រាជធានីភ្នំពេញ ៖ នារសៀលថ្ងៃទី២២ សីហា នៅសាលប្រជុំក្រសួងធម្មការ និងសាសនា មានប្រារព្ធពិធីផ្សព្វផ្សាយនាទីព្រះពុទ្ធសាសនាផ្សារភ្ជាប់នឹងសង្គមលើកទី១៥ ក្រោមអធិបតីភាពលោកមិន ឃិន រដ្ឋមន្ត្រីក្រសួងធម្មការ និងសាសនា និងលោកជំទាវ។ ចូលរួមក្នុងឱកាសនោះមានអស់លោក លោកជំទាវជារដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ប្រធានមន្ទីរធម្មការ និងសាសនាទាំង២៤ខេត្ត-រាជធានី និងលោកអាចារ្យជាង៤០០នាក់ ដែលមករៀនសូត្រតួនាទី និងភារកិច្ចអាចារ្យចាប់តាំងពីថ្ងៃទី១៨-២៥ សីហា ឆ្នាំ២០១១ ។
លោករដ្ឋមន្ត្រី មិន ឃិន មានប្រសាសន៍ថា ក្រោមគំនិតផ្តួចផ្តើមដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្រសួងធម្មការ និងសាសនា មានតួនាទីសំខាន់ក្នុងការប្រមូលផ្តុំលោកអាចារ្យក្នុងទូទាំងប្រទេសយកមកសិក្សារៀនសូត្រ និងតម្រង់ទិសអាចារ្យ ដើម្បីផ្សព្វផ្សាយនូវអារ្យធម៌ប្រពៃណីជាតិខ្មែរ ឱ្យឯកភាពគ្នាជាធ្លុងមួយនៅគ្រប់ពិធីបុណ្យដែលមាននៅក្នុងព្រះរាជាណាចក្រកម្ពុជាយើង ។
លោករដ្ឋមន្ត្រីមានប្រសាសន៍ទៀតថា ក្នុងការសិក្សារៀនសូត្រពីតួនាទី និងភារកិច្ចអាចារ្យ ក៏មាននាទីព្រះពុទ្ធសាសនាផ្សារភ្ជាប់នឹងសង្គម ហើយផ្សព្វផ្សាយតាមប្រព័ន្ធទូរទស្សន៍គ្រប់ប៉ុស្តិ៍ តាមកាស្សែតវីដេអូ តាមសារព័ត៌មាន។ល។ ដើម្បីឱ្យប្រជាពលរដ្ឋនៅទូទាំងប្រទេសបានឃើញ បានយល់ ហើយយកទៅពិចារណា តើសង្គមកម្ពុជាបច្ចុប្បន្នរីកចម្រើនរបៀបណា? កន្លងមកក្រសួងធម្មការ និងសាសនា បានពិនិត្យឃើញគម្រោងបុណ្យនីមួយៗប្រារព្ធពិធីប្លែកៗពីគ្នា ដូច្នេះហើយបានជាក្រសួងធម្មការ និងសាសនាក្រោមគំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានផ្តល់អនុសាសន៍ល្អៗដល់ក្រសួងធម្មការ និងសាសនាកែសម្រួលឱ្យមានការឯកភាពជាធ្លុងមួយក្នុងទូទាំងប្រទេស។ ហេតុនេះហើយទើបក្រសួងធម្មការ និងសាសនាអញ្ជើញលោកអាចារ្យទាំង២៤ខេត្ត-រាជធានីមករៀនសូត្រពីតួនាទី និងភារកិច្ចរបស់អាចារ្យដើម្បីតម្រង់ទិសយកភាពសុក្រឹត និងត្រឹមត្រូវឱ្យប្រជាពលរដ្ឋកម្ពុជាគោរពប្រតិបត្តិទៅតាមប្រពៃណីជាតិខ្មែរយើង ។
លោករដ្ឋមន្ត្រី មិន ឃិន បានគូសបញ្ជាក់អំពីនាទីព្រះពុទ្ធសាសនាផ្សារភ្ជាប់នឹងសង្គមលើកទី១៥ ដែលមានការសម្តែងព្រះធម៌ពីសំណាក់ព្រះឧត្តមមុនី ចរិយា ឈឹង ប៊ុនឈា សមាជិកថេរសភា និងជាព្រះចៅអធិការវត្តស្រះចក ព្រះញាណកោសល្យ យ៉ន សេងយៀត សាកលវិទ្យាធិការរងនៃ សាកលវិទ្យាល័យព្រះសីហនុរាជ ព្រះមុនីបាលោ ជួន កក្កដា , ព្រះអង្គរង្សា ភារ ជាឧទ្ទេសសាចារ្យ ព្រះអង្គ ប៊ុន សារ៉ាត ជាឧទ្ទេសសាចារ្យបានឡើងសម្តែងព្រះធម៌ស្តីពីវឌ្ឍនធម៌ ៕
ចែករំលែកព័តមាននេះ