ប្រទេសអង់គ្លេស ៖ Facebook បាននិយាយកាលពីថ្ងៃចន្ទថា បើទោះជានៅមានភាពមិនប្រាកដប្រជាទាក់ទិននឹង Brexit ក្តី ក៏ពួកគេនឹងបើកដំណើរការការិយាល័យធំថ្មីមួយក្នុងទីក្រុងឡុងដ៍នាឆ្នាំខាងមុខ និង
ប្រទេសអង់គ្លេស ៖ Facebook បាននិយាយកាលពីថ្ងៃចន្ទថា បើទោះជានៅមានភាពមិនប្រាកដប្រជាទាក់ទិននឹង Brexit ក្តី ក៏ពួកគេនឹងបើកដំណើរការការិយាល័យធំថ្មីមួយក្នុងទីក្រុងឡុងដ៍នាឆ្នាំខាងមុខ និងបង្កើតការងារប្រមាណ៥០០ ។
ក្រុមហ៊ុនខាងលើនិយាយថា ការសម្រេចចិត្តនោះនឹងបង្កើនបុគ្គលិករបស់ខ្លួនក្នុងចក្រភពអង់គ្លេសមកស្មើ១.៥០០នាក់ ហើយប្រទេសអង់គ្លេសនៅបន្តជាទីតាំងដ៏ល្អមួយសម្រាប់ក្រុមហ៊ុនបច្ចេកវិទ្យា ។ ព័ត៌មាននេះត្រូវបានផ្សព្វផ្សាយបន្ទាប់ពីក្រុមហ៊ុនបច្ចេកវិទ្យាសហរដ្ឋអាមេរិក Google បញ្ជាក់ថា ពួកគេនឹងពង្រីកទីតាំងការិយាល័យក្នុងក្រុងឡុងដ៍ ដែលអាចនឹងបង្កើតការងារប្រមាណ៣ពាន់ ។
ការប្រកាសរបស់ Facebook នេះនឹងត្រូវបានបញ្ជាក់ម្តងទៀតក្នុងកិច្ចប្រជុំប្រចាំឆ្នាំរបស់សហព័ន្ធនៃឧស្សាហកម្មអង់គ្លេស ។
អ្នកស្រី Nicola Mendelsohn អនុប្រធានរបស់ក្រុមហ៊ុននេះក្នុងអឺរ៉ុប មជ្ឈិមបូព៌៌ា និងអាហ្វ្រិក និយាយថា ៖ « ចក្រភពអង់គ្លេសនៅបន្តជាទីតាំងដ៏ល្អមួយសម្រាប់ក្រុមហ៊ុនបច្ចេកវិទ្យា ហើយវាជាផ្នែកមួយដ៏សំខាន់នៃប្រវត្តិសាស្ត្ររបស់ Facebook ។ ពួកយើងបានមកដល់ក្រុងឡុងដ៍ក្នុងឆ្នាំ២០០៧ ជាមួយនឹងមនុស្សមួយចំនួនប៉ុណ្ណោះ ប៉ុន្តែនៅចុងឆ្នាំក្រោយ ពួកយើងនឹងមានការិយាល័យធំថ្មីមួយ និងមានគម្រោងផ្តល់ការងារប្រមាណ១.៥០០នាក់ ។ ការងារភាគច្រើនទាក់ទិននឹងជំនាញវិស្វកម្ម ព្រោះប្រទេសនេះមានមូលដ្ឋានវិស្វកម្មធំជាងគេក្រៅពីសហរដ្ឋអាមេរិក » ។
គួរបញ្ជាក់ថា កាលពីថ្ងៃអង្គារមុន Google បានប្រកាសថា ពួកគេនឹងបន្ថែមអគារមួយនៅក្រៅស្ថានីយរថភ្លើង King’s Cross ក្នុងទីក្រុងឡុងដ៍ ។ ការងារប្រមាណ៣ពាន់នឹងត្រូវបានបង្កើត ហើយបុគ្គលិកសរុបប្រមាណ៧ពាន់នាក់នឹងធ្វើការនៅទីតាំងនោះ ដែលនឹងចាប់ផ្តើមដំណើរការក្នុងឆ្នាំ២០១៨ ៕
ចែករំលែកព័តមាននេះ