រាជធានីភ្នំពេញ ៖ មកទល់ពេលនេះមានរយៈពេលប្រមាណ២ខែហើយ ដែលកីឡាករល្បីឈ្មោះ វង្ស ណយ ត្រូវមន្ត្រីសហព័ន្ធកីឡាប្រដាល់កម្ពុជា និងបណ្តាស្ថានីយទូរទស្សន៍ទាំងអស់រួមគ្នាបិទផ្លូវមិនឱ្យលោកឡើងរេញប្រកួតឡើយ ។ ជាមួយនឹងការបិទផ្លូវ ដែលបន្តអូសបន្លាយដោយមិនដឹងថាគេបើកឱ្យវិញនៅពេលណានោះ វង្ស ណយ បានបង្ហាញពីអារម្មណ៍តបនឹងស្ថានការណ៍ដ៏តឹងតែងមួយនេះ ។
ក្នុងជំនួបកាលពីយប់ថ្ងៃអាទិត្យ ទី១០ កុម្ភៈ ក្នុងពិធីឡើងគេហដ្ឋានថ្មីរបស់លោកគ្រូ សុខ សុធន នៅម្តុំផ្សារដីហុយ កីឡាករ វង្ស ណយ ប្រាប់ថា មន្ត្រីសហព័ន្ធបានសម្រេចដាក់វិន័យមិនឱ្យលោកឡើងរេញប្រមាណជា២ខែហើយ ដោយសូម្បីតែការប្រដាល់នៅក្រៅសង្វៀន ឱ្យតែឆ្លងកាត់សហព័ន្ធកីឡាប្រដាល់កម្ពុជា គឺមិនមានការអនុញ្ញាតទាំងអស់ ។ ហេតុផលដែលនាំទៅដល់ការបិទផ្លូវជិតឈឹងនាពេលនេះ គឺបណ្តាលមកពីផ្ទុះបាតុភាពលើករណីដែលសង្ស័យថាលោកលក់ខ្លួននៅលើរេញប្រដាល់ និងមុននេះបន្តិចបានទាត់ចោលសំណើឡើងរេញប្រដាល់នៅប៉ុស្តិ៍លេខ៣ ដោយតក់ក្រហល់ ធ្វើឱ្យមន្ត្រីសហព័ន្ធ និងក្រុមអ្នករៀបចំការប្រកួតប្រដាល់របស់ទូរទស្សន៍ប៉ុស្តិ៍លេខ៣ក្តៅស្លឹកត្រចៀក ។
ក្រោមសម្ពាធដ៏តឹងរុឹងនេះ ទើបលោកបាត់វត្តមានទាំងស្រុងនៅលើកញ្ចក់ទូរទស្សន៍ និងពុំសូវស្ទុះស្ទាក្នុងការហ្វឹកហាត់នាពេលចុងក្រោយ ។ វង្ស ណយ សារភាពថា លោកដើរចេញពីការហ្វឹកហាត់ច្រើនសប្តាហ៍មកហើយ បន្ទាប់ពីលោកមានអារម្មណ៍មិនល្អ និងបាក់ទឹកចិត្ត ព្រោះតែទទួលវិន័យដ៏ខ្មៅងងឹតនោះ ។ លោកបារម្ភដូចគ្នាពីស្ថានភាពក្បាច់គុនរបស់ខ្លួន ប្រសិនបើការផ្គូផ្គងឱ្យឡើងរេញនៅតែត្រូវបានបិទ ឯកម្លាំងចិត្តក្នុងការចូលក្លិបឱ្យបានទៀងទាត់ក៏មិនសូវពេញលេញ ។ កន្លងមក មានករណីបែបនេះច្រើនដងហើយ ដោយបានទាំងធ្វើឱ្យ វង្ស ណយ ប្រែក្លាយពីកីឡាករដែលមានសន្ទុះ និងសមត្ថភាពខ្ពស់នៅលើរេញប្រដាល់ទៅជាកីឡាករបាត់បង់ក្រេឌីត ព្រោះតែការប្រកួតចាញ់នោះទៀតផង ។ នោះមិនទាន់គិតដល់ករណីដែលត្រូវគេចោទថាបានលក់ខ្លួន ដែលជាកត្តាធ្វើឱ្យអ្នកទស្សនារាប់ម៉ឺននាក់បាត់បង់ទំនុកចិត្តនោះផង ។ ប៉ុន្តែក្រេឌីតរបស់កីឡាកររូបនេះ បានរំកិលស្ទុះឡើងបន្តិចមកវិញ បន្ទាប់ពីគេអាចផ្តួលកីឡាករដែលមានគ្រឹះមាំប្រចាំនៅទូរទស្សន៍បាយ័នគឺ កែវ រំចង់ ឱ្យបរាជ័យយា៉ងអាមា៉ស់បំផុតនៅ២លើកជាប់គ្នា ។
