រាជធានី​ភ្នំពេញ ៖ បុរសម្នាក់មិនចេះកែខ្លួន ធ្លាប់ត្រូវបានប្រពន្ធលែងលះចោលច្រើនឆ្នាំមកហើយ ព្រោះតែពូកែវាយធ្វើបាបនាងគ្មានលស់ពេល ហើយក៏ធ្លាប់ជាប់ពន្ធនាគាររយៈពេល២ឆ្នាំ ពីបទប្រើប្រាស់អាវុធខុសច្បាប់ផងដែរ និងទើបចេញមកវិញបានរយៈពេល៤ខែប៉ុណ្ណោះ ។

ក្រោយមកឆ្លៀតពេលទៅចូលរួមធ្វើបុណ្យសពកូនប្រុសរបស់ខ្លួនម្នាក់អាយុ១១ឆ្នាំដែលស្លាប់ដោយលង់ទឹក ក៏បានសុំប្រពន្ធរួមរស់នៅជាមួយវិញ ហើយពេលនោះដោយសារតែនៅអាណិតផង ហើយគិតថាប្ដីកែខ្លួនប្រពន្ធវិញផង នាងក៏បានយល់ព្រមទទួលយកវិញ ។ ប៉ុន្តែក្រោយរស់នៅជាមួយគ្នាបាន៣ខែប៉ុណ្ណោះ ជននេះបានផឹកស្រា ហើយយកខ្សែក្រវាត់វាយរឹតប្រពន្ធនិងយកថ្នាំមូសបាញ់ចូលភ្នែកនាងទៀត ។ រហូតប្រពន្ធទ្រាំងលែងបាននិងភ័យខ្លាចប្ដីកំណាចសម្លាប់ចោល នាងក៏បាននាំកូនស្រីតូចម្នាក់គេចខ្លួនទៅក្រុងប៉ោយប៉ែត ខេត្តបន្ទាយមានជ័យ ជាបណ្ដោះអាសន្ន បន្ទាប់មកបុរសនេះបានទិញសាំងប្រុងដុតផ្ទះចោល ហើយក៏ត្រូវក្រុមគ្រួសារខាងប្រពន្ធប្ដឹងឲ្យនគរបាលឃាត់ខ្លួនតែម្ដង ។

ក្រោយទទួលបានដំណឹងខាងលើនេះភ្លាម​ នៅវេលាម៉ោង១០និង៤៥នាទីព្រឹកថ្ងៃទី៦ ខែកុម្ភៈ ឆ្នាំ២០២៥ នគរបាលក៏បានចុះទៅឃាត់ខ្លួនខណៈជននេះកំពុងបិទ​ទ្វារសម្ងំនៅក្នុងផ្ទះ ស្ថិតនៅនៅក្នុងភូមិត្រពាំងអណ្ដូង ហៅភូមិប៉ម សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។

ជនសង្ស័យជា​ប្ដីឈ្មោះ ម៉ាង ស៊ីនៀន ហៅអាធាន អាយុ៣១ឆ្នាំ មានទីលំនៅសង្កាត់សំរោងក្រោម ខណ្ឌពោធិ៍សែនជ័យ និងមានចាក់សាក់យ័ន្តនៅលើដៃនិងខ្នងផងដែរ ចំណែកប្រពន្ធឈ្មោះរឿង សុខនាង អាយុ៣៣ឆ្នាំ ស្នាក់នៅក្នុងភូមិកើតហេតុ ។ អ្នកទាំង២នាក់នេះមានកូន២នាក់ ប៉ុន្តែជាអកុសលកូនប្រុសអាយុ១១ឆ្នាំម្នាក់បានលង់ទឹកស្លាប់ កាលពី៣ខែមុន ហើយសព្វថ្ងៃនៅសល់តែកូនស្រីអាយុ៨ឆ្នាំម្នាក់ប៉ុណ្ណោះ ។

ក្រុមគ្រួសារខាងស្រ្តីជាប្រពន្ធបានប្រាប់ឲ្យដឹងថា ប្ដីប្រពន្ធខាងលើនេះ បានលែងលះគ្នាច្រើនឆ្នាំកន្លងមកហើយ ព្រោះតែប្រពន្ធអត់ទ្រាំនិងប្ដីវាយធ្វើបាបមិនបាន ហើយក្រោយមកបុរសជាប្ដីនោះត្រូវបានសមត្ថកិច្ចចាប់ខ្លួនពីបទប្រើប្រាស់អាវុធខុសច្បាប់ ហើយបានជាប់ពន្ធនាគាររយៈពេល២ឆ្នាំ ដោយទើបតែចេញពីពន្ធនាគារវិញបានរយៈពេល៤ខែប៉ុណ្ណោះ ។ ដោយឡែកដំណើររឿងដែលនាំឲ្យអ្នកទាំងពីរបានរួមរស់នៅជាមួយគ្នាជាប្ដីប្រពន្ធវិញនោះ គឺផ្ដើមចេញពីរឿងអកុសលដ៏សោកសៅមួយដែលបានកើតឡើងកាលពី៣ខែមុន ដោយកូនប្រុសរបស់ប្ដីប្រពន្ធនេះម្នាក់អាយុ១១ឆ្នាំបានលង់ទឹកស្លាប់ ។

