ក្នុងចំណោមប្រទេសនៃតំបន់អាស៊ីអាគ្នេយ៍ ហ្វ៊ីលីពីន និងវៀតណាម គឺជាប្រទេសដែលមានសមិទ្ធផលអចលនទ្រព្យនាំមុខគេនៅក្នុងឆ្នាំ២០១៥ ។ នេះបើតាមប្រសាសន៍របស់អគ្គនាយកក្រុមហ៊ុនក្នុងប្រទេសសិង្ហបុរី និងអាស៊ីអាគ្នេយ៍ លោក Chris Fossick ។
លោក Chris Fossick ថ្លែងថា ៖ « វិនិយោគិនមានទំនុកចិត្តមកលើប្រទេសវៀតណាម និងហ្វ៊ីលីពីននៅក្នុងវិស័យអចលនទ្រព្យ ។ ជំនឿទុកចិត្តលើមុខជំនួញ គឺជាឱកាសដែលពួកគេបានសម្លឹងឃើញ ។ ការសម្រេចចិត្តទាំងនោះ គឺពឹងផ្អែកទៅលើលទ្ធភាពនៃកំណើនសេដ្ឋកិច្ចក្នុងឆ្នាំ២០១៦ » ។
តាមរបាយការណ៍ផ្នែកអចលនទ្រព្យបង្ហាញថា ហ្វ៊ីលីពីនបានបន្តជាប្រទេសដែលមានសមិទ្ធផលអចលនទ្រព្យល្អ ទោះបីជាអ្នកវិភាគនិយាយថា បានធ្លាក់ចុះខ្សោយបន្តិចក្តី ពោលគឺពួកគេបានមើលឃើញពីសញ្ញាវិជ្ជមាននៃទីផ្សារការិយាល័យ ដែលទទួលផលប្រយោជន៍ពីវិស័យឧស្សាហកម្ម BPO ។
« ក្រៅពីវិស័យឧស្សាហកម្ម BPO ដែលបានជួយបន្ថែមភាពជោគជ័យលើផ្នែកអចលនទ្រព្យ ក៏មានការគ្រប់គ្រងសេដ្ឋកិច្ច ស្ថិរភាពនយោបាយ និងការអប់រំប្រជាជនវ័យក្មេងផងដែរ » ។ នេះបើតាមប្រសាសន៍របស់លោកស្រី Sigrid Zialcita អគ្គនាយិកាគ្រប់គ្រងការស្រាវជ្រាវប្រចាំអាស៊ីប៉ាស៊ីហ្វិក ។
ទន្ទឹមនឹងនេះ វៀតណាមត្រូវបានគេឲ្យឈ្មោះថា គឺជាប្រទេសដែលមានសមិទ្ធផលអចលនទ្រព្យរីកចម្រើន ចាប់តាំងពីបានសាងសង់តំបន់សេដ្ឋកិច្ចនៅក្នុងទីក្រុងហូជីមិញរួចមក ជាហេតុធ្វើឲ្យវិស័យអចលនទ្រព្យមានសន្ទុះខ្លាំងតែម្តង ។ នៅឆ្នាំក្រោយៗទៀត គេរំពឹងថា ទីផ្សារអចលនទ្រព្យរបស់វៀតណាមនឹងបន្តរីកចម្រើនដូចគ្នានឹងប្រទេសហ្វ៊ីលីពីនដែរ ។
លោក Dung Duong អគ្គនាយកស្រាវជ្រាវនៃក្រុមហ៊ុនអចលនទ្រព្យ CBRE ថ្លែងថា ៖ « ទីផ្សារអចលនទ្រព្យវៀតណាមមានសន្ទុះខ្លាំងក្លាបែបនេះ គឺដោយសារតែសេដ្ឋកិច្ចមានស្ថិរភាព និងកំណើននៃប្រាក់ដុល្លារ ។ ចំណែកប្រាក់ដុងរបស់វៀតណាមបានក្លាយជារូបិយប័ណ្ណដែលខ្លាំងជាងគេនៅក្នុងតំបន់អាស៊ីប៉ាស៊ីហ្វិក ។ លើសពីនេះទៀត ការធ្លាក់ចុះនៃអត្រាការប្រាក់ និងរូបិយប័ណ្ណខ្លាំង ត្រូវបានគេរំពឹងថា នឹងអាចទាក់ទាញវិនិយោគិនបរទេសបន្ថែមទៀតផងដែរ » ៕
ចែករំលែកព័តមាននេះ