បញ្ចប់បញ្ហាស្ថានីយទូរទស្សន៍គំរា.មបិទ ក្រោយមេសហព័ន្ធកីឡាប្រដាល់គុនខ្មែរ ស្នើសុំដំឡើងតម្លៃខ្លួនអាជ្ញាកណ្ដាល ចៅក្រម
- ភ្នំពេញ
រាជធានីភ្នំពេញ ៖ សង្វៀនគុនខ្មែរមួយរយៈចុងក្រោយនេះ ហាក់ឡើងកម្តៅខ្លាំង ដោយសារការផ្ទុះ
រាជធានីភ្នំពេញ ៖ សង្វៀនគុនខ្មែរមួយរយៈចុងក្រោយនេះ ហាក់ឡើងកម្តៅខ្លាំង ដោយសារការផ្ទុះជម្លោះពាក្យសម្តីវាយប្រហារគ្នានៅលើបណ្តាញសង្គម រវាងមេសហព័ន្ធកីឡាប្រដាល់គុនខ្មែរដែលទើបចូលកាន់តំណែងថ្មី ជាមួយកីឡាករមីយ៉ាន់ម៉ាដាវ លីឌុច ។ គួររំលឹកថា ប្រកាសដំឡើងប្រាក់ឈ្នួលអាជ្ញាកណ្ដាល ចៅក្រម ប្រដាល់គុនខ្មែរ
រឿងនេះទើបតែស្ងប់ស្ងាត់បន្តិចទៅវិញបន្ទាប់ពីការសម្របសម្រួលគ្នារវាងភាគីទាំងពីរ ថ្មីៗនេះ ស្រាប់តែមានរឿងគួរឱ្យភ្ញាក់ផ្អើលមួយកើតឡើង គឺស្ថានីយទូរទស្សន៍រៀបចំកម្មវិធីប្រដាល់គុនខ្មែរមួយចំនួន បានគំរាមបិទចោល ក្រោយពីលោកឧត្តមសេនីយ៍ទោ ខូវ ឆាយ ប្រធានសហព័ន្ធកីឡាប្រដាល់គុនខ្មែរ ដាក់ចេញនូវគោលនយោបាយកំណែទម្រង់ថ្មី ដែលស្នើឱ្យមានការដំឡើងតម្លៃពលកម្មអាជ្ញាកណ្ដាល និងចៅក្រមពី១៦ដុល្លារដល់២៥ដុល្លារស្មើនឹង១០ម៉ឺនរៀលក្នុងមួយកម្មវិធី។ តើមេសហព័ន្ធកីឡាប្រដាល់គុនខ្មែរមានវិធីសាស្ដ្របែបណាដើម្បីជំរុញឱ្យខាងស្ថានីយទូរទស្សន៍ទទួលយកការស្នើសុំនេះ ខណៈមានការលេចលឺថា ស្ថានីយទូរទស្សន៍មួយចំនួនគំរាមបិទចោលកម្មវិធីប្រដាល់បែបនេះ?
លោកឧត្តមសេនីយ៍ទោ ខូវ ឆាយ ប្រធានសហព័ន្ធកីឡាគុនខ្មែរ បានបង្ហោះសារនៅលើគណនីហ្វេសប៊ុកផ្លូវការរបស់លោក ជុំវិញការរិះគន់លើគោលនយោបាយដំឡើងតម្លៃខ្លួនអាជ្ញាកណ្ដាល និងចៅក្រមឱ្យដល់១០ម៉ឺនរៀលក្នុងមួយកម្មវិធី ។ ប៉ុន្តែបានកាត់ចំនួនកម្មវិធីដែលមន្ត្រីសហព័ន្ធទាំងនោះ ធ្លាប់ទទួលបានក្នុងមួយថ្ងៃពី៥មកនៅត្រឹម៣ស្មើៗគ្នាវិញ ថាជាការខាតបង់របស់អាជ្ញាកណ្ដាល និងចៅក្រមទៅវិញទេ។ លោកបានបញ្ជាក់យ៉ាងដូច្នេះថា៖«មិនមែនកាត់កម្មវិធីទេ នេះជាយន្តការនៃការរៀបចំឱ្យមានតម្លាភាពនៃបរិមាណការងាររបស់មន្ត្រីអាជ្ញាកណ្ដាលចៅក្រមទាំងអស់គ្រប់ស្ថានីយ។
កាលពីមុន មានមន្ត្រីនៅស្ថានីយខ្លះទទួលបានតែ១ ឬ២កម្មវិធីក្នុង១សប្តាហ៍ មន្ត្រីស្ថានីយខ្លះទទួលបាន៥ទៅ៦កម្មវិធីក្នុង១សប្តាហ៍ ធ្វើឱ្យមានការច្រណែនគ្នាអំពីការបែងចែកបក្ខពួក»។
មេសហព័ន្ធកីឡាប្រដល់គុនខ្មែរខាងលើ គូសបញ្ជាក់បន្ថែមថា៖«ឥឡូវយើងរៀបចំឱ្យមានតម្លាភាព និងតុល្យភាពការងារ គឺមន្ត្រីទាំងអស់ទទួលបានចំនួនកម្មវិធីស្មើៗគ្នាក្នុងមួយសប្តាហ៍មាន១៥កម្មវិធី ចែកនឹង៥ក្រុម មួយក្រុមទទួលបាន៣កម្មវិធីស្មើគ្នា ។
