បណ្តាញព័ត៌មានរបស់ចិនផ្សាយថា រដ្ឋបាលព័ត៌មានថាមពលរបស់សហរដ្ឋអាមេរិកបានបញ្ជាក់នៅក្នុងរបាយការណ៍កាលពីដើមសប្តាហ៍ថា សហរដ្ឋអាមេរិកនាំចេញប្រេងកាតជាមធ្យមបាន៣,៥លានបារ៉ែលក្នុងមួយថ្ងៃ កើនឡើង១០% ធៀបនឹងឆ្នាំ២០១២ ។
ទីភ្នាក់ងារដដែលនោះក៏បានកត់សម្គាល់ថា នៅក្នុងខែធ្នូ ឆ្នាំ២០១៣ ការនាំចេញផលិតផលប្រេងកាតរបស់សហរដ្ឋអាមេរិកសម្រេចបាន៤,៣លានបារ៉ែលក្នុងមួយថ្ងៃ ដែលនេះគឺជាលើកដំបូងនៃការនាំចេញបានបរិមាណលើស៤លានបារ៉ែលក្នុងមួយថ្ងៃនៅក្នុងរយៈពេលមួយខែ ។
ទិន្នន័យនៃការនាំចេញរាប់បញ្ចូលប្រេងម៉ាស៊ូតសម្រេចបានជាង១,១លានបារ៉ែលក្នុងមួយថ្ងៃ បង្កើនការនាំចេញបាន១១០.០០០បារ៉ែលក្នុងមួយថ្ងៃ ធៀបនឹងឆ្នាំ២០១២ ។ ដោយឡែក ប្រេងសាំងនាំចេញបាន៥៥០.០០០បារ៉ែលក្នុងមួយថ្ងៃ កើនឡើង៩% ។
ទោះជាយ៉ាងណាក៏ដោយ សហរដ្ឋអាមេរិកនាំចូលផលិតផលប្រេងកាតប្រមាណជា២,១លានបារ៉ែលក្នុងមួយថ្ងៃនៅក្នុងឆ្នាំ២០១៣ ។
ម្យ៉ាងទៀត ដោយសារតែបច្ចេកវិទ្យាថ្មីដ៏ទូលំទូលាយរបស់ខ្លួន ផលិតកម្មប្រេងរបស់សហរដ្ឋអាមេរិកបានកើនឡើង១៥% ស្មើនឹង៧,៤លានបារ៉ែលក្នុងមួយថ្ងៃក្នុងឆ្នាំ២០១៣ ។ ចំណែកទីភ្នាក់ងារថាមពលអន្តរជាតិមានមូលដ្ឋាននៅទីក្រុងប៉ារីសបានព្យាករថា សហរដ្ឋអាមេរិកអាចនឹងហក់រំលងប្រទេសអារ៉ាប៊ីសាអូឌីត និងរុស្ស៊ី ហើយក្លាយជាប្រទេសផលិតប្រេងធំជាងគេបំផុតនៅលើពិភពលោកក្នុងឆ្នាំ២០១៥ ខាងមុខ៕
ចែករំលែកព័តមាននេះ