រាជធានីភ្នំពេញ ៖ បេក្ខភាពបវរកញ្ញានាង កុយ អេណា បានបង្ហាញតួលេខសរុបចំនួនថវិកាដែលនាងទទួលបានពីសប្បុរសជននានាពីព្រឹត្តការណ៍ដើរថ្មើរជើងរបស់នាងពីភ្នំពេញទៅកាន់ខេត្តសៀមរាប ដែលទើបតែបានបញ្ចប់កាលពីពេលថ្មីៗនេះ ។ កុយ អេណា…
រាជធានីភ្នំពេញ ៖ បេក្ខភាពបវរកញ្ញានាង កុយ អេណា បានបង្ហាញតួលេខសរុបចំនួនថវិកាដែលនាងទទួលបានពីសប្បុរសជននានាពីព្រឹត្តការណ៍ដើរថ្មើរជើងរបស់នាងពីភ្នំពេញទៅកាន់ខេត្តសៀមរាប ដែលទើបតែបានបញ្ចប់កាលពីពេលថ្មីៗនេះ ។
កុយ អេណា បានបញ្ជាក់ថា ចំនួនថវិកាដែលនាងទទួលបានពីសប្បុរសនៃព្រឹត្តការខាងលើនេះ មានចំនួនជាង១២ម៉ឺនដុល្លារអាមេរិក ហើយថវិកាទាំងអស់នេះ នាងនឹងប្រើប្រាស់សម្រាប់ជួយដល់ជនពិការនៅកម្ពុជា ។
កុយ អេណា បានលើកឡើងថា ការដែលនាងបង្កើតនូវព្រឹត្តការមួយនេះ គឺជារឿងអស្ចារ្យមួយសម្រាប់នាង ហើយនាងក៏មិននឹកស្មានដល់សម្រាប់ការគាំទ្រយ៉ាងច្រើនពីមហាជន ជាពិសេស សប្បុរសជននានាដែលបានជួយឧបត្ថម្ភជាបន្តបន្ទាប់ ។
នាងថា សម្រាប់ទឹកប្រាក់ដែលនាងទទួលបានពីសប្បុរសជននានានោះ មានចំនួនសរុប១២៤.៦១៦ដុល្លារ ដែលថវិកានេះ គឺមានចំនួនច្រើន និងលើសពីការរំពឹងទុករបស់នាង ។
យ៉ាងណា សម្រាប់ថវិកាដ៏ច្រើននេះ នាងពិតជាអរគុណទៅដល់សប្បុរសជនទាំងអស់ដែលបានចូលរួមមកកាន់មូលនិធិរបស់នាង ។
កុយ អេណា បញ្ជាក់ថា នាងមិននឹកស្រមៃថា មានបងប្អូនជាច្រើននៅតាមដងផ្លូវបានចូលរួមជាថវិកាដែរ ហើយនេះជារឿងមួយដ៏អស្ចារ្យ ហើយទៅថ្ងៃខាងមុខនាង និងក្រុមការងារនឹងចុះទៅទស្សនកិច្ច និងប្រគល់មូលនិធិដែលទទួលបាននេះទៅជនពិការភាពដែលពួកគាត់កំពុងស្នាក់នៅមណ្ឌលផ្ទាល់ ហើយនាងនឹងធ្វើបច្ចុប្បន្នសម្រាប់ទីតាំងដែលបានចុះនោះ ។
នាងអះអាងថា អំឡុងពេលធ្វើដំណើរនោះនាងក៏បានឃើញមានជនពិកាខ្លះគាត់មានភាពរីករាយ និងបានមកអង្គុយរងចាំនាង បើទោះបីជាពេលខ្លះត្រូវភ្លៀងក៏ដោយ ហើយសកម្មភាពមួយនេះគឺពិតជាធ្វើអោយនាងរំជួលចិត្តយ៉ាងខ្លាំង ។
នាងបន្តថា ក្នុងស្មារតីបញ្ចប់ការរើសអើងជនពិកានាងចង់បញ្ជាក់ថា ជនពិការក៏មានបេះដូង ពួកគាត់ក៏ចង់បានភាពកក់ក្តៅ និងការយកចិត្តទុកដាក់ពីបងប្អូនដែរ ដូច្នេះហើយទើបរូបនាងសម្រេចធ្វើជាមូលនិធិដើរដោយថ្មើរជើងពីភ្នំពេញទៅសៀមរាប ។
នាងបន្ថែមថា គោលបំណងដែលនាងធ្វើរឿងខាងលើនេះឡើង ដោយទីមួយនាងចង់បំពេញបំណងខ្លួនឯងនៅក្នុងការដើរដោយថ្មើរជើងពីភ្នំពេញទៅកាន់ខេត្តសៀមរាប និងទីពីរគឺនាងបានជួបសំណេះសំណាលដោយផ្ទាល់ជាមួយបងស្រីម្នាក់ដែលជាជនពិការ ហើយគាត់ជាអ្នកម៉ាស្សាសម្រាប់រូបនាងតែម្តង ហើយជាមនុស្សដែលជម្រុញឲ្យនាងបង្កើតព្រឹត្តការនេះឡើង ៕
ចែករំលែកព័តមាននេះ