ខេត្តកោះកុង ៖ លោក ទៀ សុខា ប្រធានចលនាយុវជនកម្ពុជាក្រុម១៥៧ សាខាព្រះសីហនុ និងលោក ស្រេង ហុង ប្រធានក្រុម១៥៧ សាខាខេត្តកោះកុង នៅថ្ងៃទី២៧ ខែកក្កដា ឆ្នាំ២០១៥ បាននាំចានស្រាក់ និងឆ័ត្រ ដែលជាអំណោយរបស់លោកបណ្ដិត ហ៊ុន ម៉ាណែត ស្ថាបនិកចលនាយុវជនកម្ពុជា ក្រុម១៥៧ និងលោក ម៉ឹង ពន្លក ប្រធានក្រុម១៥៧ ជូនចាស់ៗ១០៥នាក់នៅតំបន់អារ៉ែងសម្រាប់ពួកគាត់ដាក់បាយសម្លទៅវត្តនារដូវបុណ្យភ្ជុំបិណ្ឌនាពេលខាងមុខ ។
ចានស្រាក់ និងឆ័ត្រ ដែលលោក ទៀ សុខា និងលោក ស្រេង ហុង នាំយកទៅប្រគល់ជូននោះ ក្នុងឃុំជំនាប់ មានចំនួន១៤នាក់ ឃុំប្រឡាយមានចំនួន៥៧នាក់ និងឃុំថ្មដូន មានចំនួន៣៤នាក់ ។
ក្រោយចប់ពិធី លោក ទៀ សុខា និងលោក ស្រេង ហុង បានអញ្ជើញប្រជាពលរដ្ឋ និងអាជ្ញាធរមួយចំនួន នៅឃុំជំនាប់ ឃុំប្រឡាយ និងឃុំថ្មដូនពៅ ដើម្បីទទួលទានអាហារពេលល្ងាចជុំគ្នានៅក្បែរកំពង់ដអារ៉ែងដោយក្តីសប្បាយរីករាយក្នុងនាមជាខ្មែរដូចគ្នា ដោយមិនប្រកាន់និន្នាការនយោបាយ ហើយក្នុងពិធីទទួលទានអាហារជុំគ្នានោះ ក៏មានការចូលរួមពីខាងសហគមន៍ក្នុងតំបន់អារ៉ែង លោក វ៉ែន វ៉ន និងសមាជិក របស់អង្គការមាតាធម្មជាតិផងដែរ ។
នៅព្រឹកថ្ងៃទី២៨ ខែកក្កដា ឆ្នាំ២០១៥ លោក ទៀ សុខា និងលោក ស្រេង ហុង រួមនិងក្រុមការងារក៏បានឆ្លៀតទៅថ្វាយបង្គំព្រះចៅអធិការវត្តសុវណ្ណឧទ្យាន ហើយបានបន្តទៅមើលការសិក្សារបស់ក្មេងៗនៅសាលាបឋមសិក្សាភូមិកោះ នាឃុំថ្មដូនពៅ ៕
ចែករំលែកព័តមាននេះ