អ្នកចាញ់ក្តី៣គ្រួសារ ទទួលបានដំណោះស្រាយពីអាជ្ញាធរ
ខេត្តកណ្ដាល ៖ បន្ទាប់ពីអនុវត្តសាលដីកាដ៏ចម្រូងចម្រាស បង្កឲ្យមានការភ្ញាក់ផ្អើលដល់មហាជនរួចមក អ្នកចាញ់ក្ដី៣គ្រួសារ រស់នៅភូមិទួលក្រសាំង
ខេត្តកណ្ដាល ៖ បន្ទាប់ពីអនុវត្តសាលដីកាដ៏ចម្រូងចម្រាស បង្កឲ្យមានការភ្ញាក់ផ្អើលដល់មហាជនរួចមក អ្នកចាញ់ក្ដី៣គ្រួសារ រស់នៅភូមិទួលក្រសាំង ឃុំរកាខ្ពស់ ស្រុកស្អាង ទួលបានដំណោះស្រាយសមរម្យពីអាជ្ញាធរគឺទទួលបានដីសង់លំនៅឋានថ្មី និងថវិកាមួយចំនួន។ អាជ្ញាធរខេត្តកណ្ដាល បានដោះស្រាយបញ្ចប់ នៅថ្ងៃទី១១ ខែកញ្ញា ដោយបើកកិច្ចប្រជុំរកដំណោះស្រាយនេះ ធ្វើឡើងកាលពីព្រឹកថ្ងៃទី១១ កញ្ញា នៅសាលាខេត្តកណ្ដាល។ លោកបណ្ឌិត ម៉ៅ ភិរុណ អភិបាលខេត្តកណ្ដាល អនុវត្តរូបមន្ត ឈ្នះឈ្នះ ដោយមានការចូលរួម ពីមន្ត្រីពាក់ព័ន្ធច្រើននាក់ និងភាគីចាញ់ក្ដី ភាគីឈ្នះក្ដីចូលរួម។
មន្ត្រីសាលាខេត្តកណ្ដាលបានឲ្យដឹងថា កិច្ចប្រជុំរកដំណោះស្រាយឲ្យភាគីចាញ់ក្ដីនេះទទួលបានជោគជ័យ ហើយភាគីចាញ់ក្ដី ព្រមទទួលយកដំណោះស្រាយដោយសប្បាយចិត្ត។ ការដោះស្រាយជូនអ្នកទាំងបីនេះមាន ១-លោក ប៉ុន ថន បានទទួលដីទំហំ១០គុណនឹង១២ម៉ែត្រ ប្រាក់ចំនួន៣ពាន់ដុល្លារ ហើយជួយធ្វើផ្ទះឲ្យទៀត។ទី២-ឈ្មោះ អ៊ុង អ៊ីម ទទួលបានដីទំហំ១២គុណនឹង៥ម៉ែត្រ និងប្រាក់១៥០០ដុល្លារ ហើយជួយធ្វើផ្ទះឲ្យ។ ទី៣-ឈ្មោះ សែ គឹមអូន ទទួលបានដីទំហំ១២គុណនឹង៥ម៉ែត្រ និងប្រាក់១៥០០ដុល្លារ ហើយជួយធ្វើផ្ទះឲ្យដូចគ្នាដែរ ដែលដីតាំងនេះ គឺនៅតំបន់ទួលក្រសាំង។ លោកអភិបាលខេត្តបានចាត់ឲ្យលោកអភិបាលស្រុកស្អាង ចាត់ការចុះមើលដីជាបន្ទាន់។
លោក ព្រំ វណ្ណឌិន អភិបាលស្រុកស្អាង បានប្រាប់ឲ្យ ដឹងថា នៅព្រឹកថ្ងៃទី១២ កញ្ញា អាជ្ញាធរស្រុក កំពុងរកដីរបស់រដ្ឋ នៅស្រុកស្អាង ដើម្បីវាស់ចែកជូនឱ្យពួកគាត់ទាំងបីគ្រួសារដែលយល់ព្រមទទួលយកតាមដំណោះស្រាយនោះ។ គួរបញ្ជាក់ថា សមត្ថកិច្ចចម្រុះ ដឹកនាំដោយមន្ត្រីសាលាដំបូងខេត្តកណ្ដាល ចុះអនុវត្តសាលដីកាតុលាការកំពូល កាលពីព្រឹកថ្ងៃទី៨ កញ្ញា នៅភូមិទួលក្រសាំង ឃុំរកាខ្ពស់ស្រុកស្អាង ដោយធ្វើការរុះផ្ទះចំនួន៣ខ្នង ខាងកើតជាប់ផ្លូវជាតិលេខ២១ ប្រគល់ដីទៅឲ្យភាគីឈ្នះក្តី៕
ចែករំលែកព័តមាននេះ