សហរដ្ឋអាមេរិក ៖ សប្តាហ៍នេះត្រូវបានចាត់ទុកថា ជាសប្តាហ៍សំខាន់មួយសម្រាប់ទីផ្សារភាគហ៊ុនទូទាំងពិភពលោក រួមទាំងប្រទេសសិង្ហបុរីផងដែរ ដោយភាពមិនប្រាកដប្រជានៅតែបន្តមានឡើងក្នុងការបោះ
សហរដ្ឋអាមេរិក ៖ សប្តាហ៍នេះត្រូវបានចាត់ទុកថា ជាសប្តាហ៍សំខាន់មួយសម្រាប់ទីផ្សារភាគហ៊ុនទូទាំងពិភពលោក រួមទាំងប្រទេសសិង្ហបុរីផងដែរ ដោយភាពមិនប្រាកដប្រជានៅតែបន្តមានឡើងក្នុងការបោះឆ្នោតរបស់សហរដ្ឋអាមេរិកនាថ្ងៃអង្គារនេះ ។
ការបោះឆ្នោតនេះបានកាត់បន្ថយភាពជឿជាក់របស់វិនិយោគិនជាច្រើន និងជំរុញឲ្យវិនិយោគិនមួយចំនួនងាកទៅរកមាសដែលមិនសូវមានហានិភ័យទៀតផង ក្នុងអំឡុងពេលមានការស្ទង់មតិបង្ហាញពីការខិតជិតគ្នាយ៉ាងខ្លាំងនៃការបោះឆ្នោត ។
បើទោះជាបេក្ខជនមកពីគណបក្សប្រជាធិបតេយ្យ អ្នកស្រី Hillary Clinton កំពុងតែនាំមុខក្តី ក៏ការកើនឡើងនៃសន្លឹកឆ្នោតរបស់លោក Donald Trump ក្នុងពេលថ្មីៗនេះបានធ្វើឲ្យមានការពិបាកក្នុងការទស្សន៍ទាយពីលទ្ធផលណាស់ ។
លោក Nicholas Teo អ្នកជំនាញផ្នែកយុទ្ធសាស្ត្រពាណិជ្ជកម្មរបស់ KGI Securities ឲ្យដឹងថា ៖ « ប្រសិនបើលោក Trump ទទួលបានជ័យជំនះនោះ នឹងមានការលក់ចេញនូវប្រាក់ដុល្លារ រួមជាមួយភាគហ៊ុនក្នុងសហរដ្ឋអាមេរិកផងដែរ ។ ហេតុការណ៍នេះជាធម្មតា នឹងទាញតម្លៃរបស់ភាគហ៊ុនទូទាំងពិភពលោកឲ្យធ្លាក់ចុះ » ។
ប៉ុន្តែលោក Alvin Yong បែរជាគិតថា ការលក់ចេញនោះនឹងបញ្ចប់ទៅវិញយ៉ាងលឿន ស្រដៀងនឹងការឆ្លើយតបរបស់ទីផ្សារពិភពលោកទៅលើការប្រកាសពីលទ្ធផលរបស់ការបោះឆ្នោត Brexit ដែរ ។ លោកបន្ថែមថា ៖ « ប្រសិនបើលោក Trump មិនឈ្នះទេនោះ ការកើនឡើងនៃតម្លៃភាគហ៊ុននឹងមិនមានច្រើនឡើយ » ។
ក្រៅពីការបោះឆ្នោតនេះ ទិន្នន័យបង្ហាញពីការកើនឡើងនៃចំនួនការងាររបស់សហរដ្ឋអាមេរិកក្នុងខែតុលា ក៏បានជួយដល់ការព្យាករណ៍ថា នឹងមានការកើនឡើងនៃអត្រាការប្រាក់របស់ធនាគារជាតិអាមេរិកនាខែក្រោយផងដែរ ។
ការងារក្នុងសហរដ្ឋអាមេរិកត្រូវបានបន្ថែមប្រមាណ១៦១.០០០កាលពីខែមុន បន្ទាប់ពីបានកើនឡើង១៩១.០០០ក្នុងខែកញ្ញា ដែលជាចំនួនច្រើនជាងការគិតទុក ៕
ចែករំលែកព័តមាននេះ