ប្រទេសឥណ្ឌា ៖ កូរ៉េខាងជើងបានបាត់បង់ដៃគូពាណិជ្ជកម្មដ៏សំខាន់មួយ ក្នុងចំណោមដៃគូពាណិជ្ជកម្មធំៗរបស់ពួកគេ បន្ទាប់ពីប្រទេស ឥណ្ឌា បានហាមឃាត់ការធ្វើពាណិជ្ជកម្ម ជាមួយនឹងប្រទេសនេះ ។
រដ្ឋាភិបាលឥណ្ឌាបានប្រកាសកាលពីសប្ដាហ៍ មុនថា ពួកគេកំពុងតែផ្អាករាល់ការធ្វើពាណិជ្ជកម្មលើកលែងតែអាហារ និងឱសថប៉ុណ្ណោះ ខណៈដែលភាពតានតឹងកាន់តែខ្លាំងឡើងៗក្នុងឧបទ្វីបកូរ៉េ ហើយរដ្ឋាភិបាលអាមេរិកបានជំរុញឲ្យមានវិធានការជាសកលដើម្បីផ្តាច់ខ្លួនចេញពីកូរ៉េខាងជើង ។
ការហាមឃាត់នេះបានអនុម័តក្នុងខែមេសាដែលធ្វើឲ្យប្រទេសឥណ្ឌាដើរស្របទៅទៅនឹងការដាក់ទណ្ឌកម្មពីអង្គការសហប្រជាជាតិលើប្រទេសនេះផងដែរ ។
ក្រុមប្រឹក្សាសន្តិសុខនៃអង្គការសហប្រជាជាតិបានព្យាយាមអស់រយៈពេលច្រើនជាង១០ ឆ្នាំមកហើយក្នុងការបញ្ចប់កម្មវិធីអាវុធនុយក្លេអ៊ែររបស់កូរ៉េខាងជើងតាមរយៈការដាក់ទណ្ឌកម្មសេដ្ឋកិច្ច។
ប្រទេសលោកខាងលិចភាគច្រើនបានបញ្ឈប់ការធ្វើពាណិជ្ជកម្មជាមួយប្រទេសនេះ។ យោងតាមទិន្នន័យពីមូលនិធិរូបិយប័ណ្ណពិភពលោកបានឲ្យដឹងផងដែរថា ប្រទេសឥណ្ឌាធ្លាប់ជាដៃគូពាណិជ្ជកម្មធំជាងគេលំដាប់លេខ៣របស់កូរ៉េខាងជើង ។
យោងតាមទិន្នន័យពីរដ្ឋាភិបាលបានឲ្យដឹងទៀតថា ប្រទេសឥណ្ឌាបាននាំចេញផលិតផលដែលមានតម្លៃសរុប១១១លានដុល្លារទៅកាន់កូរ៉េខាងជើងក្នុងអំឡុងឆ្នាំ២០១៥-២០១៦ ហើយបាននាំចូលផលិតផលមានតម្លៃសរុបប្រមាណ៨៨លានដុល្លារផងដែរ ។
ប្រទេសឥណ្ឌាបានរក្សាទំនាក់ទំនងការទូតជាមួយនឹងកូរ៉េខាងជើង ហើយដីកាក្នុងការហាមឃាត់ការធ្វើពាណិជ្ជកម្មនេះ គឺជាលើកទីមួយសម្រាប់ឥណ្ឌាក្នុងការចេញបញ្ជាជាផ្លូវការថា នឹងសម្របខ្លួនតាមសេចក្តីសម្រេចទាក់ទិននឹងការដាក់ទណ្ឌកម្មរបស់អង្គការសហប្រជាជាតិ ។
ក្នុងឆ្នាំ២០១៥ ប្រទេសឥណ្ឌាបានបោះឆ្នោតអនុបវាទលើសេចក្តីសម្រេចរបស់អង្គការសហប្រជាជាតិទាក់ទិននឹងការប្រឆាំងនឹងការរំលោភបំពានសិទ្ធិមនុស្សដែលបានកើតមានឡើងនៅកូរ៉េខាងជើង ។ ក្នុងឆ្នាំដដែលនោះ រដ្ឋាភិបាលឥណ្ឌាបានស្វាគមន៍រដ្ឋមន្ត្រីការទូតរបស់កូរ៉េខាងជើងមកធ្វើទស្សនកិច្ចក្នុងប្រទេសខ្លួនផងដែរ ។
ប្រទេសឥណ្ឌាក៏ធ្លាប់អនុញ្ញាតឲ្យជនជាតិកូរ៉េខាងជើងធ្វើដំណើរមកកាន់ប្រទេសខ្លួនដើម្បីធ្វើការហ្វឹកហាត់ផងដែរ ប៉ុន្តែក្នុងពេលបច្ចុប្បន្នរាល់ទាហាន ប៉ូលិស អ្នកវិទ្យាសាស្ត្រ និងអ្នកបច្ចេកទេសរបស់កូរ៉េខាងជើង ត្រូវបានហាមឃាត់មិនឲ្យចូលនោះទេ ។
ឥណ្ឌាក៏បាននិយាយថា ពួកគេបានបិទរាល់មូលនិធិ និងទ្រព្យហិរញ្ញវត្ថុរបស់រដ្ឋាភិបាលកូរ៉េខាងជើងដែលមានក្នុងទឹកដីខ្លួនទៀតផង ៕
ចែករំលែកព័តមាននេះ