ខេត្ដព្រះវិហារ ៖ ភ្ញៀវទេសចរជាតិ និងអន្តរជាតិ បាននាំគ្នាមកកម្សាន្តនៅរមណីយដ្ឋានវប្បធម៌ប្រវត្តិសាស្ត្រធំៗចំនួន៤ក្នុងខេត្តព្រះវិហាររយៈពេល៣ថ្ងៃនៃព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប មាន
ខេត្ដព្រះវិហារ ៖ ភ្ញៀវទេសចរជាតិ និងអន្តរជាតិ បាននាំគ្នាមកកម្សាន្តនៅរមណីយដ្ឋានវប្បធម៌ប្រវត្តិសាស្ត្រធំៗចំនួន៤ក្នុងខេត្តព្រះវិហាររយៈពេល៣ថ្ងៃនៃព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប មានការកើនឡើងជាងឆ្នាំមុនៗ រីឯរមណីយដ្ឋានខ្លះបានថយចុះបន្តិចបន្តួច និងមិនមានអ្វីគួរឲ្យកត់សម្គាល់ឡើយ ។
លោក ហុង វ៉ាទីន មន្ត្រីស្ថិតិនៃមន្ទីរទេសចរណ៍ខេត្តព្រះវិហារ បានប្រាប់ឱ្យដឹងនៅរសៀលថ្ងៃទី១៦ វិច្ឆិកា ថា ភ្ញៀវទេសចរជាតិ និងអន្តរជាតិដែលមកកម្សាន្តនៅរមណីយដ្ឋានវប្បធម៌ប្រវត្តិសាស្ត្រធំៗចំនួន៤កន្លែងក្នុងនោះមានប្រាសាទព្រះវិហារ ប្រាសាទព្រះខ័នកំពង់ស្វាយ ប្រាសាទកោះកេរ និងរមណីយដ្ឋានទឹកធ្លាក់ព្រះនិមិត្ត គឺមានការកើនឡើងជាងឆ្នាំមុនៗបន្តិចបន្តួច ។ ដោយឡែករមណីយដ្ឋានខ្លះទៀតបែរជាមានការថយចុះតិចតួចទៅវិញ ។ លោកបានកត់សម្គាល់ថា បើទោះបីអាកាសធាតុនៅខេតព្រះវិហារ មានភាពក្តៅខ្លាំងក៏ដោយ តែភ្ញៀវទេសចរជាតិ និងអន្តរជាតិ នៅតែបន្តមកទស្សនាកម្សាន្តជាប្រចាំមិនថាពេលបុណ្យជាតិ ឬពិធីបុណ្យផ្សេងៗនោះឡើយ ។
ភ្ញៀវទេសចរជាតិដែលទៅកម្សាន្តនៅរមណីយដ្ឋានវប្បធម៌ប្រវត្តិសាស្ត្រ គឺប្រាសាទកោះកេរបានសម្តែងការពេញចិត្តចំពោះការរៀបចំសណ្តាប់ធ្នាប់នៅតាមបណ្តារមណីយដ្ឋាន ទាំងសុវត្ថិភាពនិងអនាម័យសម្រាប់ភ្ញៀវទេសចរទៅកម្សាន្តជាក់ស្តែងដូចជាសេវាកម្មម្ហូបអាហារមានអនាម័យល្អ និងតម្លៃសមរម្យអាចទទួលយកបាន ។ ភ្ញៀវទេសចរដដែលក៏បានស្នើឱ្យភ្ញៀវទេសចរជាតិក៏ដូចអន្តរជាតិរួមគ្នាជួយសម្អាត និងធ្វើអនាម័យបរិស្ថាននៅតាមតំបន់រមណីយដ្ឋាននានា ឲ្យមានសោភ័ណភាពបន្ថែមទៀត ។
សូមបញ្ជាក់ថា យោងតាមរបាយការណ៍ស្ថិតិភ្ញៀវទេសចរជាតិ និងអន្តរជាតិ ដែលមកកម្សាន្ត រមណីយដ្ឋានវប្បធម៌ប្រវត្តិសាស្ត្រធំៗចំនួន៤ រួមមានប្រាសាទព្រះវិហារ ប្រាសាទព្រះខ័នកំពង់ស្វាយ ប្រាសាទកោះកេរ និងរមណីយដ្ឋានទឹកធ្លាកព្រះនិមិត្តក្នុងខេត្តព្រះវិហារ រយៈពេល៣ថ្ងៃក្នុងឱកាសព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីបទើបតែកន្លងទៅនេះ សរុបមានចំនួន៦៣៥៩នាក់ក្នុងនោះភ្ញៀវទេសចរអន្តរជាតិ មានចំនួន៧១៣នាក់ ៕
ចែករំលែកព័តមាននេះ