ប្រទេសរុស្ស៊ីប្រកាសថា បានចុះហត្ថលេខាលើកុងត្រាមួយជាមួយអីុរ៉ង់ស្តីពីការផ្តល់ប្រព័ន្ធមីស៊ីលដី-អាកាស S-300 ដែលការផ្តល់នេះគឺយោងទៅតាមកិច្ចព្រមព្រៀងមួយដែលចុះហត្ថលេខា
ប្រទេសរុស្ស៊ីប្រកាសថា បានចុះហត្ថលេខាលើកុងត្រាមួយជាមួយអីុរ៉ង់ស្តីពីការផ្តល់ប្រព័ន្ធមីស៊ីលដី-អាកាស S-300 ដែលការផ្តល់នេះគឺយោងទៅតាមកិច្ចព្រមព្រៀងមួយដែលចុះហត្ថលេខារវាងប្រទេសទាំង២ កាលពីជាង៨ឆ្នាំមុន ។
រុស្ស៊ី និងអីុរ៉ង់បានចុះហត្ថលេខាលើកិច្ចព្រមព្រៀងមួយដើម្បីផ្តល់ប្រព័ន្ធមីស៊ីលការពារអាកាស S-300 ជាច្រើនដល់អីុរ៉ង់ ។ ខណៈដែលកាលបរិច្ឆេទពិតប្រាកដនៃការផ្តល់នេះពុំដឹងនៅឡើយ បណ្តាអ្នកជំនាញការរុស្ស៊ីគូសបញ្ជាក់ថា ការផ្តល់លើកដំបូងអាចមានអំឡុងពេលប្រមាណជា១៨ខែទៀត ។
អ្នកជំនាញការទាំងនេះនិយាយថា ដំណាក់កាលនៃការអនុវត្តកិច្ចព្រមព្រៀងនេះនឹងពុំងាយស្រួលឡើយ ព្រោះអីខាងរុស្ស៊ីនៅពុំទាន់មានខ្សែសង្វាក់ផលិតកម្មថ្មីសម្រាប់ឆ្លើយតបសំណើមួយក្នុងរយៈពេលត្រឹម៦ខែខាងមុខទៀតឡើយ ។ ប្រសិនបើអីុរ៉ង់ទាមទារនោះយើងអាចប្រើប្រព័ន្ធមីស៊ីលដែលស្តុកទុកដោយកងទ័ពយើងផ្ទាល់ ដើម្បីបំពេញសេចក្តីត្រូវការភ្លាមៗរបស់ក្រុងតេហេរ៉ង់ ។ ទោះបីយ៉ាងណា យើងគិតថា នេះពុំមែនជាបញ្ហាសំខាន់ឡើយ ព្រោះតាមអ្វីដែលយើងយល់ ភាគីទាំង២និយាយគ្នាពីការផ្តល់ម៉ូដែលថ្មីនៃប្រព័ន្ធមីស៊ីល S-300 ។
កុងត្រាផ្តល់ប្រព័ន្ធមីស៊ីល S-300 ដែលដំបូងគ្រោងទឹកប្រាក់ចំនួន៨០០លានដុល្លារ ត្រូវបានចុះហត្ថលេខាកាលពីឆ្នាំ២០០៧ ។ ក៏ប៉ុន្តែរុស្ស៊ីបានផ្អាកការផ្តល់កាលពីឆ្នាំ២០១០ ដោយសារទណ្ឌកម្មរបស់ អ.ស.ប ប្រឆាំងកម្មវិធីនុយក្លេអ៊ែរអីុរ៉ង់ ។ ក្រុងមូស្គូបានលុបចោលការហាមឃាត់នេះ កាលពីខែមេសាក្រោយកិច្ចព្រមព្រៀងបណ្តោះអាសន្នមួយស្តីពីកម្មវិធីនុយក្លេអ៊ែរអីុរ៉ង់ត្រូវចុះហត្ថលេខារវាងក្រុងតេហេរ៉ង់ និងបណ្តាមហាអំណាចលោកខាងលិច ។
ប្រទេសរុស្ស៊ីបច្ចុប្បន្នប៉ុនប៉ងវិលត្រឡប់មកកាន់តំបន់មជ្ឈឹមបូព៌ាទាំងខាងផ្នែកនយោបាយ យោធា និងសេដ្ឋកិច្ច ។ ក៏ប៉ុន្តែបញ្ហាគេចង់ដឹងថាតើការវិលត្រឡប់នេះអាចទៅរួចទេ ពេលកំពុងមានជម្លោះស៊ីរីជាមួយក្រុមរដ្ឋអ៊ិស្លាម និងខណៈកំពុងមានការប្រជែងគ្នារវាងពួកស៊ីអីុត និងពួកស៊ុននីត ។ រឿងនោះវាស្មុគ្រស្មាញខ្លាំងណាស់ ។ ក្នុងកាលៈទេសៈបែបនេះគេគិតថា ទោះបីជាមានបទពិសោធន៍សម័យសូវៀត ក៏វានឹងមិនសំខាន់ដែរ ។ ក៏ប៉ុន្តែក្រុងមូស្គូចង់ធ្វើអ្វីគ្រប់យ៉ាងសម្រាប់ការវិលត្រឡប់នេះព្រោះមានប្រាក់ច្រើនស្រាប់ហើយ ។
កុងត្រាផ្តល់ប្រព័ន្ធមីស៊ីល S-300 ដល់អីុរ៉ង់បានចូលជាធរមានហើយ ។ នេះជាការប្រកាសកាលពីថ្ងៃទី៩ វិច្ឆិកា កន្លងមកនេះ របស់លោកស័រហ្គេយ ឈាមេហ្សូវ ប្រធានអគ្គនាយករបស់ក្រុមហ៊ុនបច្ចេកវិទ្យាជាន់ខ្ពស់រុស្ស៊ី ROSTEC ក្នុងឱកាសពិព័រណ៍យន្តហោះក្រុងឌូបៃ AIRSHOW 2015 ។
ប្រធានអគ្គនាយកក្រុមហ៊ុន ROSTEC ឱ្យដឹងថា កុងត្រាផ្តល់ប្រព័ន្ធមីស៊ីល S-300 ដល់អីុរ៉ង់ពុំត្រឹមត្រូវបានចុះហត្ថលេខាដោយភាគីទាំង២ប៉ុណ្ណោះទេ ប៉ុន្តែម្យ៉ាងទៀតចូលជាធរមានរួចហើយ ។
អីុស្រាអែល សហរដ្ឋអាមេរិក និងអារ៉ាប៊ី សាអ៊ូឌីត សុទ្ធតែប្រឆាំងនឹងកុងត្រានេះ ព្រោះអីុស្រាអែល និងសហរដ្ឋអាមេរិកនៅពុំទាន់ត្រៀមយល់ព្រមឱ្យអីុរ៉ង់មានឧបករណ៍យោធាសំខាន់បែបនេះឡើយ ៕
ចែករំលែកព័តមាននេះ