តាមរយៈជ័យជម្នះផ្ទួនៗ ដែលគេអាចនិយាយបានថា ជាការបំបាក់កីឡាករស្តេចត្រាញ់ប្រចាំនៅស្ថានីយទូរទស្សន៍បាយ័ន កែវ រំចង់ ឱ្យបាក់មុខនោះ បានធ្វើឱ្យមានការភ្ញាក់ផ្អើលស្ទើរពេញសង្វៀនកីឡាប្រដាល់ ដោយបានទាំងធ្វើឱ្យក្រេឌីតរបស់គេដែលធ្លាប់រំកិលចុះ បត់ក្បាលឡើងតែមួយប៉ប្រិចភ្នែកទៀតផង ។ មនុស្សជាច្រើនបានចាត់ទុកថា វង្ស ណយ នឹងល្បីខ្លាំង ហើយឈានដល់ចំណុចកំពូលក្នុងពិភពកីឡាប្រដាល់ ខណៈដែលគេធ្លាប់មានប្រវត្តិវាយផ្តួលស្ទើរតែគ្រប់កីឡាករទាំងអស់ទៅហើយ ។ នៅលើបណ្តាញសារព័ត៌មាន និងការលើកឡើងនានាសុទ្ធតែត្រូវគេឃើញ និងឮតែសំឡេងកោតសរសើរ និងផ្អាកការគិតរឿងរិះគន់ពាក់ព័ន្ធនឹងថា គេអន់ជាងមុនឬជាកីឡាករដែលមានទម្លាប់លក់ខ្លួន មិនអាចទុកចិត្តបានដូចមុន ។ ប៉ុន្តែអ្វីដែលលោកបានទទួលនោះ ហាក់មិននឹងនរទាល់តែសោះ ដែលនោះបណ្តាលមកពីលោកគេចមិនផុតពីរឿងអាស្រូវ ស្ទើរគ្រប់ពេលនៃការប្រកួត ។
ក្រុមមន្ត្រីដែលមានរឿងពាក់ព័ន្ធជាមួយ វង្ស ណយ បានចោទថា ការបរាជ័យ និងរឿងបោកគ្រាប់បែកដែលគេបានធ្វើចំពោះប៉ុស្តិ៍លេខ៣ គឺជារឿងចេតនា ជាថ្នូរនឹងលាភសក្ការៈ បើទោះជា វង្ស ណយ ផ្ទាល់បានបញ្ជាក់ពីហេតុផលច្រើនលើក ដើម្បីការពារចំពោះប្រជាប្រិយភាពខ្លួនក្តី ។ បើទោះជាក្នុងចង្កោមមន្ត្រីទូរទស្សន៍ប៉ុស្តិ៍លេខ៣ និងមន្ត្រីសហព័ន្ធកីឡាប្រដាល់កម្ពុជាបានសម្រេចដកពាក្យបណ្តឹង និងមិនសើរើករណីបរាជ័យ និងរឿងសុំរំសាយការប្រកួតបែបតក់ក្រហល់ ដោយអះអាងប្រាប់អ្នកកាសែតថា មិនយកទោសពៃរ៍ចំពោះគេ ប៉ុន្តែបម្រាមក្រៅផ្លូវការមួយដើម្បីបិទផ្លូវមិនឱ្យ វង្ស ណយ ឡើងរេញ ស្រាប់តែត្រូវបានអនុវត្តឡើង ។ កីឡាករ វង្ស ណយ ប្រាប់ថា មកទល់ពេលនេះ គេមិនខុសពីកីឡាករដើរទាត់ខ្យល់នោះទេ ដោយសារតែគ្មានការផ្គូផ្គងឱ្យឡើងរេញ និងមិនទាន់មានការលើកលែងទោសពីក្រុមមន្ត្រីសហព័ន្ធកីឡាប្រដាល់កម្ពុជា ។ ទោះយា៉ងណា លោកនៅតែបង្ហាញអារម្មណ៍មិនទោមនស្ស ដោយសារតែក្នុងពេលឡើងរេញម្តងៗ វាបានផ្តល់ឱ្យលោកនូវអារម្មណ៍មិនល្អច្រើនជាងរីករាយ ។ លោកនិយាយថា មហាជនមួយចំនួនចោទថា លោកលក់ខ្លួន ប៉ុន្តែលោកចោទសួរវិញថា តើស្ថានភាពកីឡាករដូចលោកនាពេលបច្ចុប្បន្នអាចគេចរួចឬទេ ចំពោះការទិញដូររបៀបនោះ។
