ប្រទេសវៀតណាម ៖ ទំហំទឹកប្រាក់នាំចេញរបស់វៀតណាមរហូតមកដល់ខែកញ្ញានេះបានកើនឡើងជិត១០%ឬជិតស្មើនឹង១២០,៧ប៊ីលានដុល្លារ ខណៈការនាំចូលកើន១៦%ឬស្មើនឹង១២៤,៦ប៊ីលានដុល្លារ ។
តាមរបាយការណ៍របស់ក្រសួងផែនការនិងវិនិយោគក្នុងជំនួបនៃកិច្ចប្រជុំនៅទីក្រុងហាណូយបានបង្ហាញថា តួលេខខាងលើនេះបានជំរុញឲ្យមានឱនភាពចំនួន៣,៩ប៊ីលានដុល្លារ។
យោងតាមក្រសួង បើទោះការធ្លាក់ចុះពីមួយខែទៅមួយខែក្នុងខែកញ្ញាមានចំនួន១,៩%ក្តី ក៏ចំណូលពីការនាំចេញសរុបក្នុងអំឡុងពេល៩ខែដំបូងនៃឆ្នាំ២០១៥នេះ ត្រូវបានគេវាយតម្លៃនូវកំណើន៩,៦%ដែរ ធៀបនឹងអំឡុងពេលដូចគ្នាកាលពីឆ្នាំទៅ ដែលមានចំនួនជិត១២០,៧ប៊ីលានដុល្លារ ។
ក្រសួងបានវាយតម្លៃឃើញថា ទំហំទឹកប្រាក់នាំចេញរបស់វៀតណាមនៅចុងខែនេះជួបនឹងភាពមិនដំណើរការរលូន៧៣,២%នៃទិសដៅនាំចេញប្រចាំឆ្នាំចំនួន១៦៥ប៊ីលានដុល្លារ ។
ចំណែកការនាំចេញទៅកាន់ទីផ្សារធំៗបានកើនឡើង ជាពិសេសនៅក្នុងអំឡុងពេល៩ខែដំបូងនេះជាមួយទីផ្សារសហរដ្ឋអាមេរិក កើន១៩,៦% និងសហគមន៍អឺរ៉ុបកើន១២,៤%។ទីផ្សារនាំចេញទាំងពីរនេះស្មើនឹង២០,៦% និង១៨,៩%នៃការនាំចេញសរុបទាំងអស់របស់ប្រទេសវៀតណាម ។
រីឯការនាំចេញទៅកាន់ទីផ្សារចិនក៏បានកើនឡើង១២,៥%ដែរ ដែលវាស្មើនឹង១០,៤%នៃការនាំចេញសរុបទាំងអស់ប្រទេសនេះ ។
នៅក្នុងរយៈពេល៩ខែដំបូងនៃឆ្នាំ២០១៥នេះកំណើននៃការនាំចេញបាននាំមកនូវការកើនឡើងនៃចំណូលនៅក្នុងការនាំចេញផលិតកែច្នៃសម្លៀកបំពាក់ និងឈើ ក៏ដូចជាទូរស័ព្ទនិងគ្រឿង បន្លាស់ផងដែរ ។
ចំពោះការនាំចេញវាយនភ័ណ្ឌ និងសម្លៀកបំពាក់បានកើនឡើង១០,៦%ឬស្មើនឹង១៧,១ប៊ីលានដុល្លារ ស្បែកជើងកើន១៨,៤%(៨,៨ប៊ីលានដុល្លារ)ផលិតផលឈើក៏កើនឡើង៩,១%(៤,៩ប៊ីលានដុល្លារ)ដែរ ខណៈទូរស័ព្ទនិងគ្រឿងបន្លាស់កើន៣៤,៣%(២៣,៣ប៊ីលានដុល្លារ) ។
