ខេត្តព្រះសីហនុ ៖ កាលពីព្រឹកថ្ងៃទី១៦ មីនា ២០១១ នៅវត្តឧត្តមព្រឹក្សា ស្ថិតក្នុងភូមិព្រែកក្រាញ់ ឃុំសាមគ្គី ស្រុកព្រៃនប់ ខេត្តព្រះសីហនុ បានរៀបចំពិធីបុណ្យបញ្ចុះខណ្ឌសីមាព្រះវិហារពុទ្ធាភិសេក និងកាត់ខ្សែបូសម្ពោធសមិទ្ធផលនានាមានព្រះវិហារ ដងទង់ សាលាឆាន់ដែលជាអំណោយដ៏ថ្លៃថ្លាពីលោកឧកញ៉ាឡាវ ម៉េងឃីន សមាជិកព្រឹទ្ធសភា និងលោកជំទាវជឹង សុភាព អនុប្រធានទី២កាកបាទក្រហមកម្ពុជា ព្រមទាំងបុត្រា បុត្រី ចៅប្រុស ចៅស្រី។ អញ្ជើញចូលរួមក្នុងពិធីនេះដែរ មានលោកឧកញ៉ា និងលោកជំទាវ និងក្រុមគ្រួសារដែលជាសាមីអ្នកកសាង ក្នុងនោះមានវត្តមានលោកជំទាវ ជា ខេង ស៊ុយ សែម លោកជំទាវឧកញ៉ា យិន ផាន្នី និងលោកជំទាវជាច្រើនរូបទៀត។
ពិធីនេះក៏មានការយាងនិមន្តជាព្រះអធិបតីដោយសម្តេចព្រះពោធិវ័ង្ស អំ លឹមហេង ផងដែរ រួមជាមួយមន្ត្រីអ្នកមុខ អ្នកការ និងពុទ្ធបរិស័ទ ព្រមទាំងកំលាំងប្រដាប់អាវុធចូលរួមយ៉ាងច្រើនកុះករ។ តាមរបាយការណ៍ក្នុងពិធីបុណ្យឱ្យដឹងថា សមិទ្ធផលក្នុងទីវត្តឧត្តមព្រឹក្សា មានព្រះវិហារទំហំ២១គុណ១២ម៉ែត្រ សាលាឆាន់មួយខ្នងមានប្រវែង២១គុណ១៤ម៉ែត្រ និងដងទង់មុខព្រះវិហារចំនួនពីរចាប់ផ្តើមកសាងនៅថ្ងៃទី១ មករា ២០០៨ រួចរាល់នៅថ្ងៃទី៨ សីហា ២០០៩។ សមិទ្ធផលនីមួយៗលំអដោយក្បាច់ចម្លាក់ និងផ្ទាំងគំនូរយ៉ាងស្អាត ដែលចំណាយសរុបជាទឹកប្រាក់អស់ចំនួន៣៨៨.៨៨៨ដុល្លារ ជាអំណោយរបស់លោកឧកញ៉ា ឡាវ ម៉េងឃីន និងលោកជំទាវ ជឹង សុភាព ជាភរិយា ព្រមទាំងបុត្រា បុត្រី និងចៅប្រុស ចៅស្រី។ ក្នុងពិធីកាត់ខ្សែបូសម្ពោធសមិទ្ធផលនោះលោកឧកញ៉ា ឡាវ ម៉េងឃីន និងលោកជំទាវ មានប្រសាសន៍ថា ការកសាងសមិទ្ធ ផលក្នុងវត្តនេះឡើងគឺជាការចូលរួមចំណែកលើកស្ទួយវិស័យព្រះពុទ្ធសាសនា ដែលជាសាសនារបស់រដ្ឋ ហើយក៏ជាទីអារាមសំរាប់ជាទីសក្ការៈរបស់ប្រជាពលរដ្ឋគ្រប់ស្រទាប់ ក៏ដូចជាគោរពតាមគោលការណ៍រួមគ្នាអភិវឌ្ឍលើគ្រប់វិស័យរបស់ប្រមុខរាជរដ្ឋាភិបាលដែលមានសម្តេចតេជោហ៊ុន សែន ជាប្រមុខ។
ព្រះតេជគុណមូល រ៉ន ព្រះ មេគណខេត្តព្រះសីហនុមានថេរដីកាថា វត្តឧត្តមព្រឹក្សានេះគឺជាវត្តដាច់ស្រយាល មានចំងាយពីខេត្តព្រះសីហនុ៦៩គីឡូម៉ែត្រ ហើយចុះពីផ្លូវជាតិលេខ៣ចំងាយ៨គីឡូម៉ែត្រទៀតទើបដល់ ។ វត្តនេះចាប់ផ្តើមកសាងដំបូងក្នុងឆ្នាំ១៩៥៤រហូតមកដល់សម័យប៉ុល ពត ត្រូវបំផ្លាញគ្មានសល់។ លុះដល់ឆ្នាំ១៩៩៥ត្រូវបានរៀបចំឡើងវិញមានសាមណេតែ៤អង្គគង់នៅក្នុងខ្ទមតូចមួយទំហំ៣គុណ៤ម៉ែត្រប៉ុណ្ណោះ ជញ្ជាំងបាំងក្តារ ដំបូលប្រក់ស្បូវ។ ព្រះតេជគុណនៅ សុខា ចៅអធិការវត្តឧត្តមព្រឹក្សាមានថេរដីកាថា ក្រោយពីវត្តនេះត្រូវរបបប៉ុល ពត បំផ្លាញគ្មានសល់មក ក្នុងទីអារាមទាំងមូលមានតែសង្ឃពី៣ទៅ៤អង្គប៉ុណ្ណោះ ។ មានពេលខ្លះព្រះសង្ឃទាំងអស់នាំគ្នាគង់ឆាន់ក្រោមដើមឈើ ព្រោះគ្មានសាលាឆាន់ តែជាសំណាងមានថ្ងៃមួយឧបាសកឡាវ វ៉ាន់ បានយកចង្ហាន់ដោយធ្វើដំណើរតាមទូក ព្រោះពីមុននេះមិនទាន់មានផ្លូវលំចុះពីផ្លូវជាតិមកកាន់វត្តឡើយ ។ ដោយមើលឃើញពីផលវិបាករបស់ព្រះសង្ឃ ឧបាសកឡាវ វ៉ាន់ ក៏ពាំនាំភាពកំសត់អត្តខាត់ទាំងនេះទៅប្រាប់មាតាបិតា គឺលោកឧកញ៉ា ឡាវ ម៉េងឃីន និងលោកជំទាវជឹង សុភាព ហើយក៏ផ្តើមកសាងសមិទ្ធផលទាំងអស់នេះឡើងតែម្តង។ ពិធីបុណ្យនេះមានរយៈពេលបីថ្ងៃ គឺថ្ងៃទី១៦, ១៧ និង១៨ មីនា ដោយមានល្ខោនបាសាក់សំដែងកំសាន្តទល់ភ្លឺផងដែរ។ ពិធីកាត់ឬសសីមានឹងប្រព្រឹត្តទៅនៅថ្ងៃទី១៨ មីនា ជាថ្ងៃបង្ហើយបុណ្យ ៕
ចែករំលែកព័តមាននេះ