ប្រភពដដែលបានប្រាប់ឲ្យដឹងបន្តទៀតថា ក្រោយពេលដឹងថាកូនប្រុសស្លាប់ បុរសនេះក៏បានមកចូលរួមធ្វើបុណ្យសពកូនដែរ ហើយក៏បានឆ្លៀតឱកាសនោះនិយាយលួងលោមប្រពន្ធនិង ឪពុកម្ដាយក្មេក ព្រមទាំងបងប្អូនដើម្បីសុំត្រូវរ៉ូវគ្នារួមរស់នៅជាមួយប្រពន្ធវិញ ។ ពេលនោះកូនស្រីតូចអាយុ៨ឆ្នាំរបស់ពួកគេម្នាក់ ក៏បានជួយអង្វរសុំឲ្យម្ដាយត្រូវរ៉ូវគ្នាជាមួយឪពុកវិញដែរ ហើយដោយសារតែអាណិតកូនស្រីផង និងយល់ថាប្ដីកែខ្លួនផង ម្យ៉ាងក៏មានការយល់ព្រមពីក្រុមគ្រួសារទៀតនោះ ទើបនាងជាប្រពន្ធព្រមទទួលយកប្ដីរួមរស់ជាមួយគ្នាឡើងវិញ ហើយនាងក៏សង្ឃឹមថានិងទទួលបានសុភមង្គលថ្មីមួយ រហូតដល់ថ្ងៃចាស់ស្លាប់រៀងៗខ្លួនទៀតផង ។

ប្រភព​ខាងលើបានរៀបរាប់បន្តថា ផ្ទុយទៅវិញអ្វើដែលនាងគិតសង្ឃឹមនោះបានរលាយខ្សុលដូចអំបិលត្រូវទឹ ដោយការរួមរស់នៅជាមួយគ្នាចុងក្រោយនេះបានត្រឹមតែរយៈពេល៣ខែប៉ុណ្ណោះ ក៏បាត់បង់ទៅវិញហើយបិះនិងស្លាប់ខ្លួនថែមទៀត ។ ដោយនៅថ្ងៃទី២ ខែកុម្ភៈ ឆ្នាំ២០១៥ ដែលជាថ្ងៃបង្ហើយនៃពិធីបុណ្យគម្រប់ខួប១០០ថ្ងៃសពកូនប្រុស ស្រាប់តែប្ដីកំណាចរូបនេះបែរជាផឹកស៊ីសប្បាយរហូតស្រវឹងអួទីនួ ហើយបានរករឿងប្រពន្ធ បន្ទាប់មកបានអូសដៃប្រពន្ធចូលទៅក្នុងបន្ទប់ ហើយយកខ្សែក្រវាត់វាយរឹត ក ប្រពន្ធ មិនតែប៉ុណ្ណោះអ្វីដែលឃោរឃៅថែមទៀតនោះ គឺបានយក​ស្ព្រ៉ាយសម្រាប់បាញ់សក់និងថ្នាំបាញ់មូសទៅបាញ់ដាក់មុខនិងភ្នែកប្រពន្ធ ព្រមទាំងគំរាមសម្លាប់ចោលថែមទៀត ។

តាម​ប្រភពមួយនេះបានបញ្ជាក់បន្ថែមថា ដោយសារតែប្ដីមិនកែខ្លួននៅតែវាយធ្វើបាបកាន់តែខ្លាំងរហូតដល់ចង់សម្លាប់នាងចោលទៀតនោះ ទើបថ្ងៃទី៣ ខែកុម្ភៈ ឆ្នាំ២០២៥ នាងក៏បាននាំកូនស្រីលួចចាកចេញពីផ្ទះទៅកាន់ក្រុងប៉ោយបែត ខេត្តបន្ទាយមានជ័យគេចខ្លួនចេញពីប្ដី ហើយពេលនោះក្រុមគ្រួសារអត់បានដឹងនោះឡើយ ។ ក្រោយមកទើបកូនស្រីតូចរបស់នាងខលប្រាប់ឲ្យក្រុមគ្រួសារបានដឹង បន្ទាប់មកក្រុមគ្រួសារបានចាក់សោររបងផ្ទះលែងឲ្យជនសង្ស័យរូបនោះចូលផ្ទះទៀតហើយ ប៉ុន្តែស្រាប់តែជនខាងលើទិញសាំង២ដប រួចហែករបងសំណាញ់ដែកចូលទៅសម្ងំក្នុងផ្ទះ និងប្រុងដុតផ្ទះចោលតែម្ដង ។

ទើបក្រុមគ្រួសារសម្រេចប្ដឹងនគរបាលឲ្យឃាត់ខ្លួន ហើយខណៈនោះជនសង្ស័យបានសម្ងំក្នុងផ្ទះមិនព្រមចេញឡើយ រហូតនគរបាលប្រើពេលយូរដើម្បីលួងលោម ទើបជននេះព្រមចេញពីក្នុងផ្ទះឲ្យចាប់ខ្លួន ចំណែកប្រពន្ធក៏បានចាកចេញពីក្រុងប៉ោយប៉ែតត្រឡប់មកផ្ទះវិញ ដើម្បីដាក់ពាក្យបណ្ដឹងឲ្យនគរបាលចាត់ការប្ដីកំហូចខាងលើនេះតាមច្បាប់ហើយ ៕