ប្រទេសចិន ៖ ការិយាល័យស្ថិតិជាតិចិនឱ្យដឹងថា ប្រាក់ចំណេញក្នុងក្រុមហ៊ុនឧស្សាហកម្មធំៗបានកើនឡើងយឺតនៅខែមីនា ។ ការថយចុះនេះមកពីការដំឡើងតម្លៃវត្ថុធាតុដើមហួសហេតុ និងការធ្លាក់ចុះកំណើនប្រាក់ចំណេញ
ប្រទេសចិន ៖ ការិយាល័យស្ថិតិជាតិចិនឱ្យដឹងថា ប្រាក់ចំណេញក្នុងក្រុមហ៊ុនឧស្សាហកម្មធំៗបានកើនឡើងយឺតនៅខែមីនា ។ ការថយចុះនេះមកពីការដំឡើងតម្លៃវត្ថុធាតុដើមហួសហេតុ និងការធ្លាក់ចុះកំណើនប្រាក់ចំណេញក្នុងឧស្សាហកម្មរ៉ែ ធ្យូងថ្ម ប្រេង និងដែកថែប ។
ប្រាក់ចំណេញឧស្សាហកម្មបានកើនឡើង២៣,៨% ពីមួយឆ្នាំទៅមួយឆ្នាំកាលពីខែមីនា ស្មើនឹង៦៨៨,៧ប៊ីលានយន់ (៩៩,៩ប៊ីលានដុល្លារអាមេរិក) ធ្លាក់ចុះពី៣១,៥%សម្រាប់ខែមករា និងខែកុម្ភៈ ប៉ុន្តែវាលឿនជាងកំណើន៨,៥%ក្នុងខែមីនា ឆ្នាំ២០១៦ ។ នេះបើតាមទិន្នន័យផ្លូវការ ។
លោក He Ping អ្នកវិភាគក្នុងការិយាល័យមួយឱ្យដឹងថា កំណើនប្រាក់ចំណេញនៅតែខ្លាំងក្នុងខែមីនា ឯការថយចុះនេះបង្ហាញពីការវិលត្រឡប់មកលក្ខខណ្ឌធម្មតាវិញ ។ តម្លៃវត្ថុធាតុដើមបានកើនឡើងលឿនជាងតម្លៃផលិតផលដែលក្រុមហ៊ុនលក់ ហើយធ្វើឲ្យពួកគេខាតបង់ប្រាក់ចំណេញ ។
លោកបន្តថា ឧស្សាហកម្មប្រេង ធ្យូងថ្ម គីមី និងដែកថែបបានទទួលរងឥទ្ធិពលច្រើនបំផុតពីការផ្លាស់ប្តូរតម្លៃ និងប្រាក់ចំណេញមួយខ្ពស់កាលពីឆ្នាំមុន ដែលមានចំណែក៨,៥%ក្នុងការថយចុះកំណើនប្រាក់ចំណេញឧស្សាហកម្មជារួម ។
ទោះជាយ៉ាងណា ការិយាល័យនេះឱ្យដឹងថា ប្រាក់ចំណេញផ្នែកឧស្សាហកម្មបានប្រែប្រួលជាវិជ្ជមាន ខណៈប្រាក់ចំណេញកើនឡើងកាន់តែលឿនលើទំនិញប្រើប្រាស់ និងក្រុមហ៊ុនផលិតឧបករណ៍ ដែលបង្ហាញពីរចនាសម្ព័ន្ធប្រសើរឡើង ។
« ប្រាក់ចំណេញខ្លាំងនៅត្រីមាសដំបូង និងការកើនឡើង១៤,១%នៃប្រាក់ចំណូលសារពើពន្ធ បានកំណត់គ្រឹះល្អសម្រាប់គុណភាពកំណើនប្រសើរឡើងនៅឆ្នាំ២០១៧ » ។ នេះបើតាមលោក Ning Jizhe អនុប្រធានគណៈកម្មការអភិវឌ្ឍន៍ និងកំណែទម្រង់ជាតិ បានប្រាប់កាសែត People’s Daily កាលពីថ្ងៃពុធ ។
រដ្ឋាភិបាលចិនបានទម្លាក់ទិសដៅកំណើនសេដ្ឋកិច្ចមកត្រឹមប្រហែល៦,៥%នៅឆ្នាំនេះ ពីចន្លោះ៦,៥ទៅ៧% កាលពីឆ្នាំមុន ។
ក្រុមអ្នកវិភាគនិយាយថា កំណើននៅត្រីមាសដំបូងបានឮកើនឡើងលឿនជាងការរំពឹងទុក គឺ៦,៩% ដែលអាចជំរុញគោលដៅសេដ្ឋកិច្ចពេញ១ឆ្នាំ ៕
ចែករំលែកព័តមាននេះ