ភាពមិនប្រាកដប្រជា ប៉ះពាល់ដល់សេដ្ឋកិច្ច
រដ្ឋមន្ត្រីហិរញ្ញវត្ថុអង់គ្លេសបានថ្លែងកាលពីថ្ងៃពុធថា
ទីក្រុងឡុងដ៍ ៖ រដ្ឋមន្ត្រីហិរញ្ញវត្ថុអង់គ្លេសបានថ្លែងកាលពីថ្ងៃពុធថា អតិថិជន និងអាជីវកម្មក្នុងប្រទេសអង់គ្លេសកំពុងកាត់បន្ថយការចំណាយរបស់ខ្លួន ព្រោះភាពមិនប្រាកដប្រជាទាក់ទិននឹងការចរចាចាកចេញរបស់អង់គ្លេសពីសហភាពអឺរ៉ុប (Brexit) ។
លោកអធិការបតី Philip Hammond ប្រាប់ថា ៖« ខ្ញុំគិតថា សេដ្ឋកិច្ចអង់គ្លេសកំពុងតែលូតលាស់យ៉ាងរឹងមាំ ។ យ៉ាងណាក្តី ភាពមិនប្រាកដប្រជាទាក់ទិននឹងការចរចាបច្ចុប្បន្ននេះ គឺជាកត្តាមួយប៉ះពាល់ដល់សេដ្ឋកិច្ច ហើយពួកយើងត្រូវតែដកវាចេញឲ្យបានលឿនតាមដែលអាចធ្វើបាន » ។
លោកបន្ថែមថា ៖« មានភស្តុតាងជាច្រើនដែលបង្ហាញថា អាជីវកម្ម និងអតិថិជនកំពុងរង់ចាំមើលលទ្ធផល មុននឹងសម្រេចចិត្តវិនិយោគ និងទិញអ្វីមួយ » ។
លោកបានមានប្រសាសន៍ដូចនេះ ក្នុងថ្ងៃតែមួយដែលមូលនិធិរូបិយវត្ថុអន្តរជាតិនិយាយថា ការលូតលាស់សេដ្ឋកិច្ចអង់គ្លេសនឹងអន់ថយ។ ផលិតផលក្នុងស្រុកសរុបលូតលាស់បានត្រឹម១,៧%ប៉ុណ្ណោះ តិចជាងឆ្នាំ២០១៦ ដែលលូតលាស់បាន១,៨% ហើយនៅឆ្នាំក្រោយ អត្រានេះនឹងធ្លាក់ចុះដល់១,៥%ផងដែរ ។
គួរបញ្ជាក់ថា សហភាពអឺរ៉ុប និងអង់គ្លេសបានខ្វែងគំនិតគ្នាកាលពីថ្ងៃចន្ទ បន្ទាប់ពីលោកស្រីនាយករដ្ឋមន្ត្រី Theresa May ថ្លែងថា ការសម្រេចចិត្ត គឺនៅលើតុលាការ EU ខណៈការចរចាពី Brexit បានឈានដល់ដំណាក់កាលទី៥ ។
ការចរចាបានជាប់គាំងលើបញ្ហាចំនួន៣ រួមមាន ទឹកប្រាក់ដែលអង់គ្លេសត្រូវបង់ដោយសារការចាកចេញពី EU, សិទ្ធិរបស់ប្រជាពលរដ្ឋ EU ក្នុងការរស់នៅអង់គ្លេស និងអនាគតព្រំប្រទល់រវាងខេត្ត Northern Ireland របស់អង់គ្លេស និងអៀរឡង់ ។
កាលពីថ្ងៃពុធ លោក Hammond បានប្រាប់ថា បញ្ហាដែលប៉ះពាល់ដល់កំណើនសមត្ថភាពផលិតរបស់ប្រទេស រួមមាន ហេដ្ឋារចនាសម្ព័ន្ធសាធារណៈដែលមិនទាន់អភិវឌ្ឍន៍ និងកង្វះខាតពលករជំនាញ៕
ចែករំលែកព័តមាននេះ