លោកមិនសារភាពថា ពិតជាបានពាក់ព័ន្ធនឹងការលក់ខ្លួននៅលើរេញដូចការចោទប្រកាន់នោះទេ ប៉ុន្តែអ្វីដែលលោកបង្ហើបឱ្យដឹងគឺថា កីឡាករល្បីស្រុកខ្មែរ ទទួលបានកម្រៃខ្លួនទាបណាស់ បើប្រកួតដោយប្រើឧត្តមគតិអស់ពេក ប្រពន្ធកូនពិតជាអត់បាយហូប ។ វង្ស ណយ បន្តថា វាជារឿងសង្វេគណាស់ ដែលលោកត្រូវប្រកួតឈ្នះកីឡាករ កែវ រំចង់ ហើយបានទទួលតម្លៃខ្លួនមិនដែលស្មើគេទាល់តែសោះ តើលោកមានកម្លាំងចិត្តឯណាវាយឱ្យអស់ពីសមត្ថភាពនោះ ។ ពាក់ព័ន្ធនឹងករណីរឿងអាស្រូវចុងក្រោយ លោកចាត់ទុកថា នោះបណ្តាលមកពីបញ្ហាផ្លូវចិត្ត ដែលធ្វើឱ្យលោកបាត់បង់ទឹកចិត្តប្រឹងប្រែង គឺមិនមែនជាករណីលក់ខ្លួនដូចការចោទប្រកាន់ទាំងស្រុងនោះទេ ។ ត្រង់ហ្នឹងហើយដែលលោកបញ្ជាក់ថា ជាកត្តាចុះខ្សោយ និងមិនទៅមុខរបស់កីឡាករប្រដាល់កម្ពុជា ។ ទោះបីយា៉ងណា លោកនៅមិនទាន់តាំងចិត្តដើរចេញពីការប្រដាល់នោះទេ បើទោះជាទទួលសម្ពាធច្រើនយា៉ងទាំងករណីប្រកួតល្បីឈ្មោះមិនសល់ប្រាក់ រស់មិនបានស្រួល និងបញ្ហារឿងត្រូវទទួលការចោទប្រកាន់ផ្សេងៗ ធ្វើឱ្យលោកអាមា៉ស់ ។
មន្ត្រីសហព័ន្ធកីឡាប្រដាល់កម្ពុជាអះអាងថា ហេតុផលនៃការបិទផ្លូវ គឺបណ្តាលមកពីករណីរបស់ វង្ស ណយ ត្រូវគេរកឃើញថា ជាប់ពាក់ព័ន្ធនឹងបញ្ហាប្រកួតមិនអស់សមត្ថភាពច្រើនលើកពេក ។ ប៉ុន្តែបញ្ហានេះ នឹងមិនអូសបន្លាយច្រើនខែនោះទេ ដោយក្នុងអំឡុងចុងខែមីនា ខាងមុខ នឹងបើកឱ្យមានការផ្គូផ្គងជាថ្មីវិញហើយ ដើម្បីចាប់ផ្តើមសង្កេតជាថ្មី ថាតើគេនៅបន្តធ្វើខ្លួនឱ្យមានការរិះគន់នៅក្នុងសង្គមកីឡាប្រដាល់ទៀត ឬប្រកាន់ជំហរជាកីឡាករដើម្បីមហាជនដូច មុន ។ ឆ្លើយតបនឹងការចោទឡើងនេះ កីឡាករ វង្ស ណាយ សារភាពថា កន្លងមក លោកពិតជាមានករណីមិនខុសពីការចោទប្រកាន់ខ្លះមែន ប៉ុន្តែមិនគ្រប់លើកដែលលោកបរាជ័យលើរេញនោះទេ ព្រោះការប្រកួតខ្លះក៏ពិតជារឿងភ្លាត់ស្នៀត និងជារឿងបាក់ទឹកចិត្តដូចដែលលោកបញ្ជាក់ខាងលើនោះដែរ ៕
ចែករំលែកព័តមាននេះ