អ្នកកាសែតបារាំង លោក STEPHAN VILLENEUVE បានស្លាប់ក្រោយរងរបួសធ្ងន់មកពីការផ្ទុះគ្រាប់មីនមួយគ្រាប់នៅក្រុងម៉ូសស៊ុលភាគខាងជើងអីុរ៉ាក់ ។ នេះជាការប្រកាសរបស់ទូរទស្សន៍បារាំងនាថ្ងៃទី២០ មិថុនា ។
មុននេះ ទូរទស្សន៍បារាំង និងអង្គការអ្នកយកព័ត៌មានគ្មានព្រំដែន RSF ប្រកាសថា អ្នកកាសែតបារាំង៣នាក់រងរបួសក្នុងទីក្រុងធំទី២នេះរបស់អីុរ៉ាក់ ហើយបញ្ជូនទៅព្យាបាលក្នុងមន្ទីរពេទ្យនៃមូលដ្ឋានយោធាអាមេរិកមួយ ចំណែកអ្នកកាសែតជនជាតិឃើតម្នាក់ដែលអមដំណើរពួកគេត្រូវស្លាប់ ។
លោក STEPHAN VILLENEUVE និងសហការី លោកស្រី VERONIQUE ROBERT រងរបួសដោយសារការផ្ទុះគ្រាប់មីន ពេលរៀបចំធ្វើសេចក្តីរាយការណ៍ពីការតាមប្រមាញ់ពួកជីហាដក្នុងការប្រយុទ្ធគ្នានៅក្រុងម៉ូសស៊ុល ។ ជាអ្នកកាសែតរាយការណ៍តាមរូបភាពលោក STEPHAN VILLENEUVE ធ្លាប់ប្រឡូកយកព័ត៌មានពីជម្លោះជាច្រើនលើពិភពលោកក្នុងអាជីពរបស់លោក ។
ចំណែកអ្នកកាសែតបារាំងទី៣ ដែលរងរបួសស្រាល លោក SAMUEL FOREY ធ្វើការឱ្យសារព័ត៌មានជាច្រើន ក្នុងនោះមានកាសែត LE FIGARO កាសែត TELERAMA និងកាសែត LES INROCKS ។ រីឯលោក BAKHTIYAR ADDAD ធ្វើការឱ្យសារព័ត៌មានជាច្រើន ក្នុងនោះមានទូរទស្សន៍បារាំងដែរ បានត្រូវស្លាប់នៅនឹងកន្លែង ។ អ្នកកាសែតជនជាតិឃើតនេះធ្លាប់មកព្យាបាលរបួសកាលពីឆ្នាំទៅមិញនៅបារាំង ក្រោយរងរបួសដោយសារខ្មាន់កាំភ្លើងម្នាក់បាញ់ពេលចុះទៅយកព័ត៌មាននៅក្រុងហ្វាល់លូចា អីុរ៉ាក់ ។ អ្នកកាសែតទាំង៤នាក់នេះទៅតាមកងកម្លាំងពិសេសអីុរ៉ាក់ក្នុងការប្រយុទ្ធដណ្តើមយកក្រុងម៉ូសស៊ុលពីក្រុមរដ្ឋអ៊ិស្លាម ៕
ចែករំលែកព័តមាននេះ