លោកប្រធានខ្ញុំ
(បទកាកគតិ)
-​ លោកប្រធានខ្ញុំ        គោលការណ៍ជាធំ           ខ្ញុំសូមខ្លាចហើយ
  រឿងខ្ញុំតូចសោះ        ដូរដោះឆ្លងឆ្លើយ            មិនលើកទោសឡើយ
                              អាងលើគោលការណ៍។
– ប្រធានធ្វើត្រូវ          ទុក្ខសោកខ្ញុំនៅ              ក្រៀមក្រំចិន្តា
  ខុសពីរបីថ្ងៃ             ចង្រៃអស្ចារ្យ                ថាខុសគោលការណ៍
                             លួចម៉ោងការងារ។
– បើឃើញខ្ញុំខុស       ចាប់ភ្លាមទៅចុះ            នៅក្នុងវេលា
  ខ្ញុំក៏មិនខឹង             ទទឹងទាមទារ               ដល់ហួសច្រើនគ្រា
                            ទើបនឹកបកក្រោយ។
– គោលការណ៍ធំពិត    បើមិនពិនិត្យ              ពិតអាចបណ្តោយ
កូនឈ្លោះនឹងមេ         លួចជេរមុខក្រោយ      ម្យ៉ាងអាចនាំអោយ
                              បែកបាក់សាមគ្គី។
– ដូចពាក្យចាស់ថា     មេថ្កើងសក្តា              មុខមាត់នាទី
 ដ្បិតព្រោះកូនចៅ      ទ្រាំក្តៅវក់វី               មានស៊ីអត់ស៊ី
                            ប្រឹងប្រែងការងារ។
– ហេតុអ្វីមិនយល់    បង្កើតអំពល់                ចងកម្មចងពៀរ
គ្មានក្តីអាណិត        ដល់ចិត្តគ្នីគ្នា                កូនចៅវេទនា
                          លំបាកចិត្តកាយ។
– ចង់ចាប់ចាប់បាន    កុំអោយហួសដាន      នាំមិនសប្បាយ
កូនចៅតវ៉ា              ឡូឡាវែងឆ្ងាយ          រឿងតូចបែកសាយ
                            ក្លាយជារឿងធំ។
– ដប់ម្ភៃនាទី            មិនភ្លេចសំភី              ដូចមិនធំដុំ
ពេលម៉ោងទំនេរ        គ្មានគេមូលផ្តុំ           នាំអោយចិត្តខ្ញុំ
                            ធ្វើមិនតាំងចិត្ត។
– ខ្ញុំសូមផ្តាំថា          បើអាងគោលការណ៍    ត្រឹមត្រូវសុក្រឹត
ចាប់ចុះខុសភ្លាម       ខ្ញុំស្ងៀមស្ងប់ចិត្ត          កែប្រែប្រព្រឹត្ត
                           តាមលោកប្រធាន។
– កុំហួសច្រើនថ្ងៃ     ផ្តើមចិត្តស្រមៃ             អាងលើវិធាន
ចាប់ដាក់កំហុស      សន្តោសផងទាន       សុំចិត្តប្រធាន
                          យល់យោគខ្លះផង ៕
                                                       និពន្ធដោយ លោក លីម ចំរើន