រាជធានីភ្នំពេញ៖ គម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍សម្រាប់កំណើនប្រកបដោយបរិយាប័ន្ន ក្នុងតំបន់មេគង្គ ត្រូវបានក្រសួងទេសចរណ៍និងធនាគារ អភិវឌ្ឍន៍អាស៊ី (ADB)
រាជធានីភ្នំពេញ ៖ គម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍សម្រាប់កំណើនប្រកបដោយបរិយាប័ន្ន ក្នុងតំបន់មេគង្គ ត្រូវបានក្រសួងទេសចរណ៍ និងធនាគារ អភិវឌ្ឍន៍អាស៊ី (ADB) លើកយកមកពិភាក្សាកាលពីថ្ងៃទី១៣ខែកក្កដាឆ្នាំ២០១៥ នៅទីស្តីការក្រសួង ក្រោមវត្តមានលោកថោង ខុន រដ្ឋមន្ត្រីក្រសួងទេសចរណ៍ និងមានការចូលរួមពីតំណាងក្រសួង ស្ថាប័ន ខេត្តនិងមន្ទីរពាក់ព័ន្ធជាច្រើនរូបទៀត។
លោក ទិត ចន្ថា រដ្ឋលេខាធិការក្រសួងទេសចរណ៍ និងជានាយកគម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍ សម្រាប់កំណើនប្រកបដោយបរិយាប័ន្ន ក្នុងតំបន់មេគង្គបានឱ្យដឹងថា គម្រោងអភិវឌ្ឍន៍ហេដ្ឋារចនា សម្ព័ន្ធទេសចរណ៍ប្រកបដោយបរិយាប័ន្ននៅក្នុងតំបន់មេគង្គ ស្ថិតក្រោមហិរញ្ញប្បទានរបស់ធនាគារអភិវឌ្ឍន៍អាស៊ី (ADB) គ្រាដែលកិច្ចប្រជុំលើកទី១នាថ្ងៃនេះគឺដើម្បីជំរុញការអភិវឌ្ឍផ្ទាល់ក្នុងតំបន់ទាំងមូលនៃខេត្តចំនួន៣ដែលនៅជាប់មាត់សមុទ្រ មាន ខេត្តកោះកុង ខេត្តកំពត និងខេត្តកែប ដែលជាតំបន់ឆ្នេររបស់កម្ពុជា ។
លោករដ្ឋលេខាធិការបានបញ្ចាក់ថា គម្រោងនោះរួមមាន ៖ ទី១-អភិវឌ្ឍន៍កំពង់ផែទេសចរណ៍មួយនៅខេត្តកំពត ទី២-ធ្វើឱ្យប្រសើរឡើងផ្នែកបរិស្ថាននៅតំបន់ផ្សារក្រាមក្នុងខេត្តកែប ដោយរៀបចំប្រព័ន្ធសម្អាតទឹកកខ្វក់ ធ្វើឱ្យបរិស្ថានល្អ និងការជួយអភិវឌ្ឍន៍សហគមន៍ និងលើកកម្ពស់ប្រសិទ្ធភាពសហគមន៍ ការអភិវឌ្ឍសហគមន៍ដើម្បីជួយពួកគេឱ្យមានចំណូល និងមានឱកាសការងារ ដោយទទួលផលប្រយោជន៍ពីវិស័យទេសចរណ៍ ។ លោកបន្តថា បន្ទាប់ពីមានកំពង់ផែអន្តរជាតិនេះ យើងនឹងបើកច្រកអន្តរជាតិមួយ ដែលអនុញ្ញាតឱ្យភ្ញៀវចេញចូលតាមច្រកថ្មីនេះ ។
យ៉ាងណាក៏ដោយ លោករដ្ឋលេខាធិការរំពឹងថា តាមរយៈកំពង់ផែថ្មីនេះ ក៏ដូចជាក្នុងគម្រោងទាំងមូល អាចនឹងស្រូបយកកម្លាំងពលកម្មយ៉ាងហោចណាស់ក៏ជាង៥០០០នាក់ មកបម្រើការងារ ហើយពលរដ្ឋនៅក្នុងសហគមន៍ក្នុងតំបន់នេះ ក៏នឹងទទួលបានផលប្រយោជន៍យ៉ាងក្រាស់ក្រែលពីវិស័យទេសចរណ៍ផងដែរ ។ សម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធនេះទាំងមូល គេគ្រោងនឹងចំណាយថវិកាប្រមាណជា១៨,៧៧លានដុល្លារអាមេរិក។
លោកថោង ខុន រដ្ឋមន្ត្រីក្រសួងទេសចរណ៍មានប្រសាសន៍ថា រាល់គម្រោងអភិវឌ្ឍន៍ចាំបាច់ត្រូវមានការគាំទ្រពីប្រជាជននិងដៃគូរអភវឌ្ឍន៍រួមទាំងការចូលរួមពីវិស័យឯកជនផងដែរ ។ ដូច្នេះ លោកស្នើឱ្យភាគីពាក់ព័ន្ធយកចិត្តទុកដាក់លើគម្រោងផែនការឱ្យច្បាស់លាស់ ត្រឹមត្រូវ ធានាបានទាំងបរិយាកាស បរិស្ថាន អនាម័យ សន្តិសុខ សុវត្ថិភាព និងធានាការដឹកជញ្ជូន ការធ្វើដំណើររបស់ភ្ញៀវប្រកបដោយសុវត្ថិភាព និងការទាក់ទាញបំផុត ។
លោករដ្ឋមន្ត្រីអះអាងថា រាល់ហេដ្ឋារចនាសម្ព័ន្ធដែលបង្កើតឡើងទាំងអស់ត្រូវតែធានានូវកម្រិតស្តង់ដាអន្តរជាតិ ព្រោះថាការកំណត់បែបនេះ វាជាប្រព័ន្ធដែលអាចស្រូបយកភ្ញៀវទេសចរជាតិនិងអន្តរជាតិ មកពីប្រទេសនៅលើពិភពលោកតាមច្រកផ្លូវទឹក ឱ្យបានតាមគម្រោងផែនការ ៕
ចែករំលែកព័តមាននេះ