ទន្ទឹមនឹងនោះ សហព័ន្ធក៏បានបន្ថែមថវិកាឧបត្ថម្ភដល់មន្ត្រីតាមជំនាញនិងវិជ្ជាជីវ:រៀងៗខ្លួន ដោយមន្ត្រីអាជ្ញាកណ្ដាលចៅក្រមទទួលបានយ៉ាងតិច១០ម៉ឺនរៀលស្មើនឹង២៥ដុល្លារក្នុងមួយកម្មវិធី ដែលនេះជាការដំឡើងដំណាក់កាលទី១។ ចំណែកថវិកាឧបត្ថម្ភទាំងអស់នេះ គឺសហព័ន្ធស្នើសុំពីខាងស្ថានីយទូរទស្សន៍ដែលជាអ្នករៀបចំកម្មវិធី»។
មុននេះទោះបីជាសហព័ន្ធបានប្រកាសសម្រេចដំឡើងថវិកាជូនមន្ត្រីរបស់ខ្លួនរហូតដល់១0ម៉ឺនរៀលក្នុងមួយកម្មវិធីក្ដី ក៏ប៉ុន្តែស្ថានីយទូរទស្សន៍មួយចំនួនមិនទាន់យល់ព្រមតាមសំណើសុំបន្ថែមថវិការបស់សហព័ន្ធចំពោះមន្ត្រីនៅឡើយទេ ព្រមទាំងគំរាមបិទកម្មវិធីចោលថែមទៀតផង ដោយសារស្ថានីយរបស់គេនៅជួបផលវិបាកខ្លះៗ ។ មួយចំនួនទៀតលើកឡើងថា ទាល់តែសហព័ន្ធដោះស្រាយបញ្ហាពុករលួយផ្ទៃក្នុងជាមុនសិន ដូចជាបញ្ហាបញ្ជីឈ្មោះអាជ្ញាកណ្ដាលចៅក្រមដាក់លើសចំនួនអ្នកមកធ្វើការជាក់ស្ដែងជាដើម។
ទាក់ទងទៅនឹងបញ្ហាទាំងនេះ លោកឧត្តមសេនីយ៍ទោប្រធានសហព័ន្ធកីឡាប្រដាល់គុនខ្មែរបានប្រាប់អ្នកយកព័ត៌មានកោះសន្តិភាពតាមទូរសព្ទ កាលពីថ្ងៃទី២៣ ខែមិថុនា ថា រឿងចម្រូងចម្រាសដែលនៅមានសល់តិចតួចនាពេលកន្លងមក សហព័ន្ធបានដោះស្រាយរួចរាល់អស់ហើយ ។ លោកបានប្រាប់ទៀតថា ពីមុនមានមែន គឺមានប្រមាណ១ឬ២ស្ថានីយទូរទស្សន៍តែប៉ុណ្ណោះ ដែលដោះស្រាយគ្នាមិនទាន់ចេញ តែឥឡូវបានឯកភាពគ្នា១០០%ហើយ ដោយសារខាងសហព័ន្ធកីឡាប្រដាល់គុនខ្មែរជួយធ្វើការសម្របសម្រួល ធ្វើយ៉ាងណាឱ្យមានការឯកភាពគ្នាបានលឿន និងដំណើរការបានល្អប្រសើរ ព្រោះលោកយល់ថា ក្នុងចំណោមកម្មវិធីប្រកួតចំនួន១៥ ដែលបាននិងកំពុងដំណើរការប្រកួតជាប្រចាំមានចំនួន១២បានធ្វើដំណើទៅមុខរួច ប៉ុន្តែពេលនេះអ្វីដែលនៅសេសសល់ក៏ត្រូវបានដោះស្រាយរួចហើយដែរ។
លោកឧត្តមសេនីយ៍ទោ ខូវ ឆាយ បានមានប្រសាសន៍បន្តថា លោកបានប្រកាសដំឡើងប្រាក់ឧបត្ថម្ភកាលពីថ្ងៃទី១២ ខែមិថុនា និងអនុវត្តចាប់ពីថ្ងៃទី១ ខែកក្កដា រហូតទៅអត់មានបកក្រោយនោះទេ ។ លោកថា រាល់បញ្ហាដំឡើងប្រាក់ឧបត្ថម្ភទៅដល់មន្ត្រីចៅក្រម អាជ្ញាកណ្ដាល នាពេលនេះ លោកមិនបានបង្ខិតបង្ខំ គំរាមកំហែង ឬដាក់សម្ពាធទៅលើស្ថានីយទូរទស្សន៍ណាមួយនោះទេ គឺត្រូវរិះរកយន្តការណាមួយដោះស្រាយគ្នាឱ្យបានល្អតែប៉ុណ្ណោះ។ បើស្ថានីយទូរទស្សន៍ណាមួយកំពុងតែជួបផលវិបាក សហព័ន្ធត្រូវតែព្យាយាមរកវិធីជួយដោះស្រាយ ដើម្បីឱ្យរស់បានស្រួលទាំងអស់គ្នា។
ជាចុងក្រោយ លោកប្រធានសហព័ន្ធកីឡាប្រដាល់គុនខ្មែរបានសង្កត់ធ្ងន់ថា បច្ចុប្បន្ន សហព័ន្ធកីឡាប្រដាល់គុនខ្មែរប្ដេជ្ញាធ្វើកំណែទម្រង់ផ្ទៃក្នុងឱ្យបានល្អ និងសុីជម្រៅបំផុត ។ ថ្វីត្បិតលោកទើបតែចូលកាន់តំណែងជាប្រធានសហព័ន្ធបានរយៈពេលជាង២ខែប៉ុណ្ណោះ ប៉ុន្តែលោកសន្យាប្រើវិធានការឱ្យសមស្របក្នុងការលុបបំបាត់អំពើពុករលួយ ការបែងចែកបក្សពួកឱ្យអស់ផងដែរ ។ ជាពិសេសរាល់គោលការណ៍ដែលលោកបានដាក់ចេញអត់បកក្រោយឡើយ ៕
ចែករំលែកព័តមាននេះ