងចម្រុះប្រមាណជិត៥០នាក់ ដើម្បីចុះអនុវត្តសាលក្រមលេខ២៨ «គ» ចុះថ្ងៃទី១១ កក្កដា ឆ្នាំ២០១១ ដែលបានបង្គាប់ឱ្យដើមចោទឃ្លឹក ធូ និងអ៊ុច សាម៉ន ដែលជាម្ចាស់សិប្បកម្មផលិតទឹកត្រីប្រគល់ផ្ទះលេខ២៥៧ ផ្លូវលំភូមិមិត្តភាព សង្កាត់ឫស្សីកែវ ខណ្ឌឫស្សីកែវ ទៅឱ្យចុងចម្លើយ ឈ្មោះម៉ៅ វណ្ណតិចនិងឈ្មោះអ៊ឹង តេកសែ គ្រប់គ្រងជាកម្មសិទ្ធិ និងឱ្យដើមចោទធ្វើការរុះរើសម្ភារប្រើប្រាស់ផ្ទាល់ខ្លួនចេញពីផ្ទះ។ បង្គាប់ឱ្យដើមចោទឃ្លឹក ធូ និងប្រពន្ធអ៊ុច សាម៉ន សងប្រាក់ថ្លៃឈ្នួលផ្ទះចំនួន២២.៤០០ដុល្លារ និងសំណងខូចខាត ជំងឺចិត្តចំនួន៨លាន រៀល ចាប់ពីថ្ងៃសាលក្រមស្ថាពរ។
តាមព័ត៌មានឱ្យដឹងថា ម្ចាស់ផ្ទះឈ្មោះឃ្លឹក ធូ និងប្រពន្ធឈ្មោះអ៊ុច សាម៉ន ជាដើមចោទបានខ្ចីប្រាក់ចុងចម្លើយឈ្មោះម៉ៅ វណ្ណតិច និងប្រពន្ធឈ្មោះអឹុង តេកសែ ចំនួន១០ម៉ឺនដុល្លារ ដែលលើកទី១ ចំនួន៨ម៉ឺនដុល្លារ និងលើកទី២ចំនួន២ម៉ឺនដុល្លារ។ ដោយសារគ្មានប្រាក់សងក៏បានធ្វើការចរចាទិញ-លក់ផ្ទះក្នុងតម្លៃ១៤ម៉ឺនដុល្លារ ដោយមានការផ្ទេរកម្មសិទ្ធិត្រឹមត្រូវ ហើយឈ្មោះឃ្លឹក ធូ និងប្រពន្ធឈ្មោះអ៊ុច សាម៉ន នេះបានស្នាក់នៅលើផ្ទះនោះដដែល ដោយធ្វើកិច្ចសន្យាជួលផ្ទះក្នុង១ខែ៣.២០០ដុល្លារ។ បន្ទាប់មកបង់ប្រាក់ឈ្នួលបាន ៥ខែ នៅសល់ថ្លៃឈ្នួល៧ខែក៏មានការប្តឹងប្តល់គ្នា និងឈានមកអនុវត្តសាលដីកានៅពេលនេះ៕
ចែករំលែកព័តមាននេះ