ខេត្តសៀមរាប ៖ នាថ្ងៃទី២៣ ខែកញ្ញា ឆ្នាំ២០១៦ ព្រះអាទិត្យនឹងរះចំពីលើកំពូលកណ្តាលនៃប្រាសាទអង្គរវត្ត ចាប់ពីម៉ោង៥ទៅម៉ោង៦ព្រឹក។ ព្រឹត្តិការណ៍នេះតែងកើតមានឡើងជាទៀងទាត់ក្នុងមួយឆ្នាំពីរដងនៅពេលដែលយប់
ខេត្តសៀមរាប ៖ នាថ្ងៃទី២៣ ខែកញ្ញា ឆ្នាំ២០១៦ ព្រះអាទិត្យនឹងរះចំពីលើកំពូលកណ្តាលនៃប្រាសាទអង្គរវត្ត ចាប់ពីម៉ោង៥ទៅម៉ោង៦ព្រឹក។ ព្រឹត្តិការណ៍នេះតែងកើតមានឡើងជាទៀងទាត់ក្នុងមួយឆ្នាំពីរដងនៅពេលដែលយប់ និងថ្ងៃមានរយៈពេលស្មើគ្នា គឺនៅថ្ងៃទី២០និង២១ ខែមីនា និងថ្ងៃទី២១ និង២២ ខែកញ្ញា ។ សម្រាប់ខែកញ្ញា ឆ្នាំ២០១៦នេះ ដោយសារសមរាត្រីនឹងត្រូវកើតមានឡើងនៅម៉ោង៩និង២១នាទីយប់ថ្ងៃទី២២ ខែកញ្ញា ដូច្នេះគេអាចទស្សនាព្រះអាទិត្យរះចំពីលើកំពូលប្រាង្គកណ្តាលនៃប្រាសាទអង្គរវត្តនៅព្រឹកថ្ងៃទី២៣ ខែកញ្ញា ។
កន្លងមករៀងរាល់ពេលនៃព្រឹត្តិការណ៍នេះភ្ញៀវទេសចរជាតិ និងអន្តរជាតិជាច្រើន តែងតែរូតរះក្រោកពីព្រលឹមធ្វើដំណើរទៅប្រាសាទអង្គរវត្តដើម្បីត្រៀមមើលទិដ្ឋភាពថ្ងៃរះដំបូងដ៏អស្ចារ្យ ដែលចំប្រាង្គកណ្តាលនៃប្រាសាទអង្គរវត្ត ដែលជាទិដ្ឋភាពដ៏កម្រនឹងជួបប្រទះប្រចាំឆ្នាំ ។ ដើម្បីបង្កលក្ខណៈងាយស្រួល អាជ្ញាធរជាតិអប្សរាគ្រោងនឹងដាក់បន្ថែមភ្នាក់ងារទេសចរដើម្បីរៀបចំសណ្តាប់ធ្នាប់ និងជួយសម្រួលការកកស្ទះ ចាប់ពីម៉ោង៤ទៀបភ្លឺព្រឹកថ្ងៃទី២៣ខែកញ្ញាតទៅ ។
លោកសុខ សង្វារ អគ្គនាយករងទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរនៃអាជ្ញាធរជាតិអប្សរា បញ្ជាក់ថា ដើម្បីសម្រួលការកកស្ទះមនុស្សដែលអាចនាំឲ្យមានបញ្ហា ផ្សេងៗ ក្នុងអំឡុងពេលទស្សនាថ្ងៃរះចំពីលើកំពូលប្រាង្គកណ្តាលនៃប្រាសាទអង្គរវត្ត អាជ្ញាធរជាតិអប្សរានឹងរៀបចំលំហូរភ្ញៀវ ដោយដាក់ខ្សែដើរទស្សនា ហើយនឹងបន្ថែមកម្លាំងភ្នាក់ងារទេសចរណ៍ឲ្យបានច្រើន ដើម្បីអាចរៀបចំសណ្តាប់ធ្នាប់ និងការពារប្រាសាទ ពីការឡើងជាន់ ឬអង្គុយលើបង្កាន់ដៃនាគជាដើម។
លោកសុខ សង្វារ បញ្ជាក់ថា «យើងស្វាគមន៍ចំពោះការចូលមកទស្សនាព្រឹត្តិការណ៍ដ៏កម្រនេះ ហើយយើងក៏ត្រៀមខ្លួនដើម្បីបញ្ចៀសបញ្ហានានាដែរ ព្រោះថា បើមនុស្សច្រើនសម្រុកមកតែមួយផ្លូវ ហើយយើងរៀបចំទីធ្លាខាងក្រៅមិនទាន់ច្បាស់ជាកកស្ទះហើយអាចមានបញ្ហា ។ តាមការគណនា ស្ពានហាលដែលអាចឈរមើលព្រះអាទិត្យរះបាន គឺអាចផ្ទុកមនុស្សមិនលើសពី៤ពាន់នាក់ទេ ។ ដូច្នេះបើមនុស្សសម្រុកមកមើលច្រើន យើងត្រូវតែរៀបចំទីធ្លាខាងក្រៅលើវាលស្មៅបន្ថែមទៀតទើបធានាសុវត្ថិភាព» ។
ទន្ទឹមនឹងកិច្ចស្វាគមន៍ភ្ញៀវទេសចរនៅពេលនេះ លោកសុខ សង្វារ បានសំណូមពរឲ្យភ្ញៀវទេសចរយោគយល់ និងចូលរួមជាមួយការរៀបចំរបស់ភ្នាក់ងារទេសចរណ៍ដើម្បីបញ្ជៀសបញ្ហា ។ ម្យ៉ាងទៀតការបង្ហាះយន្តហោះដែលគ្មានមនុស្សបើក (Drone) ដើម្បីផ្តិតយករូបភាពពីលើអាកាសក៏មិនអនុញ្ញាតដែរ ដើម្បីបញ្ចៀសការរំខានអារម្មណ៍អ្នកទស្សនាផង និងដើម្បីបញ្ជៀសហានិភ័យពីការធ្លាក់ផង ។ ជាមួយគ្នានេះ អ្នកទេសចរដែលទៅទស្សនា ហើយបានផ្តិតយករូបភាពក្នុងព្រឹត្តិការណ៍នោះ អាចចែករំលែករូបភាពដ៏ទាក់ទាញនេះ តាមរយៈបណ្តាញទំនាក់ទំនងសង្គម ផ្សេងៗមាន facebook ជាដើម សូមភ្ជាប់នឹងនិមិត្តសញ្ញា #angkorequinox ដើម្បីចូលរួមផ្សព្វផ្សាយអំពីអង្គរទៅកាន់ពិភពលោកឲ្យបានទូលំទូលាយបន្ថែមទៀត ៕
ចែករំលែកព័តមាននេះ