ប្រធានាធិបតីហ្វ៊ីលីពីន លោក RODRIGO DUTERTE វាយតម្លៃកាលពីថ្ងៃទី២៩ មេសា ថា មេដឹកនាំកូរ៉េខាងជើង លោកគីម ជុងអ៊ុន ចង់បាន «អវសាននៃពិភពលោក» ។
ប្រឈមមុខនឹងការគំរាមកំហែងនេះ លោកស្នើដល់សហរដ្ឋអាមេរិកកុំឱ្យធ្លាក់ក្នុងល្បិចកលរបស់លោកគីម ជុងអ៊ុន ដោយលោកយល់ថា ការខុសឆ្គងដ៏សាមញ្ញមួយនឹងអាចឈានដល់ជម្លោះនុយក្លេអ៊ែរមួយ ។
ក្នុងឋានៈជាប្រធានបច្ចុប្បន្នរបស់អាស៊ាន លោក RODRIGO DUTERTE ត្រូវជួបពិភាក្សាតាមទូរស័ព្ទនាថ្ងៃទី២៩ មេសា ជាមួយលោកដូណាល់ ត្រាំ ។ ក្នុងសន្និសីទសារព័ត៌មានមួយ លោកថ្លែងថា លោកត្រូវនិយាយជាមួយប្រធានាធិបតីអាេមរិកឱ្យធ្វើអ្វីគ្រប់យ៉ាងដើម្បីចៀសវាងសង្គ្រាមមួយ ដែលបណ្តាផលវិបាកនៃសង្គ្រាមនេះនឹងជាគ្រោះមហន្តរាយ ។
ស្តីពីមេដឹកនាំវ័យក្មេងកូរ៉េខាងជើង លោកថ្លែងថា «គេកំពុងតែលេងសើចជាមួយនរណាម្នាក់ដែលចូលចិត្តបាញ់មីស៊ីល» ។ ខ្ញុំពុំអាចឆែកមើលក្នុងក្បាលរបស់លោកគីម ជុងអ៊ុន ឡើយ ព្រោះខ្ញុំពុំដឹងអ្វីដែលមានក្នុងនោះពិតប្រាកដ ក៏ប៉ុន្តែរូបគេកំពុងតែអូសទាញភពផែនដីទៅរកបាតជ្រោះ ។ ជននេះគ្រាន់តែចង់បានទីបំផុតនៃពិភពលោក ហើយបែបនេះនាំឱ្យគេសប្បាយខ្លាំង ។ គេញញឹមគ្រប់ពេល ក៏ប៉ុន្តែអ្វីដែលគេចង់បានពិតប្រាកដគឺទីអវសាននៃពិភពលោក ហើយអូសទាញយើងគ្រប់គ្នាទៅតាមដែរ ។
ចំពោះបញ្ហាកូរ៉េខាងជើង បណ្តាប្រទេសអាស៊ានដែលរួមប្រជុំនៅទីក្រុងម៉ានីលនាថ្ងៃទី២៩ មេសា ព្រមទាំងប្រមុខរដ្ឋហ្វ៊ីលីពីនបានបង្ហាញសារបន្ថែមថា «ចូរកុំលេងជាមួយភ្លើង» ។ លោក RODRIGO DUTERTE ថ្លែងថា អាស៊ានមានការព្រួយបារម្ភខ្លាំងបំផុតចំពោះការវិវត្តន៍នៃសភាពការណ៍ ហើយសហរដ្ឋអាេមរិកត្រូវតែប្រកាន់ការអត់ធ្មត់ ព្រោះប្រទេសទាំង២កំពុងតែលេងល្បែងរបស់ពួកគេ ។ ល្បែងទាំងនោះលេងពុំសប្បាយសោះឡើយ ។ គេត្រូវព្រមានប្រាប់ពិភពលោកទាំងមូលក្នុងនោះរួមទាំងពួកមហាអំណាចផងថា ល្បែងលេងនោះជាក្បាលគ្រាប់នុយក្លេអ៊ែរ ហើយគេត្រូវតែអត់ធ្មត់ ៕
ចែករំលែកព័តមាននេះ