ទោះជាយ៉ាងណាផលិតផលមួយចំនួនបានបង្ហាញពីការធ្លាក់ចុះផងដែរនៅក្នុងការនាំចេញក្នុងអំឡុងពេលជាមួយគ្នានោះ ដូចជាផលិតផលកសិកម្ម និងគ្រឿងសមុទ្រធ្លាក់ចុះ១០% ដោយសារតែការបោះពួយចុះនៃផលិតផលគន្លឹះបីគឺអង្ករ កាហ្វេ និងកៅស៊ូ ។ ចំណែកការនាំចេញរ៉ែថយចុះ៤៥% ព្រោះតែការធ្លាក់ចុះយ៉ាងគំហុកនៃតម្លៃនាំចេញប្រេងឆៅ ។
ចំពោះការនាំចូល ក្រសួងបានរាយការណ៍មកថា ក្នុងខែកញ្ញាទំហំទឹកប្រាក់នាំចូលសម្រេចបានចំនួន១៤,៣ប៊ីលានដុល្លារកើនឡើង១,២%ធៀបនឹងអំឡុងពេលដូចគ្នាកាលពីឆ្នាំទៅ។ វាបានបន្សល់ទុកនូវការនាំចូលក្នុងរយៈពេល៩ខែដំបូងសម្រេចបានចំនួន១២៤,៦ប៊ីលានដុល្លារកើនឡើង១៥,៩%ពីមួយឆ្នាំទៅមួយឆ្នាំ ។
ក្នុងរយៈពេល៩ខែដំបូងនេះ ប្រទេសវៀតណាមបាននាំចូលផលិតផលគ្រឿងចក្រនិងគ្រឿងបន្លាស់ក្នុងទំហំទឹកប្រាក់ចំនួន២០,៩ប៊ីលានដុល្លារ កុំព្យូរទ័រនិងគ្រឿងបន្លាស់១៧,៣ប៊ីលានដុល្លារ និងគ្រឿងសម្លៀកបំពាក់និងកាត់ដេរ ១១,៣ប៊ីលានដុល្លារ ។
នៅគ្រានោះដែរ វៀតណាមបាននាំចូលពីទីផ្សារអាស៊ានដែលស្មើនឹងជាង៨០%នៃទំហំទឹកប្រាក់នាំចូលសរុបទាំងអស់របស់ខ្លួន ។
នៅក្នុងកិច្ចប្រជុំនោះដែរ ក្រសួងក៏បានបង្ហើបឲ្យដឹងផងដែរថា ការវិនិយោគផ្ទាល់ពីបរទេស(FDI) ក្នុងប្រទេសវៀតណាមបានកើនឡើង៥៣,៤%ពីមួយឆ្នាំទៅមួយឆ្នាំឬស្មើនឹង១៧,១៥ប៊ីលានដុល្លារក្នុងអំឡុងពេល៩ខែដំបូងឆ្នាំ២០១៥ ។
ក្នុងអំឡុងពេលនោះដែរ ការចំណាយនៃការវិនិយោគផ្ទាល់ពីបរទេស ក៏បានបង្ហាញឲ្យឃើញពីការលើកទឹកចិត្តប្រចាំឆ្នាំបានកើនឡើង៨,៤%ដែរឬស្មើនឹង៩,៦៥ប៊ីលានដុល្លារ ។
កាលពីដើមឡើយ រដ្ឋមន្ត្រីផែនការនិងវិនិយោគលោក Bui Quang Vinh បានថ្លែងថា ប្រទេសវៀតណាមបានដាក់ទិសដៅទាក់ទាញវិនិយោគឲ្យបាន២៣ប៊ីលានដុល្លារក្នុងការវិនិយោគផ្ទាល់ពីបរទេសឆ្នាំនេះ ជាមួយនឹងការចំណាយលើការវិនិយោគផ្ទាល់នេះត្រូវបានគេរំពឹងថា នឹងមានចំនួនប្រហែល១២,៥ប៊ីលានដុល្លារ ៕
ចែករំលែកព័តមាននេះ